SALOHIYaTLI YoShLAR KAMOL TOPAYoTGAN DARGOH

Bugungi kunda taʼlim tizimida amalga oshirilayotgan islohotlar har bir maktab faoliyatida oʻz ifodasini topmoqda. Zamonaviy bilim berish, yosh avlodni maʼnaviy va jismoniy barkamol etib tarbiyalash, ularni zamon talablariga mos kadrlar sifatida shakllantirish — bugungi kunning ustuvor vazifalaridandir. Amudaryo tumanidagi 19-sonli maktab jamoasi ham ana shu missiyani sharaf bilan ado etib kelmoqda.

Mazkur maktabning hozirgi binosi 1970-yilda qurila boshlagan boʻlib, 1971-yilda 400-oʻringa moʻljallab foydalanishga topshirilgan. Bugungi kunda esa bu yerda 780 nafar oʻquvchi taʼlim-tarbiya olmoqda. Taʼlim jarayoniga 65 nafar pedagog jalb etilgani maktab jamoasining salohiyati yuqori ekanini koʻrsatadi.

Pedagoglar tarkibi sifat jihatidan ham diqqatga sazovor: 10 nafar oliy toifali, 21 nafar 1-toifali, 14 nafar 2-toifali hamda 23 nafar mutaxassis oʻqituvchilar faoliyat yuritmoqda. Shuningdek, 10 nafar oʻqituvchi milliy va xalqaro sertifikatlarga ega. Ingliz tili fani oʻqituvchisi Ayapbergan Qudaybergenovning Maktabgacha va maktab taʼlimi vaziri jamgʻarmasi hisobidan ish haqiga 70 foiz ustama olayotgani esa yuqori malaka va samarali mehnatning munosib baholanayotganidan dalolat beradi. Maktab oʻquvchilaridan 12 nafarida milliy sertifikatlar mavjudligi taʼlim sifati natijalarda oʻz aksini topayotganini koʻrsatadi.

Har qanday yutuq zamirida mustahkam boshqaruv va tizimli mehnat faoliyati yotadi. Maktab rahbariyati deyarli har uni ertalab direktor huzurida yigʻilib, kun tartibidagi masalalarni muhokama qiladi. Maktab direktori Nodira Tajimuratova hafta davomidagi yutuq va kamchiliklarni tahlil qilib, navbatdagi vazifalar yuzasidan aniq rejalar belgilab oladi va tegishli masʼullarga topshiriqlar beradi.

Maktab jamoasining ilmiy yoʻnalishdagi yutuqlari nihoyatda salmoqli. Maktab oʻquvchisi Jahongir Saʼdullayev fan olimpiadasida tumanda faxrli 1-oʻrinni egalladi. Joriy yilda Markaziy Osiyo davlatlari oʻrtasida oʻtkazilgan Arximed xalqaro olimpiadasida 6-sinf oʻquvchisi Bunyodbek Gulmirzayev saralash bosqichida oltin, finalda esa kumush medalni qoʻlga kiritdi. U boshqa xalqaro olimpiadalarda ham yuqori natijalarga erishib kelmoqda. Yosh matematikning muvaffaqiyatlarida ustozi, tajribali matematika fani oʻqituvchisi Zulfiya Matkarimovaning mehnati beqiyosdir.

Oʻquvchilar nafaqat taʼlimda, balki mahalliy va xalqaro miqyosdagi sport musobaqalarida ham munosib ishtirok etmoqda. Jumladan, 2025-yil oktyabr oyida sportning taykvando yoʻnalishida 11-sinf oʻquvchisi Gulbonu Oʻrinboyeva Oʻzbekiston chempioni boʻldi. Bu natija maktabda jismoniy tarbiya va sportga berilayotgan eʼtibor samarasidir.

