Amudaryo tumani hokimi Sobir Xoʻjametov oʻz ustozlarini bayram bilan tabrikladi

Insonning hayotida eng unutilmas siymo – uning ustozi hisoblanadi. Ustoz – hayotimizga nur taratuvchi chiroq, insonni hayot yoʻliga boshlovchi, qalbiga ezgulik urugʻini sochuvchi buyuk shaxsdir. Ustozning koʻrsatgan yoʻli, bergan saboqlari jamiyat taraqqiyotining, millat kamolotining asosi boʻlib xizmat qiladi.

1-oktyabr – Oʻqituvchi va murabbiylar kuni bayrami sifatida yurtimiz boʻylab keng nishonlanadi. Maktablarda, oliy taʼlim muassasalarida, madaniyat markazlarida ustoz va murabbiylarga bagʻishlangan bayram tadbirlari, uchrashuvlar, samimiy suhbatlar oʻtkaziladi.

Bayram sanasi munosabati bilan Amudaryo tumani hokimi Sobir Xoʻjametov oʻz umr yoʻlida bilim berib, tarbiya bergan ustozlariga samimiy ehtirom koʻrsatib, bayram bilan tabrikladi.

Tuman hokimi yoshlik chogʻlarida ilk bora qoʻliga qalam tutqazgan, bilimga yetaklagan birinchi ustozini — Toʻlqin ovulidagi 33-sonli umumtaʼlim maktabining faxriy oʻqituvchisi Abdulla Rajabov domlaning xonadonlariga tashrif buyurib, u kishini bayram bilan qutladi. Samimiyatga boy ushbu uchrashuv ustoz-shogird mehrini yodga soldi. Domla hayotini taʼlimga, yosh avlod tarbiyasiga bagʻishlagan inson sifatida tuman hokimining ehtiromidan gʻururlanib, duoga qoʻl ochdi.

Shuningdek, tuman hokimi Sobir Xoʻjametov ustozi bilan birgalikda oʻzi tahsil olgan maktab jamoasi bilan ham uchrashib, oʻquvchilarga kitoblar, sport anjomlari va esdalik sovgʻalarini taqdim etdi. Maktab hovlisida ustoz va shogird birgalikda daraxt koʻchatlari ekib, ezgu anʼanani davom etdirdilar. Bu esa avlodlar davomiyligini, hayotga umid va yangilanish ramzini ifoda etdi.

Jamiyatda oʻqituvchi va murabbiylar oʻrnini hech narsa bilan oʻlchab boʻlmaydi. Ular — maʼnaviyat poydevorini qoʻyuvchi, qalblarga ezgulik singdiruvchi, yosh avlodni Vatanparvarlik, mehnatsevarlik, insoniylik ruhida tarbiyalovchi fidoyi insonlardir. Bugun mamlakatimiz taraqqiyoti, erishilayotgan yutuqlar, kelajak poydevorining mustahkamligi ham aynan ularning zahmatlari, mehr-muhabbat bilan qilgan mehnatlari evaziga boʻlayotgani barchamizga ayon.

Muhtaram Prezidentimiz taʼkidlaganidek, “Ustozlik – eng sharafli va eng masʼuliyatli kasbdir”. Chunki ustoz faqat bilim bermaydi, balki tarbiya ham beradi, insonni shaxs sifatida shakllantiradi, jamiyatga foydali inson boʻlib yetishishiga yoʻl koʻrsatadi.

Tuman hokimi maktab davrida bilim bergan faxriy ustozlaridan biri Gulsara Boboniyazovani ham bayram bilan samimiy tabriklab xonadoniga tashrif buyurdi.

Amudaryo tumanida boʻlib oʻtgan ushbu samimiy uchrashuv nafaqat ustoz-shogird mehrini, balki yoshlarga boʻlgan eʼtibor va taʼlim-tarbiyaga berilayotgan yuksak qadriyatlarni ham yaqqol namoyon etdi.

Bugun yoshlar qalbiga bilim urugʻini sepayotgan, kelajakka ishonch bagʻishlayotgan oʻqituvchi va murabbiylarimizning sharafli mehnati har qancha ehtirom va qadrlashga loyiq.

Charos Arslonova, tuman hokimligining Axborot xizmati rahbari.