Amudaryo tumanida 8-mart — Xalqaro xotin-qizlar kuni munosabati bilan tantanali bayram tadbiri oʻtkazildi

Insoniyat tarixi davomida ayolni eʼzozlash, unga hurmat va ehtirom koʻrsatish turli madaniyatlar, dinlar va jamiyatlarda oʻziga xos shakllarda namoyon boʻlgan. Qadimgi davrlardanoq ayol hayot manbai, oila poydevori va jamiyatning maʼnaviy-axloqiy ustuni sifatida qadrlangan. Dunyoning koʻplab madaniyatlarida ayolning mehri va sabr-toqati yuksak eʼtirof etilgan. Zamonaviy insoniyat esa bu qadriyatlarni huquqiy va ijtimoiy tenglikka asoslangan holda rivojlantirmoqda: ayolning taʼlim olish, mehnat qilish, siyosiy faoliyatda ishtirok etish va oʻzini oʻzi roʻyobga chiqarish huquqlarini himoya qilish global miqyosda muhim masalaga aylangan.

Shu sababli ham 8-mart dunyoning koʻplab mamlakatlarida ayollarning ijtimoiy, iqtisodiy, siyosiy va madaniy yutuqlarini ulugʻlash, gender tenglikni taʼminlash va kamsitishlarga qarshi kurash kuni, Xalqaro xotin-qizlar bayrami sifatida keng nishonlanadi.

Amudaryo tumanida ham mazkur sana munosabati bilan tantanali bayram tadbiri oʻtkazildi. Tuman Madaniyat boʻlimi binosida tashkil etilgan ushbu tadbir turli sohalarda samarali mehnat qilib kelayotgan faol xotin-qizlar, keng jamoatchilik vakillari, nuroniy onaxonlar hamda tuman aholisining keng qatlami ishtirok etdi. Bayram tadbiri xotin-qizlarning jamiyatdagi munosib oʻrnini yana bir bor eʼtirof etish, ularning mehnati, fidoyiligi va oilaviy-ijtimoiy hayotdagi beqiyos rolini yuksak qadrlash maqsadida oʻtkazildi.

Tadbirni tuman hokimi oʻrinbosari Nodirbek Kamolov ochib berdi. U oʻz tabrigida barcha xotin-qizlarni ushbu qutlugʻ bayram bilan samimiy muborakbod etdi. Tadbirda oʻz olganlar xotin-qizlarning jamiyat hayotidagi oʻrni beqiyos ekanini, ular oilada mehr-muhabbat va tarbiya manbai, jamiyatda esa fidoyi, tashabbuskor va masʼuliyatli kuch sifatida barcha sohalarda oʻz oʻrniga ega ekanini taʼkidladilar.

Chindan ham, bugun yurtimizda xotin-qizlar taʼlim, tibbiyot, madaniyat, iqtisodiyot, tadbirkorlik, qishloq xoʻjaligi va boshqa koʻplab sohalarda erkaklar bilan teng ravishda faoliyat yuritib, mamlakat taraqqiyotiga munosib hissa qoʻshib kelmoqda. Shu bilan birga, ularning oilaviy qadriyatlarni mustahkamlash, farzandlarni vatanparvarlik va insonparvarlik ruhida tarbiyalashdagi roli ham alohida eʼtirofga sazovordir.

Tadbirda davlat va nodavlat tashkilotlarida, xususiy biznes sohasida samarali mehnat qilib kelayotgan bir guruh faol xotin-qizlar bayram munosabati bilan taqdirlandi. Mehnatsevarligi, tashabbuskorligi va fidoyiligi bilan atrofdagilarga oʻrnak boʻlib kelayotgan ayol-qizlarga tuman hokimi nomidan tashakkurnomalar va esdalik sovgʻalari tantanali ravishda topshirildi. Bu kabi hurmat va ehtirom nafaqat ularning shaxsiy yutuqlarini eʼtirof etish, balki butun tumandagi xotin-qizlar mehnatiga yuksak eʼtiborning yorqin ifodasi boʻldi. Taqdirlanganlar orasida oʻqituvchilar, shifokorlar, madaniyat va sanʼat xodimlari, tadbirkor ayollar, mahalla faollari va boshqa soha vakillari bor edi. Ularning har biri oʻz sohasida koʻp yillik samarali faoliyati bilan jamiyat rivojiga hissa qoʻshib kelayotgani alohida qayd etildi.

