Deputatlarning xalq bilan muloqoti: ijtimoiy muammolar hal qilinib, ilgʻor terimchilar ragʻbatlantirildi

Qoraqalpogʻiston Respublikasida ayni kunlarda Joʻqorgʻi Kenges va xalq deputatlari mahalliy kengashlar deputatlari joylarda saylovchilar bilan uchrashib, 2025-yilning 3-choragi davomida amalga oshirgan deputatlik faoliyati haqida aholiga hisobot bermoqdalar.

Tadbirkorlar va ishbilarmonlar harakati – Oʻzbekiston Liberal-demokratik partiyasining bir guruh deputatlari tomonidan ham Amudaryo tumanida shu kabi muloqotlar oʻtkazildi.

Qoraqalpogʻiston Respublikasi Joʻqorgʻi Kengesi deputati Ilhom Polvonov, xalq deputatlari tuman Kengashi deputatlari Madamin Kazakov, Yaxshimurod Ahmedov va Ulugʻbek Abdurahmonovlar dastlab Doʻstlik mahallasida saylovchilari bilan uchrashdilar. Deputatlar oʻz nutqlarida Qoraqalpogʻistonda soʻnggi yillarda amalga oshirilayotgan keng koʻlamli islohotlar va ularning bugungi kunda xalqimiz hayotida tub oʻzgarishlarga sabab boʻlayotgani haqida toʻxtalib oʻtdilar. Ayniqsa, Prezidentimizning Qoraqalpogʻiston uchun alohida qabul qilayotgan farmon va qarorlari hudud aholisining turmush sifatini yanada oshirish, shahar va qishloqlar, ovul va mahallalardagi ijtimoiy infratuzilmani yaxshilash, bir soʻz bilan aytganda, xalq farovonligini taʼminlashda muhim omil boʻlayotganini qayd qildilar.

Uchrashuvda mahalla aholisi bolalarni maktabgacha taʼlim tashkilotlariga qamrab olish, yoʻllar infratuzilmasini yaxshilash kabi dolzarb masalalar boʻyicha deputatlarga murojaat qildilar. Murojaatlar oʻrganilib, ushbu masalalar boʻyicha tegishli tashkilotlarga deputatlik soʻrovi yuborilishi maʼlum qilindi.

Arna boʻyi mahallasi hududidagi 57-sonli maktab binosida ham saylovchilar bilan muloqot boʻlib oʻtdi. Uchrashuvda deputatlar Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashi tomonidan 2025-yilning oʻtgan toʻqqiz oyi davomida amalga oshirilgan ishlar haqida saylovchilarga hisobot berdilar.

Qayd qilinganidek, mahalliy Kengashlar tomonidan hududlarni har tomonlama rivojlantirish, iqtisodiy va ijtimoiy sohalardagi muammolarni hal qilish, yangi ish oʻrinlarini yaratish, tadbirkorlikni rivojlantirish hamda aholi bandligini taʼminlash yoʻnalishlarida qator qarorlar qabul qilinib, ijrosi taʼminlanmoqda.

Uchrashuvda koʻtarilgan tabiiy gaz va ichimlik suvi taʼminoti bilan bogʻliq muammolar joyida hal etildi. Deputatlar hududiy gaz taʼminoti tashkiloti va tuman suv taʼminoti korxonasi rahbarlari bilan telefon orqali muloqot qilib, muammolarga zudlik bilan yechim topilishini taʼminladilar. Bu mahalliy aholining muammolariga eʼtiborning ifodasi va adolat tamoyilining amaldagi namoyonidir.

Uchrashuvlarning navbatdagi manzili paxta dalalari boʻldi. OʻzLiDePning bir guruh deputatlari paxta yigʻim-terimida faol ishtirok etayotgan terimchilar holidan xabar olish va ularni ragʻbatlantirish, shuningdek, fermerlar bilan uchrashib, ularning murojaatlarini oʻrganish maqsadida dalalarda boʻldilar.

Deputatlar dastlab Amudaryo tumanining Arna boʻyi mahallasi hududidagi "Ismoilov Eldorbek" fermer xoʻjaligi dalasida boʻldilar. Ushbu xoʻjalik paxtakorlari erta bahorda 49 gektar yerga chigit ekib, shu kungacha gektaridan 50 tsentnerdan ortiq hosil olgani, dalalarda hali ham "oq oltin" hosili moʻl ekani qishloq xoʻjaligidagi islohotlar natijasi ekani qayd etildi.

Dala boshida terimchilar bilan uchrashuvda soʻzga chiqqan deputatlar, mamlakatimizda qishloq xoʻjaligini rivojlantirish boʻyicha amalga oshirilayotgan islohotlar va ularning natijalari haqida alohida toʻxtalib oʻtdilar. Qayd qilinganidek, soʻnggi yillarda Oʻzbekistondagi qishloq xoʻjaligidagi islohotlar tufayli sohada katta oʻzgarishlar roʻy berdi. Xususan, paxta va gʻalla yetishtirishda davlat buyurtmasining bekor qilinishi, yerning haqiqiy egasiga – fermerga mustaqil qaror qabul qilish imkoniyati berilishi, klaster tizimining joriy etilishi mahsulot yetishtirish hajmi va sifatini oshirdi. Subsidiyalar berish va irrigatsiya tizimlarini yaxshilashga qaratilgan choralar esa qishloq xoʻjaligi samaradorligini oshirishga xizmat qilmoqda.

Uchrashuv yakunida ilgʻor terimchilarga deputatlar tomonidan sovgʻalar topshirildi. Qolaversa, Taʼlim, fan va madaniyat xodimlari kasaba uyushmasi tuman Kengashi raisi Ulugʻbek Abdurahmonov Oʻzbekiston Kasaba uyushmalari harakatining 120-yilligi munosabati bilan alohida sovgʻalar taqdim etdi.

Tuman Madaniyat boʻlimining xushovoz xonandalari ijrosidagi shoʻx kuy-qoʻshiqlar paxtakorlarning tushlik paytida madaniy hordiq chiqarishlariga va maroqli dam olishlariga imkon yaratdi.

Shuningdek, deputat Ilhom Polvonov oʻz saylov okrugi hududidagi "Raximboyev Azizbek" fermer xoʻjaligi dalalarida ham boʻlib, terimchilar holidan xabar oldi va ularni ham sovgʻalar bilan ragʻbatlantirdi.

Deputat terimchilar bilan muloqotda paxtani qoʻlda terishning ahamiyatiga alohida urgʻu berdi. Qoʻlda terilgan paxta yuqori sifatli tolaga ega boʻlishi va bu terimchilar uchun muhim daromad manbai boʻlib xizmat qilishi alohida qayd qilindi. Qishloq joylarida yashovchi oilalar uchun paxta terimi mavsumida olingan daromadlar qoʻshimcha moddiy koʻmak boʻlib, ularning farovonligini oshirishga xizmat qilishi, bu esa oʻz navbatida, ishsizlikni qisqartirish va aholining turmush darajasini oshirishga xizmat qiluvchi muhim omil ekani taʼkidlandi.

Tadbirkorlar va ishbilarmonlar harakati – Oʻzbekiston Liberal-demokratik partiyasining asosiy maqsadi – tadbirkorlarni qoʻllab-quvvatlash, fermer xoʻjaliklariga har tomonlama qulay sharoit yaratish orqali xalqimiz farovonligini taʼmindir. Bu kabi uchrashuvlar esa deputatlarning saylovchilar bilan doimiy aloqada boʻlishi, ularning muammolarini tezkor hal etishi va oʻz faoliyati yuzasidan hisobdorligini taʼminlashi bilan ahamiyatlidir.