“KELAJAK SOATI” DARS MAShGʻULOTI DOIRASIDA BOLAJONLAR YOʻL HARAKATI QOIDALARINI OʻRGANDILAR

Maktabgacha taʼlim tashkilotlarida va umumiy oʻrta taʼlim maktablarida tarbiyalanuvchilar hamda oʻquvchi-yoshlarni milliy-maʼnaviy qadriyatlarga sadoqat, vatanparvarlik ruhida tarbiyalash, maʼnaviy-maʼrifiy ishlar samaradorligini yanada oshirish, psixologlar ish faoliyatini tizimli tashkil etish maqsadida Oʻzbekiston Respublikasi Maktabgacha va maktab taʼlimi vazirligining 2025-yil 25-avgustdagi tegishli buyrugʻi taʼlim muassasalarida har haftaning dushanba kuni dars jadvalining birinchi soatida “Kelajak soati” darsi oʻqilishi belgilangan.

Ayni paytda maktabgacha taʼlim tashkilotlarida “milliytarbiya.uz” elektron platformasida joylashtirilgan kontentlardan foydalangan holda “Kelajak soati” darsi muvaffaqiyatli oʻtkazib kelinmoqda.

Joriy yilning 3-noyabr sanasida Amudaryo tumanidagi 4-sonli maktabgacha taʼlim tashkilotida “Kelajak soati” dars jadvalidagi maktabgacha yoshdagi tarbiyalanuvchilar uchun belgilangan “Yoʻl harakati qoidalari” mavzusida davra suhbati oʻtkazildi. Davra suhbatida Amudaryo tuman Yoʻl harakati xavfsizligi boʻlimi boshligʻi Begzod Qazaqov hamda 4-sonli maktabgacha taʼlim tashkiloti xodimlari, mazkur tashkilot tarbiyalanuvchilari ishtirok etdilar.

Davra suhbati jarayonida pedagog-tarbiyachilar tomonidan bolalarga yoʻl harakati qoidalari toʻgʻrisida tushunchalar berildi. Shu bilan birga, yoʻl harakati qoidalariga amal qilish inson hayotini xavf-xatardan saqlashi, svetofor ranglarini bilish va ularga rioya qilish zarurligi, yoʻldan oʻtayotganda har doim diqqatli boʻlishi kerakligi xususida batafsil maʼlumotlar ham taqdim etildi.

Shuningdek, tadbirda Amudaryo tumani Yoʻl harakati xavfsizligi boʻlimi boshligʻi Begzod Qazaqov bolalarda yoʻl harakati qoidalari haqida boshlangʻich tushunchalar hosil qilish, yoʻlda oʻzini toʻgʻri tutish, xavfsizlikni saqlash koʻnikmalarini shakllantirish, yoʻl belgilari, svetofor va piyodalar yoʻlakchalarining ahamiyati xususida koʻrgazmali vositalar orqali keng va batafsil maʼlumotlar berdi.

4-sonli davlat maktabgacha taʼlim tashkilotining tayyorlov guruhlarida maktabgacha yoshdagi tarbiyalanuvchilar uchun tashkil qilingan davra suhbati davomida tarbiyalanuvchilar svetoforning uch xil rangi — qizil, sariq, yashil rangli kiyimlarni kiyib, yoʻl harakati qoidalari boʻyicha oʻzlarining bilim va koʻnikmalarini amalda namoyish qildilar.

Shundan soʻng tarbiyachi tomonidan “Sirli mehmon” tashrifi eʼlon qilinib, davraga Yoʻl harakati xavfsizligi xodimi kirib keldi. Ushbu xodim tomonidan svetofor maketi yordamida savol-javob orqali bolajonlarning “Kelajak soati” darsidan olgan bilimlari sinovdan oʻtkazildi.

Bundan tashqari, davra suhbati davomida “Ranglarga qarab yur!” interaktiv oʻyini ham tashkillashtirildi. Yoʻl harakati xavfsizligi xodimi oʻyin davomida svetoforning rangini aytib turdi va bolalarning qizil rangda “qotib turish”, sariq, yashil rangida bolalarning tartibli, belgilangan qoidaga koʻra, oldinga sekin yugurish holatlarini kuzatib, ularning harakatlariga baho berdi. “Zebra yoʻlagida kim birinchi?” oʻyini ham tashkil etilib, bolalar yasama zebra chizigʻidan oʻtishni oʻrgandilar.

Shundan soʻng vizual kontentdan foydalangan holda video namoyish qilindi. Davra suhbati bolalarda keng va qiziqarli taassurot qoldirdi hamda bolajonlar davra suhbati yakunida “Sirli mehmon” — Yoʻl harakati xavfsizligi xodimiga rahmat aytdilar.

Maktabgacha taʼlim tashkilotlarida “Kelajak soati” dars-mashgʻuloti doirasida amalga oshirilayotgan bu kabi tadbirlar, albatta, jajji bolajonlarning yoʻl harakati qoidalarini juda yoshligidan puxta oʻrganishlarida muhim ahamiyat kasb etadi va bu boradagi taʼlimiy va tarbiyaviy ishlar samaradorligiga erishish imkonini beradi.

Hulkar Babajanova, Amudaryo tumani MMTB bosh metodisti.