Yettinchi chaqiriq Xalq deputatlari Amudaryo tuman Kengashining 18-sessiyasi toʻgʻrisida axborot

12-fevral kuni Amudaryo tumani hokimligining majlislar zalida Yettinchi chaqiriq Xalq deputatlari tuman Kengashining 18-sessiyasi boʻlib oʻtdi. Unda Kengash deputatlari, tuman hokimining oʻrinbosarlari, tegishli tashkilot va muassasalar rahbarlari hamda ommaviy axborot vositalari vakillari ishtirok etdi.

Sessiya Oʻzbekiston Respublikasi va Qoraqalpogʻiston Respublikasi Davlat madhiyalari sadolari ostida ochildi. Majlisga Xalq deputatlari Amudaryo tuman Kengashi raisi Alisher Yoʻldashev raislik qildi. Sessiya kotibligiga “24-Qangli” saylov okrugidan deputat Dilnoza Otabayeva nomzodi deputatlar tomonidan bir ovozdan maʼqullandi.

Sessiya kun tartibiga kiritilgan masalalar tumanning ijtimoiy-iqtisodiy rivojlanishi, mahallalar infratuzilmasini yaxshilash, kambagʻallikni qisqartirish, sogʻliqni saqlash tizimini takomillashtirish hamda norma ijodkorligi va huquqni qoʻllash amaliyotini yanada samarali tashkil etishga qaratildi.

Sessiyada dastlab tuman hokimining birinchi oʻrinbosari Faxriddin Yusupov hisobot berdi. Hisobotda tumanda “Yangi Oʻzbekiston” koʻrinishidagi mahallalarni shakllantirish, aholining yashashi va tadbirkorlik faoliyati bilan shugʻullanishi uchun namunali hududlarni barpo etish borasida amalga oshirilayotgan ishlar haqida maʼlumotlar berildi.

Oʻzbekiston Respublikasi Prezidentining “Alohida tuman (shahar) va mahallalarni aholining yashashi va tadbirkorlik faoliyati bilan shugʻullanishi uchun namunali hududga aylantirish chora-tadbirlari toʻgʻrisida”gi 298-son qaroriga muvofiq Amudaryo tumanida 3 ta hudud — Kuyuk koʻpir va Qilichboy ovullari hamda Qipchoq shaharchasi tanlab olingan. Mazkur hududlarda shahar muhiti va zamonaviy yashash sharoitlarini joriy etish maqsadida respublika byudjetidan 10 mlrd soʻm, mahalliy byudjetdan 5 mlrd soʻm mablagʻ ajratilishi rejalashtirilgan.

Dastur doirasida mazkur mahallalarda ichki yoʻllarni taʼmirlash, ichimlik suvi, elektr va gaz taʼminotini yaxshilash, obodonlashtirish ishlarini amalga oshirish, ijtimoiy soha obʼektlarini tartibga keltirish kabi qator tizimli chora-tadbirlar belgilangan.

Shuningdek, Prezident tashabbusi bilan amalga oshirilayotgan “Kambagʻallikdan farovonlik sari” dasturi asosida tumandagi 7 ta ogʻir toifadagi hudud — Oʻzbekiston, Qum yop, Qoramon, Yuqori qishloq, Jumurovul mahallalari, Nazarxon ovuli va Jumurtov shaharchasida kompleks chora-tadbirlar amalga oshirilishi rejalashtirilgan.

Ushbu hududlarda tomorqalarni suv bilan taʼminlash, elektr taʼminotini yaxshilash, ichki yoʻllarni asfalt va shagʻallashtirish orqali infratuzilmani mustahkamlash koʻzda tutilgan. Mazkur maqsadlar uchun respublika byudjetidan 14 mlrd soʻm va mahalliy byudjetdan 7 mlrd soʻm mablagʻ ajratish boʻyicha taklif ilgari surildi.

Sessiyada 2025-yil davomida tuman mahalliy byudjetining ijrosi ham koʻrib chiqildi. Hisobotda byudjet mablagʻlarining maqsadli sarflanishi, ijtimoiy soha obʼektlarini moliyalashtirish, infratuzilma loyihalarini qoʻllab-quvvatlash va aholi farovonligini oshirishga qaratilgan xarajatlar yuzasidan batafsil maʼlumotlar berildi.