Tadbirda ishtirok etgan barcha xotin-qizlarga bayram munosabati bilan esdalik sovgʻalari topshirildi. Har bir ishtirokchi oʻzini eʼzozli va qadrli his qildi, bayram tashkilotchilari ularga samimiy tilaklar – sogʻlik-salomatlik, baxt-saodat, oilaviy xotirjamlik, mehnatda muvaffaqiyatlar va hayotda har doim gullab-yashnashdek baxt-saodat tilab, samimiy minnatdorlik izhor etdilar.

Chindan ham, yurtimizda xotin-qizlarning huquq va manfaatini taʼminlash, muammolarini hal qilish boʻyicha mutlaqo yangi tizim yaratilgani bugun oʻzining ijobiy samarasini bermoqda. Yaratilgan keng imkoniyat va sharoitlar hisobiga mamlakatimiz boʻylab 230 mingga yaqin tadbirkor ayollar sinfi shakllandi, mirishkor fermer ayollarimiz 12 ming nafardan oshdi. Ilm-fan rivojiga ulkan hissa qoʻshayotgan olimalarimiz 6 ming nafardan oshdi.

Sana munosabati bilan tuman Madaniyat boʻlimi ijodkorlari tomonidan tayyorlangan kontsert dasturida bahor, goʻzallik, ona, ayol va muhabbat mavzularini tarannum etuvchi kuy-qoʻshiqlar, jozibali raqslar, qiziqarli sahna koʻrinishlari namoyish etildi. Sanʼatkorlarning ijrosidagi milliy qoʻshiqlar, zamonaviy estrada kuylari va lirik raqslar yigʻilganlarning qalbida bayramona kayfiyat uygʻotdi. Kontsert dasturi xotin-qizlarning goʻzalligi, mehri va hayotga boʻlgan muhabbatini yana bir bor ulugʻladi, ularga oʻziga xos ruhiy koʻtarinkilik bagʻishladi.

Ushbu bayram tadbiri Amudaryo tumanida xotin-qizlarga boʻlgan eʼtibor va gʻamxoʻrlikning yana bir yorqin namunasi boʻldi. U nafaqat bayramni nishonlash, balki ayollarning jamiyatdagi rolini yuksaltirish, ularning mehnatini qadrlash va kelgusida ham samarali faoliyat yuritishga ruhlantirishdek ulugʻvor maqsadlarga xizmat qilgani bilan ahamiyatli boʻldi. Tadbir orqali xotin-qizlarning davlat va jamiyat hayotidagi, oiladagi oʻrni va ahamiyati yana bir bor eʼtirof etilib, jamiyatdagi birdamlik, mehr-muhabbat va oʻzaro hurmat muhitini mustahkamlashda ularning oʻrni beqiyos ekani taʼkidlandi.

Fursatdan foydalanib, aziz va moʻʼtabar ayollarni, muhtarama onalar, qadrli opa-singillar va dilbar qizlarni bahor nafasi bilan kirib kelgan goʻzal ayyom — 8-mart — Xalqaro xotin-qizlar kuni bilan samimiy muborakbod etamiz!

Ushbu qutlugʻ bayram munosabati bilan barchangizga mustahkam sogʻlik, oilaviy baxt-saodat, qalbingizga xotirjamlik, ezgu ishlaringizga omad va muvaffaqiyatlar yor boʻlishini tilaymiz. Xonadoningizdan fayz-baraka, yuzingizdan tabassum, qalbingizdan mehr-muhabbat aslo arimasin, aziz ayollar!