PREZIDENTIMIZNING AMERIKAGA TAShRIFI AMALIY NATIJALARGA BOY BOʻLDI
Xalqimiz va dunyo hamjamiyati Oʻzbekiston Respublikasi Prezidenti Sh. M. Mirziyoyevning Amerikaga tashrifini va tashrif doirasida oʻtkazilgan tadbirlarni katta qiziqish bilan kuzatib turdi. Tashrif doirasida Prezidentimiz Amerika Prezidenti Donald Tramp va biznes doirasi vakillari bilan uchrashib, har ikkala mamlakat uchun foydali kelishuvlarga erishdilar.
Birlashgan Millatlar Tashkiloti Bosh Assambleyasining 80-sessiyasida hurmatli Prezidentimiz tilidan oʻzbekcha kalom yangraganida hayajon va gʻurur koʻksimni toʻldirdi. Prezidentimiz oʻz nutqlarida xalqaro global muammolarni hal etishda BMTning nufuzi va rolini oshirish, Xavfsizlik kengashining tarkibini kengaytirish va vakolatlarini kuchaytirish hamda zamon talablariga moslashtirish zarurligi gʻoyasini ilgari surdilar.
Prezidentimiz Oʻzbekistonda taʼlim, sogʻliqni saqlash tizimida olib borilayotgan tizimli islohotlar, xotin-qizlar va yoshlarga yaratilayotgan imkoniyatlarga batafsil toʻxtaldilar. Tashrif doirasida Amerikada yashayotgan yurtdoshlarimiz va "El-yurt umidi" jamgʻarmasi sohiblari boʻlgan okeanorti davlatning nufuzli oliygohlarida oʻqiyotgan talabalar bilan boʻlgan uchrashuvda qoraqalpogʻistonlik Gulxumor Jaqsiliqova yoshlar uchun yaratilgan imkoniyatlar yurtimizning eng chekka hududlaridagi yoshlarning iqtidori va qobiliyatlarini yuzaga chiqarishga yordam berayotgani uchun Prezidentimizga minnatdorchilik bildirdi. Taʼlim sohasi vakilasi sifatida bundan gʻururlandim va Gulxumorga oʻxshab yaratilgan imkoniyatlardan toʻgʻri foydalanadigan yoshlarimiz koʻpayishini tiladim.
Mintaqaviy masalalar borasida Prezidentimiz Markaziy Osiyo davlatlari oʻrtasida hamkorlikni mustahkamlash, Afgʻonistonni xalqaro iqtisodiy jarayonlarga jalb etish zarurligini taʼkidlab, Ukraina va Gʻazodagi nizoli vaziyatlarning tinch va adolatli yechim topishini qoʻllab-quvvatladilar. Prezidentimiz nutqining asosiy gʻoyasi — "Yangi Oʻzbekiston ochiq, pragmatik va hamkorlikka tayyor davlatdir", degan chaqiriq boʻldi.
Sanobar Xoʻjamuratova, Amudaryo tumanidagi 40-sonli umumiy oʻrta taʼlim maktabi direktori,
Qoraqalpogʻiston Respublikasi Joʻqorgʻi Kengesi deputati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