Taʼlim maskanida oʻquvchilarga faqat bilim berish bilan cheklanilmasdan, kasbga yoʻnaltirish ishlariga ham alohida eʼtibor qaratiladi. Qoraqalpogʻiston Respublikasi Maktabgacha va maktab taʼlimi vazirligining 2025-yil 1-iyuldagi 220-sonli buyrugʻi ijrosini taʼminlash maqsadida maktabda kasbiy rivojlantirish soatlari sifatli tashkil etilgan. Bu soatlarni ingliz tili fani oʻqituvchisi Ayapbergan Qudaybergenov olib borib, oʻquvchilarga chuqur bilim berishga va ularni kelajak uchun foydali boʻlgan kasblarga yoʻnaltirishga alohida eʼtibor qaratmoqda.

Maktabda fan va kasb toʻgaraklari ham samarali yoʻlga qoʻyilgan. Texnologiya fani oʻqituvchisi Saparboy Tangirbergenov rahbarligidagi “Mohir qoʻllar” toʻgaragida oʻquvchi qizlar bichish-tikish va munchoq tikish boʻyicha amaliy koʻnikmalarga ega boʻlmoqda.

Oʻquv ishlari boʻyicha direktor oʻrinbosari Rustam Oʻtamuratov, tarix fani oʻqituvchisi Baxram Saparboyev va matematika fani oʻqituvchisi Zulfiya Matkarimova tomonidan oʻtilayotgan qiziqarli darslar oʻquvchilarning bilim darajasini yanada yuksaltirishga xizmat qilmoqda.

Maktabda darslar oʻzbek va qozoq tillarida olib boriladi. Bu esa koʻp millatli jamiyatda taʼlim olish imkoniyatlarini kengaytiradi. Yosh va tajribali boshlangʻich sinf oʻqituvchisi Mahfuza Oʻpayeva qozoq sinfida bolajonlarga mehr va fidoyilik bilan dars berib, ularni bilim olamiga yetaklamoqda.

Maktab kutubxonasida 1140 ta badiiy kitob va 20 mingdan ortiq darslik mavjud. Oʻqituvchi va oʻquvchilar boʻsh vaqtlarida kerakli adabiyotlarni mutolaa qilib, bilim doirasini kengaytirmoqda.

Maktab psixologi Gulshod Xoʻjanafasova oʻquvchilar bilan muntazam treninglar oʻtkazib, ularni qiziqishlariga qarab kasb tanlashga yoʻnaltirmoqda. Tarbiyasida oʻzgarish kuzatilayotgan oʻquvchilar bilan yakka tartibda suhbatlar oʻtkazilib, kerakli tavsiyalar berib borilishi taʼlim-tarbiya jarayonining muhim qismiga aylangan.

Maktabga biriktirilgan inspektor-psixolog Gʻiyosjon Kenjaboyev, maʼnaviy-maʼrifiy ishlar boʻyicha direktor oʻrinbosari Kunduz Kazakova va maktab psixologi Gulshod Xoʻjanafasova maktabda ertalabki reyd tashkil etib, oʻquvchilarning darsliklarni toʻliq olib kelishi, sumkalarida tigʻli buyumlar mavjud yoki yoʻqligini koʻzdan kechiradi. Bunday tadbirlar maktabda xavfsiz muhit yaratish va intizomni mustahkamlashda muhim ahamiyat kasb etadi.

Shuningdek, taʼlim maskanida turli sanalar munosabati bilan bayram tadbirlari, adabiy-badiiy kechalar tez-tez oʻtkaziladi. Ona tili fani oʻqituvchisi Nafisa Abdullayeva tomonidan 14-fevral — Zahiriddin Muhammad Bobur tavallud kuniga bagʻishlab oʻtkazilgan tadbir ham shular jumlasidandir. Mazkur tadbirda oʻquvchilar faol ishtirok etib, Boburning hayot va ijod yoʻli, asarlari haqidagi bilimlarini yanada mustahkamladilar.

Kuyuk koʻpir ovulidagi 19-sonli umumtaʼlim maktabi oʻzining koʻp yillik tarixi, malakali pedagoglari, oʻquvchilarning yuqori natijalari va pedagoglar jamoasining hamjihatligi bilan namuna boʻla oladigan taʼlim muassasalaridan biridir. Bunday maskanlarda tarbiya topayotgan yoshlar kelajakda yurt ravnaqiga munosib hissa qoʻshadigan malakali kadrlar boʻlib yetishishi shubhasiz.