Yoshlar tashkilotida mehnat qilgan faxriylar uchrashdi

Har qanday jamiyatning ertangi kuni, uning taqdiri va taraqqiyoti bevosita yosh avlodning qanday tarbiya topishi bilan chambarchas bogʻliq. Aynan shu sababli, barcha davrlarda ham navqiron avlodni jismonan sogʻlom, maʼnan yetuk, bilimli va faol fuqaro sifatida kamol toptirish davlat siyosatining eng ustuvor yoʻnalishlaridan biri boʻlib kelgan. Bu muhim vazifa nafaqat davlatning, balki oiladan tortib fuqarolik jamiyatining barcha institutlari oldiga ulkan masʼuliyat yuklaydi.

Oʻzbekistonning yaqin tarixiga nazar tashlar ekanmiz, yoshlar bilan ishlash tashkiloti turli nom va tuzilmalar ostida, ammo yagona maqsad yoʻlida faoliyat yuritganiga guvoh boʻlamiz. Sobiq ittifoq davridagi "Komsomol" qoʻmitasidan tortib, mustaqillikning dastlabki yillarida, yaʼni 1991-1996-yillarda faoliyat yuritgan Oʻzbekiston Yoshlar ittifoqigacha, keyinchalik 1996-yilda tashkil etilib, 2001-yilda Yoshlar ijtimoiy harakatiga aylantirilgan "Kamolot" tashkiloti ham ana shu ezgu maqsadlarga xizmat qilib kelgan.

Vaqt oʻtishi bilan zamon talablari oʻzgardi. 2017-yilda "Kamolot" yoshlar ijtimoiy harakati faoliyati tanqidiy koʻrib chiqilib, yoshlarni yanada kengroq qamrab olish maqsadida tizim tubdan isloh qilindi va Oʻzbekiston yoshlar ittifoqi tashkil etildi. Keyinchalik bu yoʻnalishdagi ishlar yanada takomillashib, tashkilot Yoshlar ishlari agentligi sifatida faoliyatini davom ettirmoqda.

Nomi va tuzilishi qanday boʻlmasin, bu tashkilotlarning asl maqsadi oʻzgarmadi: ularning zimmasiga yoshlarni bilimli, xalqaro maydonda raqobatbardosh, oʻz pozitsiyasiga ega, kattalarga hurmat va kichiklarga gʻamxoʻrlik ruhida tarbiyalash, oʻzbek madaniyati va anʼanalarini eʼzozlaydigan maʼnaviyatli avlodni voyaga yetkazish vazifasi yuklandi.

Albatta, har qanday tashkilotning muvaffaqiyati, avvalo, unda faoliyat yuritgan fidoyi insonlarga bogʻliq. Amudaryo tumanida ham ana shunday, umrining eng qaynoq va sergʻayrat damlarini yoshlar tashkiloti saflarida oʻtkazgan, ularning hayotini mazmunli qilishga hissa qoʻshgan, bugun esa keksalik gashtini surayotgan faxriylar koʻpchilikni tashkil etadi.

Yaqinda ushbu faxriylar Mangʻit shahrida jam boʻlib, unutilmas diydorlashuv tadbirini oʻtkazdilar. Ular orasida turli yillarda masʼul lavozimlarda ishlagan Ozod Tojimurodov, Gulasal Oʻrozimbetova, Gulchehra Otaboyeva, Sayyora Matkarimova, Farhod Matkarimov kabi oʻnlab faxriylar, oʻz sohasining fidoyilari bor.

Tadbirda uzoq yillar yoshlar tashkilotida va davlat idoralarida ishlagan mehnat faxriylari Rustam Roʻzmetov, Xonimjon Rajabova va boshqa faxriylar barchani diydor onlari bilan qutlab, eng ezgu tilaklarni izhor qildi. Shundan soʻng faxriylar oʻzlari bilan bir tashkilotda, yagona maslak yoʻlida, bir safda turib mehnat qilgan, bugun esa olamdan oʻtgan ustozlar va doʻstlar xotirasini yodga olib Qurʼon tilovat qildilar.

Doʻstlar diydorida bir-birini sogʻingan nigohlar soʻzladi, koʻngillar koʻngillardan quvvat oldi. Hayotning eng qaynoq, sermashaqqat, ammo sharafli damlari – ayni kuch-gʻayratga toʻlgan paytida amalga oshirgan ezgu ishlarini, oʻtkazgan tadbirlari va erishgan yutuqlarini faxr bilan yodga oldilar. Olis oʻtmishning sermazmun yillari yana bir bor faxriylar koʻz oʻngida jonlandi.

Umr oʻtkinchi, biroq shu oʻtgan davr mobaynida el-yurt manfaati, ayniqsa, kelajak avlod kamoloti uchun xizmat qilish, ortdan yaxshi nom va yorugʻ xotiralar qoldirish – haqiqiy baxtdir. Mazkur diydorlashuv ishtirokchilari aynan shunday baxtga musharraf boʻlgan, bir-birini yoʻqlab, sogʻinib yashaydigan insonlardir. Ularga uzoq umr va tilagan holda hamisha farzandlaringizning, shogirdlaringizning baxtu kamolini koʻring, deya tilak bildiramiz.