Korruptsiyaga qarshi kurash – taraqqiyot kafolati: Qoraqalpogʻiston bojxonasida ochiq muloqot oʻtkazildi

Korruptsiya — bu shunchaki huquqbuzarlik emas, balki aksariyat jamiyatlarda ijtimoiy-iqtisodiy rivojlanishga jiddiy putur yetkazuvchi, davlat va xalq oʻrtasidagi ishonch koʻprigini yemiruvchi illatdir. Jahon tajribasi shuni koʻrsatadiki, biror bir mamlakat, mintaqa yoki jamiyat ushbu global muammodan toʻliq immunitetga ega emas. Poraxoʻrlik, tanish-bilishchilik, mahalliychilik yoki mansab vakolatini suiisteʼmol qilish kabi koʻrinishlarda namoyon boʻluvchi ushbu jinoyatga qarshi kurashish barchaning burchidir.

Maʼlumki, Birlashgan Millatlar Tashkiloti tashabbusi bilan 2004-yildan boshlab har yili 9-dekabr sanasi dunyo boʻylab "Xalqaro korruptsiyaga qarshi kurashish kuni" sifatida keng nishonlanadi. Ushbu muhim sana munosabati bilan Qoraqalpogʻiston Respublikasi Bojxona boshqarmasida keng qamrovli tadbir tashkil etildi. Uchrashuvda Qoraqalpogʻiston Respublikasi Prokuraturasi hamda Davlat xavfsizlik xizmati Qoraqalpogʻiston Respublikasi boshqarmasi masʼul xodimlari va bojxona tizimining shaxsiy tarkibi ishtirok etdi.

Tadbir davomida taʼkidlanganidek, bugungi kunda bojxona organlarini "korruptsiyadan xoli tizim"ga aylantirish davlat siyosatining ustuvor yoʻnalishlaridan biridir. Xususan, sohada inson omilini keskin qisqartirish maqsadida bojxona nazorati va rasmiylashtiruvi jarayonlari toʻliq avtomatlashtirilmoqda. Yangi joriy etilayotgan Yagona avtomatlashtirilgan axborot tizimi dasturlari orqali tadbirkor va bojxona xodimi oʻrtasidagi toʻgʻridan-toʻgʻri muloqot minimal darajaga tushirilgani, bu esa oʻz navbatida korruptsion xavflarni bartaraf etishda muhim omil boʻlayotgani alohida qayd etildi.

Bojxona sohasini korruptsiyadan xoli tizimga aylantirishda faqat jazolash yoki nazorat qilish emas, balki xodimlarni ijtimoiy qoʻllab-quvvatlash ham muhim strategiya hisoblanadi. Tadbirda bojxona xodimlarining ijtimoiy himoyasini mustahkamlash borasida amalga oshirilayotgan ishlarga alohida eʼtibor qaratildi.

Raqamlarga murojaat qiladigan boʻlsak, hududiy boshqarma tomonidan xodimlarning uy-joy sharoitlarini yaxshilash boʻyicha sezilarli ishlar qilingan. Xususan, 3 nafar xodimga ipoteka krediti asosida uy-joy xarid qilishi uchun boshlangʻich badal sifatida 25 foiz miqdorida subsidiya mablagʻlari ajratilgan, 2 nafar xodimga uy-joy sotib olish va rekonstruktsiya qilish maqsadlari uchun jami 600 million soʻm miqdorida foizsiz ssudalar berilgan. Shuningdek, 5 nafar xodimga 14 foizli imtiyozli ipoteka kreditlarini rasmiylashtirishda amaliy yordam koʻrsatilgan.

Bundan tashqari, xodimlarni ragʻbatlantirishning maʼnaviy jihatlari ham eʼtibordan chetda qolmagan. 2022-yildan boshlab, xizmat vazifasini sidqidildan bajarib, yuqori natijalarga erishgan xodimlarning farzandlariga oliy taʼlim muassasalariga kirish uchun tavsiyanomalar berish tizimi yoʻlga qoʻyildi. Natijada, oʻtgan davr mobaynida jami 31 nafar bojxonachining farzandlari qoʻshimcha kvota asosida davlat oliygohlarining talabasi boʻlish baxtiga muyassar boʻlishdi.

Oʻtkazilgan uchrashuv shuni koʻrsatdiki, korruptsiyaga qarshi kurash – bu kompleks yondashuvni talab etadigan jarayon. Zamonaviy axborot texnologiyalarini joriy etish va xodimlarning ijtimoiy farovonligini taʼminlash orqaligina tizimda shaffoflikka erishish mumkin. Qoraqalpogʻiston bojxona boshqarmasida bu yoʻnalishda amalga oshirilayotgan ishlar oʻz samarasini berib, iqtisodiy xavfsizlikni taʼminlashda muhim omil boʻlmoqda.