"MARTABANG BALAND BOʻLSIN, ONA TILIM!" ShIORI OSTIDA QORAQALPOQ TILI BAYRAMI OʻTKAZILDI

Til — millatning koʻrki, milliy-maʼnaviy hayotining koʻzgusi. Ona tilini qadrlagan millatning dunyo miqyosidagi nufuzi ham, oʻrni ham baland boʻladi. Asrlar davomida xalq zakosi, betakror urf-odat va anʼanalari asosida takomillashib, bugungi kunda dunyodagi yuzlab tillar orasida oʻz oʻrniga ega boʻlgan qoraqalpoq tili bu zaminda yashovchi har bir inson uchun yanada qadrli. Shu bois, bu tilni xalqimiz nafaqat sevib, ardoqlaydi, balki umumtaʼlim maktablarida, oliy taʼlim muassasalarida yoshlar katta qiziqish bilan oʻrganadilar.

Har yili qoraqalpoq tiliga davlat tili maqomi berilgan sana munosabati bilan maʼnaviy-maʼrifiy, musiqiy tadbirlar tashkil etilib, qoraqalpoq tilining xalqimiz hayotida tutgan oʻrni xususida maʼruzalar oʻqiladi, qoraqalpoq mumtoz va zamonaviy adabiyoti namoyandalarining asarlari asosida sahna koʻrinishlari namoyish etilib, qoraqalpoq xalq ogʻzaki ijodi namunalari boʻyicha turli intellektual oʻyinlar oʻtkaziladi.

Amudaryo tumani Maktabgacha va maktab taʼlimi boʻlimi tasarrufidagi 1-sonli umumtaʼlim maktabida ham qoraqalpoq tiliga davlat tili maqomi berilganining 36-yilligiga bagʻishlangan "Martabang baland boʻlsin, ona tilim!" shiori ostida madaniy-maʼrifiy tadbir boʻlib oʻtdi.

Tadbirni maktab direktori Dilrabo Sherboyeva ochdi va barchani bayram bilan muborakbod etib, 1-sonli maktabda qoraqalpoq tilini oʻqitish borasida oʻziga xos tajriba shakllangani, maktab oʻquvchilari fanlar olimpiadasining tuman va Respublika bosqichlarida muvaffaqiyatli ishtirok etishayotgani xususida faxrlanib soʻz yuritdi.

Tadbirga tashrif buyurgan aziz mehmonlar — "Ustaz joli" gazetasi bosh muharriri Jetkerbay Otegenov, mazkur gazetaning jamoatchi muxbiri Sapura Saparova, "Qaraqalpaqstan jaslari" gazetasi muharriri Shukrbay Siypatdinov, taniqli qoraqalpoq tili fani oʻqituvchisi Urimxan Tajimuratova hamda maktabning qoraqalpoq tili uslub birlashmasi oʻqituvchilari va maktab oʻquvchilari ishtirokida davra suhbati tashkillashtirildi.

Davra suhbati jarayonida mehmonlar qoraqalpoq tilining boy tarixi va taraqqiyot bosqichlari, davlat tili sifatidagi xalqaro miqyosdagi nufuzi xususida soʻz yuritdilar. Shuningdek, tilning mamlakatimiz xalqlari maʼnaviy hayotidagi oʻrni, uning bugungi kundagi rivojlanish jarayoni, yosh avlod zimmasidagi masʼuliyatli vazifalar, ayniqsa, qoraqalpoq tilining imkoniyatlarini amalda namoyon etishga qaratilgan ilmiy-pedagogik izlanishlar yuzasidan oʻzaro fikr almashdilar.

Tadbir davomida maktabning oliy toifali qoraqalpoq tili fani oʻqituvchisi Aptabida Abdimuratova tomonidan 10-"A" sinfda tadbir mehmonlari ishtirokida ochiq dars tashkil etildi. Mahoratli oʻqituvchi tomonidan tashkillashtirilgan mazkur ochiq dars eng zamonaviy pedagogik uslublar asosida olib borilgani uchun nafaqat oʻquvchilar, balki mehmonlarda ham katta taassurotlar qoldirdi.

“Martabang baland boʻlsin, ona tilim!” nomli madaniy-maʼrifiy tadbirning adabiy-musiqiy qismida tadbir mehmonlari maktabning bir asrlik tarixi haqida hikoya qiluvchi muzey faoliyati bilan ham yaqindan tanishdilar. Ular mazkur ilm dargohining nafaqat Qoraqalpogʻiston, balki mamlakatimiz ilm-fani, iqtisodiyoti, ijtimoiy-madaniy hayotida tutgan oʻrniga yuqori baho berdilar va 1-sonli maktab el-yurt faxri ekanligini taʼkidladilar.

Tadbir davomida maktabning “Turon” havaskorlar teatri jamoasi tomonidan “Eng yaxshi meros” ertagi asosida tayyorlangan sahna koʻrinishi namoyish qilindi. Oʻquvchilar tomonidan qoraqalpoq shoir va yozuvchilarining sheʼrlari, xalq ogʻzaki ijodiga doir hikmatli iboralar, maqol va matallar, qoʻshiq va raqslar ijro etildi.

Tadbirning yakuniy qismida maktabning oliy toifali qoraqalpoq tili fani oʻqituvchisi, tashabbuskor va izlanuvchan pedagog Aptabida Abdimuratova “Adiwli ustaz” koʻkrak nishoni hamda diplom bilan taqdirlandi. Shuningdek, maktabning mahoratli oʻqituvchilari Dildora Kuchkarova, Yangila Shomuratova, Nasiba Kuchkarova, Mohira Kamolovalarga tashakkurnomalar berildi.

Oʻquvchi-yoshlar qalbida Vatanga muhabbat va istiqlol gʻoyalariga sadoqat tuygʻularini mustahkamlash, qoraqalpoq xalqining boy madaniy-maʼnaviy merosi, urf-odatlari va milliy qadriyatlarini keng targʻib qilish maqsadida tashkillashtirilgan bayramona tadbir maktab oʻquvchilari uchun ham, tadbir mehmonlari uchun ham qiziqarli taassurotlarga boy boʻldi.

ROBIYa YOʻLDOShEVA.