Amudaryoda “Yoshlar kuni” doirasida uchrashuvlar oʻtkazildi

Yurtimizda yoshlar masalasi davlat siyosatining eng ustuvor yoʻnalishlaridan biri sifatida qaralmoqda. Zero, har bir davlatning ertangi kuni, taraqqiyoti va farovonligi aynan yosh avlodning bilimli, salohiyatli va vatanparvar boʻlib voyaga yetishiga bogʻliq. Shu bois mamlakatimizda yoshlarning har tomonlama rivojlanishi, taʼlim olishi, kasb-hunar egallashi, bandligini taʼminlash hamda boʻsh vaqtini mazmunli tashkil etish borasida keng koʻlamli ishlar amalga oshirilmoqda.

Oʻzbekiston Respublikasi Prezidentining joriy yil 24-fevral kuni yoshlar bilan oʻtkazgan uchrashuvi davomida ham bu masalalarga alohida eʼtibor qaratilib, yoshlar bilan ishlash tizimini yangi bosqichga olib chiqishga qaratilgan muhim vazifalar belgilab berildi. Mazkur uchrashuvda ilgari surilgan tashabbuslardan biri sifatida endilikda har payshanba kuni “Yoshlar kuni” deb eʼlon qilindi. Bu esa joylarda yoshlarning muammolarini oʻrganish, ularning taklif va tashabbuslarini qoʻllab-quvvatlash hamda iqtidor va qobiliyatini roʻyobga chiqarish uchun muhim imkoniyat yaratmoqda.

Mazkur tashabbus ijrosi doirasida 5-mart kuni Amudaryo tumani hokimi Sobir Xoʻjametov boshchiligidagi tuman rahbarlari Qipchoq shaharchasi hududida joylashgan 1-son texnikum faoliyati bilan yaqindan tanishdi. Tashrif davomida taʼlim maskanida olib borilayotgan oʻquv jarayonlari, oʻquvchilar uchun yaratilgan shart-sharoitlar, zamonaviy kasb-hunarlarni oʻrgatish boʻyicha amalga oshirilayotgan ishlar hamda yoshlarning qiziqishlari asosida tashkil etilgan turli toʻgaraklar faoliyati oʻrganildi.

Texnikumda yoshlarning nazariy bilimlarini amaliy koʻnikmalar bilan mustahkamlashga alohida eʼtibor qaratilayotgani, oʻquvchilarga zamonaviy kasb-hunarlarni puxta egallashlari uchun zarur sharoitlar yaratilgani alohida qayd etildi. Shuningdek, yoshlarning boʻsh vaqtini mazmunli tashkil etish maqsadida yoʻlga qoʻyilgan sport toʻgaraklari faoliyati ham koʻzdan kechirildi.

Xususan, voleybol hamda milliy kurash toʻgaraklari mashgʻulotlari bilan tanishish jarayonida yoshlarning sportga boʻlgan qiziqishi, ularning jismoniy salomatligini mustahkamlash, sogʻlom turmush tarzini targʻib qilish borasida amalga oshirilayotgan ishlar eʼtirof etildi. Sport bilan muntazam shugʻullanish yoshlarning nafaqat jismonan chiniqishi, balki irodasi va intilishlarini mustahkamlashda ham muhim omil ekani taʼkidlandi.

Shuningdek, tashrif davomida hududdagi 21-sonli bolalar musiqa va sanʼat maktabida yoshlar bilan ochiq muloqot tashkil etildi. Uchrashuv avvalida maktabda taʼlim olayotgan iqtidorli yoshlarning ijodiy ishlari va sanʼat namunalari namoyish etildi.

Yosh ijodkorlar tomonidan ijro etilgan betakror kuy-qoʻshiqlar, milliy cholgʻu asboblarida ijro etilgan musiqiy kompozitsiyalar hamda yosh rassomlarning rang-barang ijod namunalari yigʻilganlarda katta taassurot qoldirdi. Yoshlarning sanʼatga boʻlgan qiziqishi, ularning isteʼdodi va ijodiy salohiyati barchani quvontirdi.

Shundan soʻng yoshlar bilan samimiy muloqot tashkil etilib, ularning fikr-mulohazalari, taklif va tashabbuslari tinglandi. Uchrashuv davomida yoshlar tomonidan bandlikni taʼminlash, tadbirkorlik faoliyatini yoʻlga qoʻyish, imtiyozli kreditlardan foydalanish, yer maydonlari ajratish hamda kasb-hunar oʻrganish imkoniyatlarini kengaytirish kabi masalalar yuzasidan qator murojaat va takliflar bildirildi.

Masʼul rahbarlar tomonidan har bir murojaat alohida koʻrib chiqilib, mavjud muammolarni hal etish yuzasidan tegishli tashkilotlar bilan hamkorlikda amaliy choralar koʻrilishi taʼkidlandi. Ayrim masalalar joyida hal etilib, qolgan murojaatlar ijrosi boʻyicha mutasaddilarga aniq vazifalar belgilab berildi.

Bugungi kunda yoshlarning bilimli, tashabbuskor va faol boʻlib voyaga yetishi mamlakatimiz taraqqiyotining muhim omillaridan biri hisoblanadi. Shu bois joylarda yoshlar bilan ochiq muloqotlar oʻtkazish, ularning muammo va takliflarini oʻrganish hamda har tomonlama qoʻllab-quvvatlash dolzarb vazifa boʻlib qolmoqda.

Amudaryo tumanida tashkil etilayotgan bunday uchrashuv va tadbirlar yoshlarning orzu-intilishlarini roʻyobga chiqarish, ularning jamiyat hayotidagi faolligini oshirish hamda kelajakda yetuk mutaxassis, vatanparvar insonlar boʻlib yetishishiga xizmat qiladi.

Taʼkidlash joizki, bu kabi uchrashuv va ochiq muloqotlar tumanning boshqa mahallalarida ham izchil davom ettiriladi. Bu esa yoshlarning muammolarini oʻz vaqtida hal etish, ularning tashabbuslarini qoʻllab-quvvatlash hamda har bir yoshning jamiyatda munosib oʻrin egallashiga zamin yaratadi.

Charos Arslonova, tuman hokimligining Axborot xizmati rahbari.