Qishloq xoʻjaligidagi islohotlariga bagʻishlangan seminar boʻlib oʻtdi

Yer — bebaho boylik, rizq-roʻzimiz manbai va kelajak avlodlarga qoldiriladigan eng katta merosdir. Bu boylikdan unumli foydalanish, uning har bir qarichidan samarali hosil olish va mavjud resurslarni ilmiy asoslangan holda boshqarish bugungi davrning eng dolzarb vazifalaridan biriga aylangan.

Oʻzbekiston qishloq xoʻjaligida amalga oshirilayotgan izchil islohotlar, eng avvalo, yerdan foydalanish madaniyatini yuksaltirish va sohaga zamonaviy texnologiyalarni joriy etishga qaratilgani bilan ahamiyatlidir. Ana shunday ezgu maqsadlar ijrosini taʼminlash maqsadida Amudaryo tumanida koʻrgazmali-amaliy seminar oʻtkazildi. Ushbu tadbir Oʻzbekiston Respublikasi Prezidentining 2024-yil 30-dekabrdagi qarorida belgilangan vazifalar ijrosini taʼminlash, shuningdek, qishloq xoʻjaligi maydonlaridagi qoʻshimcha imkoniyatlarni ishga solishga qaratilgan muhim qadam boʻldi.

Seminarda ishchi guruh aʼzolari, agroklasterlar rahbarlari, fermer va dehqon xoʻjaliklari vakillari, tomorqa yer egalari hamda soha mutaxassislari ishtirok etdi. Asosiy eʼtibor ushbu yoʻnalish boʻyicha qabul qilingan Prezident qarorlarining mazmun-mohiyatini keng jamoatchilikka tushuntirishga qaratildi. Zero, davlatimiz rahbari tomonidan imzolangan ushbu hujjatlar zamirida yerdan oqilona foydalanish orqali xalqimiz farovonligini oshirish, oziq-ovqat xavfsizligini taʼminlash va eksport salohiyatini yangi bosqichga olib chiqishdek ulugʻvor maqsadlar mujassam.

Tadbir davomida alohida taʼkidlanganidek, endilikda faqat asosiy ekin maydonlari bilan cheklanib qolmasdan, dala chetlari, kanallar, kollektor-drenaj tarmoqlari hamda sugʻorish tizimlari atrofidagi boʻsh yotgan yerlardan ham unumli foydalanish lozim. Bunday maydonlarda turli xil mahsulotlar yetishtirishni yoʻlga qoʻyish nafaqat mahsulot hajmini oshiradi, balki qishloq joylarida aholi bandligini taʼminlashda qoʻshimcha manba boʻlib xizmat qiladi. Bu, oʻz navbatida, har bir qarich yerning egasi boʻlishi va undan daromad olinishini anglatadi.

Chindan ham, bugungi kunda jahon bozorida raqobatdosh boʻlish uchun faqatgina mahsulot yetishtirish yetarli emas. Eng muhimi, bu mahsulotlar xalqaro standartlarga javob berishi va tegishli sertifikatlarga ega boʻlishi shart. Seminar ishtirokchilariga respublika boʻyicha organik mahsulotlar yetishtirish hajmini kengaytirish va sertifikatlangan maydonlarni koʻpaytirish boʻyicha amalga oshirilayotgan tizimli ishlar haqida batafsil maʼlumot berildi.Xususan, xalqaro tan olingan sertifikatlarning afzalliklari alohida qayd etildi.

Ushbu hujjatlar mahsulotning sifati va xavfsizligini tasdiqlab, ular xorijiy hamkorlarning ishonchini qozonishda, eksport geografiyasini kengaytirishda va mahsulotlarni yuqori narxlarda sotishda beqiyos ahamiyatga ega. Import qiluvchi davlatlar uchun sertifikatlangan mahsulotlar shaffoflik va sifat kafolati demakdir, bu esa xalqaro savdo jarayonlarini sezilarli darajada yengillashtiradi.

Davlat tomonidan dehqon va fermerlar uchun yaratilayotgan imtiyozlar, ishlab chiqarishdan tortib, mahsulotni qayta ishlash, saqlash va eksport qilishgacha boʻlgan zanjirni qoʻllab-quvvatlash choralari seminarning diqqat markazida boʻldi. Infratuzilma va logistika imkoniyatlarini kengaytirish boʻyicha koʻrilayotgan choralar qishloq xoʻjaligi xodimlariga yangi kuch va shijoat bagʻishlashi shubhasiz.

Shuningdek, sohani raqamlashtirish masalasiga ham alohida toʻxtalib oʻtildi. Bugungi zamon dehqoni zamonaviy axborot texnologiyalari bilan ham tillasha olishi kerak. Tadbirda ichki fitosanitariya sertifikatlarini rasmiylashtirish tartibi, «Agroko‘makchi» mobil ilovasi orqali elektron «Dala daftari»ni yuritish tizimi boʻyicha amaliy koʻrsatmalar berildi. Bunday innovatsion yechimlar byurokratik toʻsiqlarni kamaytirishga, ish jarayonini tezlashtirishga va har bir jarayonni monitoring qilib borishga imkon beradi.

Seminar yakunida yer egalariga qaror ijrosiga masʼuliyat bilan yondashish, dala chetlaridagi imkoniyatlarni boy bermaslik va bosqichma-bosqich organik dehqonchilikka oʻtish boʻyicha tavsiyalar berildi. Zero, bugungi intilishlar ertangi toʻkinchilik va farovonligimizning mustahkam poydevoridir.