Texnikaning sozligi – moʻl hosil garovi

Xalqimizda “Qish gʻamini yozda koʻr”, degan hikmat bejiz aytilmagan. Zero, qishloq xoʻjaligida har bir daqiqa gʻanimat, ayniqsa, bahorgi ekish mavsumi yaqinlashgani sayin dala mehnatkashlari zimmasidagi masʼuliyat ikki hissa ortadi.

Amudaryo tumanida ham ayni kularda bahorgi dala ishlariga qizgʻin hozirlik koʻrilmoqda. Ushbu jarayon Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasining Amudaryo tuman boʻlimi xodimlari tomonidan monitoring qilib borilmoqda. Maʼlumki, sifatli va oʻz vaqtida bajarilgan agrotexnik tadbirlarning muvaffaqiyati, avvalo, qishloq xoʻjaligi texnikalarining sozligiga, ularning mavsumga shayligiga bevosita bogʻliq. Shu bois, tumandagi barcha mutasaddi tashkilotlar va fermer xoʻjaliklari kuch-gʻayrati texnikalarni taʼmirlash va sozlash ishlariga safarbar etilgan. Bu jarayon ertangi kun xirmonining barakasi uchun qoʻyilayotgan mustahkam poydevordir.

Tuman boʻyicha 2026-yilgi bahorgi dala ishlari mavsumiga tayyorgarlik koʻrish maqsadida ishlab chiqilgan chora-tadbirlar rejasiga muvofiq, mavjud 16 ta ustaxonalarda keng koʻlamli taʼmirlash ishlari tashkil qilingan. Rejaga asosan, tuman boʻyicha jami 150 dona chigit ekish seyalkalari, 325 dona kultivator, 1700 dona tishli borona va 293 dona yer tekislagich molalar toʻliq taʼmirdan chiqarilishi belgilangan.

Eʼtiborli jihati shundaki, bu yilgi mavsumda texnika va agregatlarni zamonaviy agrotexnologiya talablariga moslashtirishga alohida urgʻu berilmoqda. Xususan, chigit ekish va ishlov berish texnikalarini 76 santimetrli oraliq sxemasiga oʻtkazish va moslashtirish ishlari olib borilayotgani, kelajakda gʻoʻza parvarishida qator oralariga ishlov berish sifatini oshirishga, oʻsimlikning rivojlanishi uchun qulay sharoit yaratishga xizmat qiladi. Mutaxassislarning taʼkidlashicha, ushbu sxemaning qoʻllanilishi texnikalarning daladagi harakati davomida koʻchatlarga shikast yetkazmasligini va agrotexnik tadbirlarning yuqori aniqlikda bajarilishini taʼminlaydi.

Taʼmirlash ishlarining borishi ayrim hududlarda namunali tashkil etilganini alohida qayd etish joiz. Jumladan, Oq oltin ovulidagi fermerlarning texnikalari jamlangan ustaxonada faoliyat yuritayotgan muhandis-texnik xodimlar va tajribali chilangarlarning saʼy-harakati bilan taʼmirlash ishlari jadal surʼatlarda yakuniga yetkazilmoqda.

Mazkur maskanda rejalashtirilgan texnikalardan 12 dona chigit ekish seyalkasi, 16 dona kultivator, 88 dona tishli borona hamda 16 dona temir molalar mavsumga toʻliq shay holatga keltirildi. Ushbu agregatlarning barchasi koʻrikdan oʻtkazilib, eskirgan qismlari yangisiga almashtirildi, boʻyoqlash va moylash ishlari sifatli bajarildi.

Xuddi shunday uyushqoqlikni Xolimbeg ovulida hududida ham kuzatish mumkin. Ushbu hududda ham bahorgi mavsum oldidan texnika parkini yangilash va sozlash ishlariga jiddiy eʼtibor qaratilgan. Bugungi kunga kelib, mazkur ustaxonada 9 dona chigit ekish seyalkasi, 13 dona kultivator, 72 dona tishli borona va 12 dona temir molalarni taʼmirlash ishlari toʻliq yakunlandi.

Bu kabi amaliy ishlarning zamirida birgina maqsad yotibdi: bahorning gʻanimat damlarida, tuproqda namlik saqlanib turadigan qisqa muddat ichida chigitni yerga qadash va uni parvarishlash ishlarini kechiktirmasdan amalga oshirishdir. Texnika soz boʻlsa, ishda unum, dehqonning koʻnglida xotirjamlik boʻladi. Agregatlarning, ayniqsa, borona va molalarning sozligi esa yerga sifatli ishlov berish, tuproqni mayin holatga keltirish va namlikni saqlashda muhim rol oʻynaydi.

Amudaryo tumanida olib borilayotgan bunday tizimli ishlar, texnikalarni mavsumga tayyorlash jarayonlari 2026-yilda moʻl va sifatli paxta hosili yetishtirish uchun mustahkam zamin yaratadi, deyishga toʻliq asos boʻla oladi. Zero, bugungi harakat – ertangi baraka demakdir.