Ijtimoiy himoya masalalariga bagʻishlangan seminar oʻtkazildi

Amudaryo tumani Madaniyat boʻlimi binosida ijtimoiy himoya yagona reyestriga kiritilgan oilalarga davlat tomonidan taqdim etilayotgan imtiyozlar, yengilliklar va turli xildagi moddiy hamda ijtimoiy yordamlar haqida batafsil maʼlumot berish maqsadida seminar-trening tashkil etildi.

Seminarda ushbu maqsadda tuzilgan respublika ishchi guruhi aʼzolari, Amudaryo tumani hokimi oʻrinbosarlari, tegishli vazirlik va idoralarning tumandagi boʻlinmalari rahbarlari, ijtimoiy himoya, mehnat va aholi bandligi boʻlimlari masʼullari, mahallalarda faoliyat yuritayotgan hokim yordamchilari hamda ijtimoiy himoyaga muhtoj oilalar vakillari ishtirok etdi.

Tadbir davomida ijtimoiy himoya yagona reyestriga kiritilgan fuqarolar uchun davlat tomonidan yaratilgan imkoniyatlar batafsil tushuntirildi. Jumladan, kam taʼminlangan oilalarga bir martalik moddiy yordam, oylik nafaqalar, bolalar uchun qoʻshimcha toʻlovlar, kommunal xizmatlar uchun subsidiyalar, uy-joy sharoitlarini yaxshilashga qaratilgan imtiyozlar, taʼlim va tibbiy xizmatlardagi yengilliklar, shuningdek, ish bilan taʼminlash va kasb-hunar oʻrgatish dasturlari haqida keng turda maʼlumotlar berildi.

Mutaxassislar tomonidan har bir yordam turining qonunchilik asosi, undan foydalanish shartlari, kerakli hujjatlar roʻyxati, murojaat qilish tartibi va muddatlari aniq misollar bilan tushintirib berildi. Bu maʼlumotlar aholi oʻrtasida uchraydigan va mavjud tizimdan xabardorlikning yetishmasligi natijasida kelib chiqadigan notoʻgʻri tushunchalarni bartaraf etishga xizmat qiladi.

Alohida taʼkidlanganidek, ijtimoiy himoya tizimining asosiy maqsadi – nafaqat moddiy qiyinchilikdagi oilalarga vaqtinchalik yordam berish, balki ularning oʻzini oʻzi taʼminlash qobiliyatini oshirish, ijtimoiy faolligini kuchaytirish va kambagʻallikdan chiqishiga doimiy yoʻl yaratishdan iborat. Shu boisdan, seminarda faqat mavjud imtiyozlar haqida emas, balki ulardan samarali foydalanish, murojaatlarni toʻgʻri rasmiylashtirish haqida ham batafsil maʼlumotlar berildi.

Tadbirning yana bir muhim qismi mahallalarda faoliyat yuritayotgan hokim yordamchilarining bu jarayonlardagi ishtirokiga bagʻishlandi. Hokim yordamchilari ijtimoiy himoyaga muhtoj oilalarni aniqlash, ularning hayotiy muammolarini oʻrganish, roʻyxatga kiritish uchun hujjatlarni tayyorlash va tegishli idoralar bilan hamkorlikda manzilli yordam koʻrsatishda asosiy kuch sanaladi. Hokim yordamchilariga reyestrga kiritish jarayonlarining yangi tartibi, maʼlumotlarning toʻgʻriligini tekshirish, aholi bilan muloqot qilish usullari va ijtimoiy himoya dasturlarining samaradorligini oshirish boʻyicha qoʻshimcha koʻrsatmalar berildi. Bu yoʻnalishdagi ishlarning sifati va shaffofligi aholining davlatga boʻlgan ishonchini oshirishda muhim ahamiyat kasb etishi taʼkidlandi.

Seminar-trening davomida ishtirokchilar tomonidan koʻplab savollar berildi va ularga mutaxassislar tomonidan aniq, amaliy javoblar qaytarildi. Bu tadbir nafaqat maʼlumot tarqatish, balki aholi va mahalliy idoralar oʻrtasidagi muloqotni kuchaytirish, tizimning shaffofligini taʼminlash va ijtimoiy himoya sohasidagi islohotlarning amaliy natijalarini koʻrsatishga xizmat qildi.

Natijada yigʻilish ishtirokchilari davlat tomonidan koʻrsatilayotgan yordamlar haqida toʻliqroq tasavvurga ega boʻldi. Bu kabi tushuntirish ishlarining izchil davom ettirilishi kelgusida aholining ijtimoiy himoya tizimidan foydalanish darajasini oshirib, kam taʼminlangan oilalarning turmush darajasini yanada yaxshilashga hissa qoʻshadi. Zero, davlatning ijtimoiy siyosatdan asosiy maqsadi ham har bir fuqaroning farovonligi va adolatli yordam tizimining samarali ishlashini taʼminlashdir.