Farovon mahallasida yangi zamonaviy bogʻcha binosi foydalanishga topshirildi

Amudaryo tumanining Farovon mahallasi ahli hayotida yana bir quvonchli voqea roʻy berdi — mahallada 90-oʻringa moʻljallangan 55-sonli davlat maktabgacha taʼlim tashkilotining yangi binosi tantanali ravishda foydalanishga topshirildi.

Mazkur taʼlim-tarbiya maskani binosi davlatimiz rahbarining maxsus qarori asosida, Islom taraqqiyot banki va OPEK xalqaro taraqqiyot tashkiloti ishtirokida amalga oshirilayotgan yirik loyiha doirasida bunyod etildi. Qurilish ishlari yuqori sifat bilan, zamonaviy talablarga toʻliq javob beradigan tarzda “Zamin qurilish trans servis” MChJ tomonidan bajarildi.

Tantanali ochilish marosimida Amudaryo tumani hokimi Sobir Xoʻjametov, tuman prokurori Bahram Masharipov, tuman hokimi oʻrinbosarlari, soha masʼullari, quruvchilar, taʼlim sohasi mutasaddilari hamda mahalla faollari ishtirok etdi.

Tadbir avvalida tuman hokimi Sobir Xoʻjametov soʻzga chiqib, mamlakatimizda maktabgacha taʼlim tizimini rivojlantirish, farzandlarimizning taʼlim-tarbiya olishlari uchun qulay shart-sharoitlar yaratish davlat siyosatining ustuvor yoʻnalishlaridan biri ekanini taʼkidladi. Shuningdek, ushbu zamonaviy bogʻcha binosining foydalanishga topshirilishi Farovon mahallasi ahli uchun katta quvonch va yosh avlod tarbiyasi yoʻlida muhim vosita ekanini qayd etdi.

Tadbirda quruvchi tashkilot vakillari tomonidan bogʻcha binosining ramziy kaliti tuman Maktabgacha va maktab taʼlimi boʻlimi boshligʻi Yalgʻash Shomuratovga tantanali ravishda topshirildi. Yalgʻash Shomuratov oʻz soʻzida mazkur loyihani hayotga tatbiq etishda koʻmak va eʼtibor koʻrsatgan mutasaddi tashkilotlar hamda quruvchilarga oʻz minnatdorligini bildirdi.

Tadbir mobaynida tuman hokimligi tomonidan quruvchilarga minnatdorchilik tariqasida esdalik sovgʻalari topshirildi. Bu ularning fidokorona mehnatiga boʻlgan yuksak eʼtibor va hurmat ifodasi boʻldi. Shundan soʻng 40-sonli maktabgacha taʼlim tashkiloti tarbiyalanuvchilari tomonidan tayyorlangan rang-barang raqslar va badiiy chiqishlar tadbirga yanada bayramona ruh bagʻishlab, mehmonlarga koʻtarinki kayfiyat ulashdi.

Tuman hokimi Sobir Xoʻjametov boshchiligidagi mahalla nuroniylari ramziy tasmani qirqib, yangi bogʻcha binosi bilan tanishdilar. Otaxonlar ezgu niyatlar bilan duoga qoʻl ochib, bu bino bolajonlar uchun fayzli maskan, ilm-maʼrifat yoʻlida ilhom manbai boʻlishini tiladilar.

Yangi taʼlim-tarbiya maskanida bolajonlar uchun barcha zarur qulayliklar yaratilgan — yorugʻ va shinam, keng xonalar, zamonaviy mebellar, oʻyin maydonchasi va oʻquv-tarbiyaviy jihozlar bilan taʼminlangan. Bu kabi bogʻcha binolarining qurilishi yosh avlodning barkamol, bilimli, va yurt ravnaqiga hissa qoʻshadigan insonlar boʻlib voyaga yetishiga xizmat qiladi.

Amudaryo tumanida taʼlim infratuzilmasini modernizatsiya qilish, yosh avlod taʼlim-tarbiya olishlari uchun zamonaviy sharoitlar yaratish yoʻlida amalga oshirilayotgan bunday amaliy ishlar – yurtimiz kelajagiga sarmoya, ertangi kunimizga ishonchli poydevor boʻlib xizmat qilishi, shubhasiz.

Charos Arslonova, tuman hokimligining Axborot xizmati rahbari.