Davlat ramzlariga ehtirom — muqaddas qadriyat

Amudaryo tumanida 18-noyabr — Oʻzbekiston Respublikasi Davlat bayrogʻi qabul qilingan kun munosabati bilan bayram tadbiri tashkil etildi. Tadbir tuman Madaniyat boʻlimida boʻlib oʻtdi va unda davlat ramzlariga boʻlgan chuqur hurmat, yosh avlodni vatanparvarlik ruhida tarbiyalash masalalari bosh mavzuga aylandi.

Tadbir avvalida Amudaryo tumani prokurori Bahram Masharipov, tuman hokimi oʻrinbosari Nodirbek Kamolov soʻzga chiqib, yigʻilganlarni mamlakatimiz suvereniteti va davlat ramzlari sharafini ulugʻlaydigan ushbu sana bilan samimiy muborakbod etishdi.

“Davlat bayrogʻi — xalqning shaʼni, davlatning obroʻsi” – deya taʼkidladi tuman prokurori Bahram Masharipov oʻz nutqida. Shuningdek, u davlat ramzlarining nafaqat huquqiy, balki maʼnaviy hayotimizdagi oʻrniga alohida toʻxtalib oʻtdi. U davlat bayrogʻi mamlakat mustaqilligining eng muhim belgilardan biri ekani, bayrogʻimiz tasdiqlangan 1991-yil 18-noyabrda sanasi tarixiy ahamiyatga ega kun ekanini alohida taʼkidladi.

Darhaqiqat, Oʻzbekiston bayrogʻi bugun jahon arenalarida faxr bilan hilpiramoqda, xalqaro sport musobaqalarida sportchilarimiz yutuqlari sharofati bilan bayrogʻimiz baland koʻtarilmoqda. Bayrogʻimizning nufuzli marosimlar, sammit va xalqaro uchrashuvlarda hilpirashi xalqimizning shaʼni va obroʻsini dunyoga koʻrsatmoqda. Davlat ramzlariga hurmat — bu, avvalo, Vatanga sadoqat, milliy gʻurur va fuqarolik masʼuliyatining yorqin ifodasidir.

Tuman hokimi oʻrinbosari Nodirbek Kamolov oʻz nutqida davlat bayrogʻining xalqimiz uchun ulkan gʻurur va faxr timsoli ekanini qayd etdi. U davlat bayrogʻi qabul qilinganiga 34-yil toʻlgani munosabati bilan barcha hamyurtlarimizni samimiy tabrikladi.

Hokim oʻrinbosari oʻz nutqida bayroqdagi ranglar va ramzlarning maʼnosi — tinchlik, poklik, umid, jasorat va umumbashariy qadriyatlarni ifoda etishi haqida ham alohida toʻxtalib oʻtildi. Bayrogʻimizni eʼzozlash, uni hurmat qilish va yosh avlodga shu qadriyatni singdirish barchamizning muqaddas burchimiz ekani alohida taʼkidlandi.

Tadbir tuman Madaniyat boʻlimi ijodkorlari tomonidan tayyorlangan bayramona kontsert dasturi bilan davom etdi. Xonandalar tomonidan Vatan muhabbati, doʻstlik, tinchlik va birlikni tarannum etuvchi kuy-qoʻshiqlar ijro etilib, yigʻilganlarga koʻtarinki kayfiyat ulashildi.

18-noyabr — Davlat bayrogʻi qabul qilingan sana nafaqat tarixiy kun, balki avlod-avlodga oʻtadigan milliy qadriyat, suverenitetimiz ramzi, mustaqilligimizning yorqin ifodasidir. Amudaryo tumanida oʻtkazilgan bayram tadbiri ham bu kunning naqadar ulugʻ va ahamiyatli ekanini yana bir bor namoyon etdi.

Bu kabi tadbirlar yoshlarimiz qalbida Vatanga muhabbat, davlat ramzlariga hurmat tuygʻusini yanada mustahkamlashi shubhasiz.

Charos Arslonova, tuman hokimligining Axborot xizmati rahbari.