Voyaga yetmagan qizlar taʼlim-tarbiyasi — ustuvor vazifa

Amudaryo tumani Madaniyat boʻlimida voyaga yetmagan qizlarning taʼlim-tarbiyasi, ularning huquq va manfaatlarini himoya qilish, erta nikoh va huquqbuzarliklarning oldini olish masalalariga bagʻishlangan muhim yigʻilish boʻlib oʻtdi. Tadbir hududlarda olib borilayotgan maʼnaviy-maʼrifiy ishlar samaradorligini oshirish hamda mutasaddi tashkilotlar oʻrtasidagi hamkorlikni mustahkamlash maqsadida tashkil etildi.

Yigʻilishda Qoraqalpogʻiston Respublikasi Vazirlar Kengashi Raisi oʻrinbosari, Oila va xotin-qizlar qoʻmitasi raisi Maryam Ahmedova, Maktabgacha va maktab taʼlimi vaziri vazifasini bajaruvchi Muhabbat Shlimbetova, Ichki ishlar vazirligi Jamoat xavfsizligi xizmati huquqbuzarliklar profilaktikasi boʻlinmasi boshligʻi oʻrinbosari Xurzada Reimova, shuningdek, Amudaryo tumani hokimi oʻrinbosarlari, tegishli tashkilot va idora rahbarlari, umumtaʼlim maktablari direktorlari hamda mahalla xotin-qizlar faollari ishtirok etdi.

Yigʻilishni ochib bergan Vazirlar Kengashi Raisi oʻrinbosari Maryam Ahmedova soʻnggi yillarda xotin-qizlarni qoʻllab-quvvatlash, ularning taʼlim olishi va jamiyatdagi faolligini oshirish borasida amalga oshirilayotgan keng koʻlamli islohotlarga toʻxtaldi. U voyaga yetmagan qizlar tarbiyasi nafaqat oila, balki butun jamiyatning masʼuliyati ekanini alohida taʼkidladi.

Qizlarimizning bilimli, mustaqil fikrlaydigan, oʻz huquqlarini biladigan shaxs boʻlib voyaga yetishi — ertangi taraqqiyotimiz poydevori ekanligini, shu bois mahalla, maktab va ota-onalar hamkorligini yanada kuchaytirish zarurligini qayd etdi.

Maktabgacha va maktab taʼlimi vaziri vazifasini bajaruvchi Muhabbat Shlimbetova oʻz soʻzida maktablarda maʼnaviy-maʼrifiy muhitni sogʻlomlashtirish, psixologik xizmat samaradorligini oshirish, darsdan tashqari toʻgaraklar faoliyatini kengaytirish masalalariga eʼtibor qaratdi. Ayniqsa, ijtimoiy himoyaga muhtoj oilalardagi qizlar bilan individual ishlash tizimini kuchaytirish zarurligi taʼkidlandi.

U har bir maktab direktori va sinf rahbari qizlarning davomati, darsdagi faolligi va oilaviy sharoiti boʻyicha muntazam monitoring olib borishi lozimligini qayd etdi. Taʼlim sifati bilan bir qatorda, tarbiya masalasi ham ustuvor yoʻnalish boʻlib qolishi kerakligi taʼkidladi.

Shuningdek, Ichki ishlar vazirligi boʻlim boshligʻi oʻrinbosari Xurzada Reimova esa voyaga yetmaganlar oʻrtasida sodir etilayotgan huquqbuzarliklar, erta nikoh va zoʻravonlik holatlarining oldini olish borasida amalga oshirilayotgan profilaktik chora-tadbirlar haqida maʼlumot berdi. U ichki ishlar organlari tomonidan maktablar va mahallalarda profilaktik suhbatlar, huquqiy targʻibot tadbirlari muntazam oʻtkazilayotganini taʼkidladi.

Shuningdek, qizlarni turli zararli oqimlar va salbiy taʼsirlardan himoya qilishda ota-onalarning hushyorligi va masʼuliyati muhim oʻrin tutishi alohida qayd etildi.

Yigʻilish davomida tuman hokimi oʻrinbosarlari soʻzga chiqib, joylarda olib borilayotgan ishlar, mavjud muammolar va ularni bartaraf etish boʻyicha takliflarni bildirdi. Ayrim hududlarda qizlarning maktabdan keyingi boʻsh vaqtini mazmunli tashkil etish, kasb-hunarga yoʻnaltirish, sport va sanʼat toʻgaraklariga jalb qilish boʻyicha qoʻshimcha choralar koʻrish lozimligi taʼkidlandi.

Kun tartibidagi masala yuzasidan tuman masʼullariga bir qator aniq topshiriqlar berildi. Jumladan, maktablarda qizlar bilan ishlash boʻyicha alohida “yoʻl xaritasi” ishlab chiqish, ijtimoiy xavf guruhiga kiruvchi oilalar bilan manzilli ishlash, huquqiy savodxonlikni oshirishga qaratilgan targʻibot tadbirlarini kuchaytirish, mahalla va taʼlim muassasalari oʻrtasida hamkorlikni tizimli yoʻlga qoʻyish lozimligi qayd etildi.

Mazkur yigʻilish voyaga yetmagan qizlar taʼlim-tarbiyasi masalasi doimo eʼtibor markazida ekanini yana bir bor tasdiqladi. Qizlarimizning baxtli, sogʻlom va bilimli boʻlib ulgʻayishi — jamiyat barqarorligi va taraqqiyotining muhim omilidir.

Charos Arslonova, tuman hokimligining Axborot xizmati rahbari.