Prezident qarorlarining mazmun-mohiyati aholiga yetkazildi

Amudaryo tumanida Qoraqalpogʻiston Respublikasini ijtimoiy-iqtisodiy rivojlantirishga qaratilgan Prezident qarorlarining mazmun-mohiyatini aholiga yetkazish maqsadida targʻibot uchrashuvi boʻlib oʻtdi.

Tadbir Amudaryo tumani Madaniyat boʻlimida tashkil etilib, unda tuman hokimi Sobir Xoʻjametov, hokim oʻrinbosarlari “Mahalla yettiligi” aʼzolari, nuroniylar, koʻcha boshchilari, faol yoshlar, xotin-qizlar faollari, fermer xoʻjaliklari rahbarlari hamda tumandagi barcha tashkilot va muassasa rahbarlari ishtirok etdilar.

Uchrashuvda muhtaram Prezidentimiz tomonidan yaqinda imzolangan Qoraqalpogʻiston Respublikasini ijtimoiy-iqtisodiy rivojlantirishga doir 322-, 332-, 333-, va 334-sonli qarorlarning mazmuni, ular orqali yaratilayotgan yangi imkoniyatlari, mahalliy darajada amalga oshiriladigan chora-tadbirlar atroflicha muhokama qilindi.

Tadbirni tuman hokimi Sobir Xoʻjametov ochib berdi. Tuman hokimi oʻz soʻzida muhtaram Prezidentimiz tomonidan amalga oshirilayotgan Qoraqalpogʻistonni ijtimoiy-iqtisodiy rivojlantirish yoʻlidagi tub islohotlar respublika aholisining farovonligini oshirish, yangi ish oʻrinlari yaratish, infratuzilmani yaxshilash hamda yoshlar uchun zamonaviy imkoniyatlar eshigini ochishda muhim qadam boʻlayotganini alohida taʼkidladi. Tuman hokimining birinchi oʻrinbosari Faxriddin Yusupov har bir qaror mazmun-mohiyatiga alohida toʻxtaldi.

Xususan, Oʻzbekiston Respublikasi Prezidentining 2025-yil 31-oktyabr kungi “Aholini oziq-ovqat mahsulotlari bilan barqaror taʼminlashga doir qoʻshimcha chora-tadbirlar toʻgʻrisida”gi 322-sonli qarori Respublika aholisini asosiy turdagi oziq-ovqat mahsulotlari, xususan, goʻsht, sut, tuxum, baliq, oʻsimlik yogʻi va kartoshka bilan kafolatli taʼminlash, chorvachilik xoʻjaliklarining ozuqa bazasini tubdan yaxshilash, ularning faoliyatini kengaytirish uchun qoʻshimcha shart-sharoitlar yaratish va narxlar barqarorligini saqlash kabi ustuvor maqsadlarga xizmat qilishi xususida soʻz yuritildi.

Shuningdek, mamlakatimizda investitsiya muhitini yaxshilash, yangi ishlab chiqarish korxonalarini tashkil etish va aholi bandligini oshirishda Prezidentimiz tomonidan joriy yilning 3-noyabrida qabul qilingan “Qoraqalpogʻiston Respublikasida tuzni qayta ishlashni rivojlantirishga qaratilgan chora-tadbirlar toʻgʻrisida”gi 333-sonli qaror muhim ahamiyatga ega.

Qaror asosida “Kungrad Solt Free Zone” nomli sanoat zonasi tashkil etiladi. Dastlab 50 gektar yerda loyihalar amalga oshiriladi va keyin zaruratga qarab hudud 200 gektargacha kengaytirilishi mumkin. Bu yerda kamida 50 million AQSh dollari miqdorida investitsiya jalb etiladi, keyinchalik 200 milliongacha miqdorda investitsiya kiritish rejalashtirilgan. Investorlar uchun yer maydonlari, soliq va bojxona imtiyozlari beriladi. “Yagona darcha” tartibi orqali ruxsatnomalarni olish soddalashtiriladi.

Qolaversa, 2025-yil 3-noyabr kuni imzolangan 332-sonli Prezident qarori orqali Qoraqalpogʻiston Respublikasi Xoʻjayli tumanida katta loyiha boshlanadi. Bu loyiha yordamida yoshlar uchun yangi ish oʻrinlari yaratish, ularning bilim va koʻnikmalarini oshirish, yoshlarga katta imkoniyat eshiklari ochish maqsad qilingan. Xoʻjayli tumanining Somonkoʻl mahallasi hududida 152 gektar yerni egallagan “Yoshlar ijtimoiy-iqtisodiy markazi” qurilishiga start beriladi. Markazga 2026-2030-yillarda investor tomonidan 400 mln. dollar investitsiya kiritish orqali markaz xududiga IT universiteti, startaplar texnoparki va ularni qoʻllab-quvatlash innovatsion guruhlar, loyiha ofislari, uy-joylar, ijtimoiy soha hamda madaniy-maʼrifiy obʼektlar, yoshlar bandligini taʼminlashga qaratilgan ishlab chiqarish korxonalari faoliyati yoʻlga qoʻyiladi.

Shu bilan birga, 3-noyabr kuni imzolangan yani bir muhim qaror “Qoraqalpogʻiston Respublikasida xoʻjaliklarning oziq-ovqat bazasini mustahkamlash va qishloq xoʻjaligidagi mavjud resurslardan samarali foydalanish choralari toʻgʻrisida”gi 334-sonli qarori bilan xoʻjaliklarga bir qator imkoniyatlar va imtiyozlar berildi. Xususan, hududdagi texnika va agregatlar sonini 2 baravar oshirish orqali xoʻjaliklarning yem-xashak bazasini mustahkamlash vazifasi belgilab berildi.

Tadbir yakunida mazkur Prezident qarorlarida belgilangan vazifalarni joylarda samarali amalga oshirish, ularni hayotga tatbiq etishda mahallalar, jamoatchilik va masʼul tashkilotlar oʻrtasidagi hamkorlikni kuchaytirish boʻyicha fikr-mulohazalar va takliflar bildirildi.

Bunday yigʻilishlar aholining davlat siyosati mazmunini hamda amalga oshirilayotgan islohotlarning mohiyatini chuqur anglab yetishiga xizmat qiladi.

Charos Arslonova, tuman hokimligining Axborot xizmati rahbari.