BOBUR NOMLI OFY "MAHALLA YeTTILIGI" – AHOLIGA ENG YaQIN KOʻMAKDOSh

Shahardagidan farqli oʻlaroq, qishloq hayotining oʻziga xos jihatlari bor: hamma bir-birini yaxshi taniydi, toʻy-u maʼraka, oilaviy marosimlar hamqishloqlar ishtirokisiz oʻtmaydi. Qishloq ahli bir-birini qoʻllab-quvvatlab, bir-biridan oʻrganib, bilmaganlarga oʻrgatib yashashga odatlanishgan. Bobur nomli ovul Amudaryo tumanining aholisi zich hududlaridan biri boʻlishiga qaramay, oʻzaro mehr-oqibat tuygʻulari ustunligidanmi, qishloqning u cheti bilan bu chekkasida istiqomat qiluvchi keksa-yu yosh xuddi yaqin qarindoshlar kabi ahil va inoq yashashadi.

Qishloqda 906 ta xonadon tarkibidagi 1285 ta oilada salkam 5 ming nafar aholi istiqomat qiladi.

BANDLIK VA TADBIRKORLIK SAMARASI

Ovul fuqarolar yigʻinida faoliyat olib boruvchi “Mahalla yettiligi” aʼzolarining puxta oʻylangan reja asosidagi saʼy-harakatlari tufayli aholini ish bilan taʼminlash, kambagʻallikni qisqartirish, tadbirkorlikni rivojlantirish orqali xonadonlarda qoʻshimcha daromad manbaini yaratish, ayniqsa, yoshlar tadbirkorligini qoʻllab-quvvatlash borasida samarali ishlar amalga oshirilmoqda.

Faqat 2025-yilning oʻtgan davri mobaynida 208 nafar norasmiy band boʻlgan fuqarolar oʻzlari faoliyat koʻrsatib kelayotgan yoʻnalishlari boʻyicha oʻzini-oʻzi band qilgan shaxs sifatida roʻyxatdan oʻtkazilib, zarur shart-sharoitlar yaratib berildi.

87 nafar fuqarolarga umumiy qiymati 1 mlrd 204 mln soʻm miqdorida imtiyozli kredit olishlarida va oilaviy tadbirkorlik faoliyatlarini yoʻlga qoʻyishlarida amaliy yordam koʻrsatildi. Natijada ularning barchasi chorvachilik, parrandachilik, xizmat koʻrsatish va ishlab chiqarish yoʻnalishlarida tadbirkorlik faoliyatlarini boshladilar.

Oʻzbekiston Respublikasi Prezidentining 2023-yil 14-sentyabrdagi qarori ijrosini taʼminlash maqsadida oʻtkazilgan xatlov asosida 6 nafar fuqaroga 550 mln soʻmlik garovsiz kredit mablagʻlari ajratilishida yordam koʻrsatildi. Bu orqali 12 ta yangi ish oʻrinlari yaratilib, shuncha fuqaro doimiy daromad manbaiga ega boʻldilar.

2025-yil davomida ovuldagi 101 nafar ishsiz fuqarolar mavsumiy va doimiy ish oʻrinlariga joylashtirilib, bandligi taʼminlandi. 21 ta yangi tadbirkorlik subʼekti tashkil qilinib, savdo-sotiq, xizmat koʻrsatish, umumiy ovqatlanish shoxobchalari faoliyati yoʻlga qoʻyildi.

Kasb-hunar oʻrganish va tadbirkorlik yoʻnalishida oʻqish istagida boʻlgan 11 nafar fuqaroga koʻmaklashilib, ular ham oʻz oilalariga qoʻshimcha daromad manbalarini yaratdilar.

NAMUNALI TADBIRKORLAR SAFI KENGAYMOQDA

Ovulda yashovchi Xurshid Reyimov va uning turmush oʻrtogʻi Tursunoy Jumaboyevalar “Mahalla yettiligi”ning begʻaraz yordami bilan oʻz tomorqa yerida ixchamgina issiqxona tashkil etib, koʻchat yetishtirishni yoʻlga qoʻyishdi va oila uchun yetarli daromad manbaiga ega boʻlishdi.

Yaqindagina oʻz tadbirkorlik faoliyatini boshlagan Tursunboy Qulimbetov esa imtiyozli kredit mablagʻi hisobidan zamonaviy mebel ishlab chiqarish faoliyatini yoʻlga qoʻydi va oʻz yaqinlarini ham ish bilan taʼminladi.

Ovul fuqarolar yigʻini jamgʻarmasi hisobidan aholiga yer maydonlarini oʻz vaqtida oqova suv bilan taʼminlash uchun sugʻorish asbob-uskunasi olib berilgani tomorqa yer egalarining yerdan unumli foydalanishlari uchun zamin yaratdi. Ovuldagi mohir tomorqachi Bekimmat Safarboyev bu borada mahalladoshlariga namuna boʻlib, uning xonadoni obod, har bir qarich yeri serhosil, daromadga boy.

Nurposhsha Yusupova esa imtiyozli kredit hisobiga savdo-sotiq yoʻnalishida doʻkon tashkil etib, qishloq aholisining arzimagan xarid uchun tuman markaziga borib yurishiga ehtiyoj qoldirmadi. Tikuvchilik yoʻnalishida faoliyat yuritayotgan Irodaxon Artiqova esa oʻz hunari orqali doimiy daromad manbaiga ega boʻlishdan tashqari, 6 nafar yoshlarga ham chevarlik sir-asrorlarini oʻrgatmoqda.

Ovul hududida boʻsh turgan yer maydonlarini maxsus tizim orqali elektron savdoga chiqarish orqali tadbirkorlikni yanada rivojlantirish choralari ham koʻrilmoqda. Birgina joriy yilning oʻzida ikkita lot elektron savdolarga chiqarilishi natijasida auktsion gʻoliblari mazkur yer maydonlarida koʻchma savdo va xizmat koʻrsatish obʼektlarini tashkil etib, hududda tadbirkorlar safi yanada kengayishiga oʻz hissalarini qoʻshdilar.

“Mahalla yettiligi”ning oʻzaro hamkorlikda amalga oshirayotgan ishlari tufayli Bobur nomli ovul markaziy guzari, koʻchalar va aholi xonadonlari kun sayin obodonlashib, aholi turmush farovonligi tobora yuksalib bormoqda.

ROBIYa YOʻLDOShEVA.