Yoshlar uchun yaratilgan imkoniyatlar — amaliy natijalarga aylanmoqda

Mamlakatimizda yoshlarni ish bilan taʼminlash, ularning tashabbuslarini qoʻllab-quvvatlash va ayniqsa, tadbirkorlikka keng jalb etish borasida amalga oshirilayotgan tizimli islohotlar bugun oʻz mevasini bermoqda. Bu islohotlar nafaqat shahar markazlarida, balki chekka-chekka ovul va mahallalarda ham oʻz aksini topayotgani diqqatga sazovordir. Bir paytlar ish qidirib, oʻz yoʻlini topishga qiynalgan yigit-qizlar bugun nafaqat oʻzlarini band qilmoqdalar, balki tengdoshlari uchun ham yangi ish oʻrinlari yaratib, haqiqiy zamon qahramonlariga aylanmoqdalar. Ana shunday shijoatli va izlanuvchan yoshlardan biri amudaryolik Isroil Ismoilovdir.

Bundan atigi ikki yil avval Isroil ham koʻpchilik tengdoshlari qatori ishsiz, kelajakka katta umid, ammo biroz xavotir bilan boqar edi. Biroq davlatimiz tomonidan yoshlar tadbirkorligini qoʻllab-quvvatlash maqsadida yaratilayotgan imkoniyatlar uning hayotida burilish yasadi. U mamlakatimizda yoshlarni qoʻllab-quvvatlash maqsadida berilayotgan imtiyozlardan unumli foydalanishga qaror qildi. Oʻz orzusini roʻyobga chiqarish yoʻlida dadil qadam tashlab, bankdan 100 million soʻm miqdorida imtiyozli kredit oldi. Bu mablagʻ nafaqat bir yosh yigitning biznesi uchun boshlangʻich kapital, balki uning kelajakdagi muvaffaqiyatlari uchun berilgan ishonch ramzi ham edi.

Isroil Amudaryo tumanining Qilichboy ovulida avtomobillarni taʼmirlash shoxobchasini tashkil etdi. Uning saʼy-harakatlari natijasida ovulda yana ikki nafar yoshlar ham doimiy ish oʻrniga ega boʻldi. Bu degani, yana ikkita oilaga daromad kirdi, ikki nafar yosh yigit ustachilik sirlarini oʻrganib, hunar egasiga aylandi.

Isroilning faoliyati faqatgina avtomobillarga texnik xizmat koʻrsatish bilan cheklanib qolmadi. U ish jarayonida mijozlarning ehtiyojlarini sinchiklab oʻrgandi va muhim bir muammoni payqadi. Ilgari avtoustaxonaga kelayotgan haydovchilar ehtiyot qismlarini olish uchun tuman markaziga borishga majbur boʻlardilar. Bu esa ortiqcha vaqt va xarajat demakdir. Mijozlarning ovoragarchiligiga chek qoʻyish maqsadida, lavhamiz qahramoni ustaxona qoshida avtomobil ehtiyot qismlari bilan savdo qiluvchi doʻkon faoliyatini ham yoʻlga qoʻydi. Endilikda ovuldoshlari va shu atrofdan oʻtuvchi haydovchilar ustaxona xizmatlaridan foydalanish bilan birga ehtiyot qismlarni ham shu yerning oʻzidan xarid qilishmoqda.

Bunday muvaffaqiyatlar zamirida avvalo tinimsiz mehnat va davlat tomonidan koʻrsatilayotgan yuksak eʼtibor mujassam. Isroil Ismoilovning bugungi faoliyati – mamlakatimizda olib borilayotgan islohotlarning eng chekka hududlardagi jonli ifodasidir. Uning maqsadlari esa yanada ulkan. Qahramonimiz erishilgan natijalar bilan toʻxtab qolmoqchi emas. U kelgusida Amudaryo tumanining boshqa hududlarida ham shunday zamonaviy servis shoxobchalarini ochishni rejalashtirgan. Bu esa yana oʻnlab yangi ish oʻrinlari, yana koʻplab yoshlarning bandligi va hududlarda tadbirkorlikning yanada rivojlanishi demakdir.

Isroilning tajribasi shuni koʻrsatadiki, harakat qilgan va berilgan imkoniyatdan toʻgʻri foydalangan yoshlar hech qachon kam boʻlmaydi. Bu kabi jasoratli va tashabbuskor yoshlarning koʻpayishi yurtimiz iqtisodiyotining barqarorligini taʼminlash bilan birga, boshqa tengdoshlari uchun ham oʻziga xos motivatsiya manbai boʻlib xizmat qiladi. Zero, har bir yosh tadbirkorning muvaffaqiyati – butun mamlakatning yutugʻi va ertangi porloq kelajagimizning kafolatidir.