Amudaryo tumanida 2026-yilgi ekish mavsumiga tayyorgarlik koʻrish masalasida amaliy seminarlar tashkil etildi

Amudaryo tumanining “Toʻlqin” va “Oq oltin” OFY hududlarida 2026-yil chigit ekish mavsumiga tayyorgarlik ishlari doirasida qator amaliy seminarlar tashkil etildi.

Seminarlarda Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov, Suv xoʻjaligi vaziri Baxtiyor Yusupov, qishloq va suv xoʻjaligi sohalariga masʼul tashkilotlar rahbarlari, tuman hokimlarining qishloq va suv xoʻjaligi masalalari boʻyicha oʻrinbosarlari hamda fermerlar ishtirok etdilar. Ushbu tadbirlar qishloq xoʻjaligi ishlarini ilmiy asosda, belgilangan agrotexnik muddatlarda va yuqori sifat bilan amalga oshirishga qaratilgani bilan ahamiyat kasb etdi.

Seminarlar davomida qishloq xoʻjaligi texnikalarini taʼmirlash ustaxonalarida olib borilayotgan ishlar, texnika va agregatlarni mavsumga shay holatga keltirish jarayonlari atroflicha koʻzdan kechirildi. Shuningdek, ekin maydonlarini shudgorlash, lazerli tekislash, shoʻr yuvishga yer tayyorlash, chel olish va shoʻr yuvish ishlarining borishi yuzasidan amaliy tushuntirishlar berildi.

Urugʻlik chigitini tozalash, saralash, tuksizlantirish va dorilash, biolaboratoriyalarni mavsumga tayyorlash masalalari ham seminarlarning muhim yoʻnalishlaridan boʻldi. Bu jarayonlar kelgusida sogʻlom koʻchatlar yetishtirish va yuqori hosildorlikka erishishda muhim omil ekani alohida taʼkidlandi.

Seminarlar jarayonida Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov soʻzga chiqib, yer va suv resurslaridan oqilona foydalanish, agrotexnik tadbirlarni toʻliq va sifatli bajarish bugungi kunning eng dolzarb vazifalaridan biri ekanini qayd etdi. U oʻz nutqida shoʻrlangan yerlarni meliorativ holatini yaxshilash, suv tejovchi texnologiyalarni keng joriy etish orqali barqaror hosildorlikka erishish mumkinligini taʼkidladi.

Shuningdek, Suv xoʻjaligi vaziri Baxtiyor Yusupov seminarda nutq soʻzlab, ichki sugʻorish tarmoqlarini betonlashtirish, qandaklarni belgilangan meʼyorlarda qazish, suv sarfini aniq hisobga olish masalalariga alohida eʼtibor qaratdi. Uning taʼkidlashicha, suvdan tejamkor va samarali foydalanish — bugungi sharoitda qishloq xoʻjaligi barqarorligining eng muhim omillaridan biridir.

Tadbirlar doirasida 2026-yil hosili uchun ekilgan gʻalla maydonlariga goʻng chiqarish, yerga yer qoʻshish, meliorativ holatni yaxshilash, ichki sugʻorish tizimlarini takomillashtirish boʻyicha amalga oshirilayotgan ishlar ham muhokama qilindi. Fermerlar bilan ochiq muloqotlar oʻtkazilib, ularning taklif va muammolari tinglandi. Mutasaddilar tomonidan amalga oshirilayotgan ishlar boʻyicha aniq tavsiyalar berilib, ilgʻor tajribalarni ommalashtirish, fermerlar bilan hamkorlikni kuchaytirish zarurligi taʼkidlandi.

Mazkur seminarlar Amudaryo tumanida 2026-yilgi qishloq xoʻjaligi mavsumiga puxta tayyorgarlik koʻrilayotganidan, sohada tizimli yondashuv va amaliy nazorat kuchaytirilayotganidan dalolat beradi. Eng muhimi, seminarlar fermerlar bilim va tajribasini oshirish, yuqori hosil olish yoʻlida muhim amaliy jarayon sifatida xizmat qilmoqda.

Charos Arslonova, tuman hokimligining Axborot xizmati rahbari.