Kun tartibidagi navbatdagi masala yuzasidan tuman Adliya boʻlimining Inson huquqlarini himoya qilish va huquqni qoʻllash amaliyotini oʻrganish boʻyicha bosh maslahatchisi Suhrob Haytboyev hisobot berdi.

Qayd etilishicha, 2025-yil davomida boʻlimga jami 142 ta murojaat kelib tushgan boʻlib, shundan 139 tasi ariza va 3 tasi shikoyatni tashkil etgan. Kelib tushgan murojaatlarning 141 tasi koʻrib chiqilib, 40 tasi qanoatlantirilgan, 101 tasiga huquqiy tushuntirish berilgan. Shuningdek, yil davomida 142 nafar fuqaro bevosita shaxsiy qabulda qabul qilinib, ularning murojaatlari belgilangan tartibda hal etilgan.

Hisobotda tumanda norma ijodkorligi faoliyatini takomillashtirish, huquqni qoʻllash amaliyotini izchil yoʻlga qoʻyish, aholining huquqiy ongi va madaniyatini oshirish borasida amalga oshirilgan targʻibot ishlari ham alohida taʼkidlandi.

Sessiyada mahallalar kesimida oyma-oy maqsadli koʻrsatkichlarni tasdiqlash masalasi ham muhokama qilindi. Mazkur masala yuzasidan tuman kambagʻallikni qisqartirish va bandlikka koʻmaklashish boʻlimi boshligʻi Ruslan Narimbetov hisobot berdi. Hisobotda aholini doimiy ish bilan taʼminlash, oilaviy tadbirkorlikni rivojlantirish, subsidiya va imtiyozli kreditlar ajratish orqali daromad manbalarini kengaytirish boʻyicha koʻrilayotgan choralar haqida maʼlumot berildi.

Axborotda taʼkidlanganidek, 2026-yilda tumanda kambagʻallik darajasini 3,2 foizgacha va ishsizlik darajasini 4,7 foizgacha pasaytirish, 4 887 nafar aholini doimiy ish oʻrinlariga joylashtirish hamda 16 ming 500 nafar aholi daromadini oshirish, 1 472 ta kambagʻal oilalarda yashovchi 6,5 ming nafar aholini ularning daromadini oshirishga qaratilgan xizmatlar bilan qamrab olish, shuningdek, kambagʻallik va ishsizlikdan xoli mahallalar sonini 3 taga yetkazish maqsad qilingan. Bundan tashqari, joriy yil davomida 5 039 nafar norasmiy ish oʻrinlarini legallashtirish va 701 nafar mutaxassisni mehnat bozorida talab yuqori boʻlgan kasblarga oʻqitish reja qilingan.

Sessiyada Amudaryo tumanida sogʻliqni saqlashni rivojlantirishga oid davlat dasturlarining bajarilishi, kasalliklar profilaktikasi, sogʻlom turmush tarzini shakllantirish hamda shoshilinch tibbiy yordam xizmatini takomillashtirish boʻyicha loyiha kontseptsiyasini kelishish masalasi ham koʻrib chiqildi. Mazkur masala yuzasidan tuman tibbiyot birlashmasi boshligʻi Shuhrat Jumaniyazov hisobot berdi.

Hisobotga koʻra, 2024-yilda tumanda 4 589 nafar, 2025-yilda esa 4 244 nafar chaqaloq tugʻilgan.

2025-yilda jami 887 nafar fuqaro vafot etgan. Shundan 18 yoshgacha boʻlgan bolalar oʻlimi 92 nafarni tashkil etgan. 2025-yil davomida 1 yoshgacha boʻlgan bolalar oʻlimi 70 nafarni tashkil etib, har 1000 tirik tugʻilgan chaqaloqqa nisbatan intensiv koʻrsatkich 16,5 ni tashkil qilgan.

Sessiya kun tartibiga kiritilgan barcha masalalar deputatlar tomonidan atroflicha muhokama qilinib, bildirilgan taklif va mulohazalar inobatga olingan holda tegishli qarorlar qabul qilindi. Qabul qilingan qarorlar tumanni kompleks rivojlantirish, mahallalar infratuzilmasini yaxshilash, aholi bandligi va farovonligini oshirish, shuningdek, ijtimoiy sohalarda samaradorlikni taʼminlashga xizmat qilishi taʼkidlandi.

Tuman hokimligining Axborot xizmati