Amudaryoda oziq-ovqat xavfsizligi: Yerdan unumli foydalanish – toʻkinlik garovi

Yerga mehr berish, uning har bir qarichidan unumli foydalanish farovon hayot va toʻkinlikning bosh mezonidir. Bugungi globallashuv davrida oziq-ovqat xavfsizligini taʼminlash nafaqat iqtisodiy, balki strategik ahamiyatga ega boʻlgan muhim masaladir. Mamlakatimizning har bir hududida boʻlgani kabi Amudaryo tumanida ham bu borada keng koʻlamli ishlar amalga oshirilmoqda.

Amudaryo sohillarida joylashgan bu zamin azaldan oʻzining dehqonchilik anʼanalari va mehnatsevar insonlari bilan mashhur. Bugungi kunda tumanda qishloq xoʻjaligi sohasini isloh qilish, yer egalarini har tomonlama qoʻllab-quvvatlash va ichki bozorni sifatli mahsulotlar bilan toʻldirish ustuvor vazifaga aylangan.

Raqamlarga eʼtibor qaratadigan boʻlsak, Amudaryo tumanida dehqon xoʻjaliklari jami 2 ming gektardan ortiq maydonda samarali faoliyat yuritib kelayotganini koʻrishimiz mumkin. Bundan tashqari, tumanning ijtimoiy-iqtisodiy hayotida tomorqa yer egalarining oʻrni beqiyosdir. 40 mingdan ortiq tomorqa egalari tasarrufida jami 8 ming gektarga yaqin maydon mavjud boʻlib, bu ulkan imkoniyat demakdir. Har bir xonadon egasi oʻz tomorqasini kichik bir xazinaga aylantirib, nafaqat oʻz ehtiyojlarini qondirmoqda, balki bozor rastalarini ham arzon va sifatli mahsulotlar bilan toʻldirishga koʻmaklashmoqda.

Shu bilan birga, tumandagi 350 dan ortiq fermer xoʻjaliklari dalalarida ham paxta va gʻalladan tashqari, oziq-ovqat mahsulotlarini yetishtirish masalalariga katta eʼtibor qaratilmoqda. Bunday yondashuv mamlakatimizda oziq-ovqat xavfsizligini taʼminlash, ichki isteʼmolni barqaror qanoatlantirish va eng muhimi, eksport salohiyatini oshirish imkonini bermoqda.

Yerdan foydalanishning yangicha usullari va zamonaviy texnologiyalarni joriy etish orqali dehqonlarimiz yilning toʻrt faslida ham yuqori hosildorlikka erishishmoqda. Bu borada “Rajab Japoq” fermer xoʻjaligining faoliyatini alohida namuna sifatida koʻrsatish mumkin. Ushbu xoʻjalikda har bir qarich yerdan oqilona foydalanish madaniyati shakllangan. Masalan, bogʻ qator oralariga toʻqsonbosti usulida piyoz ekilgan boʻlib, bu usul bahorning ilk kunlaridanoq xalqimiz dasturxoniga yangi mahsulotlarni yetkazib berish imkonini yaratadi. Fermer xoʻjaligi aʼzolari nafaqat piyoz, balki kartoshka, qalampir, bulgʻor qalampiri va sabzavotlarning deyarli barcha turlarini yetishtirishda katta tajriba toʻplashgan. Bu kabi dehqon va fermerlarning tinimsiz mehnati tufayli bozorlarimizda toʻkinlik, xalqimiz dasturxonida esa moʻl-koʻllik hukm surmoqda.

Mazkur fermer xoʻjaligining yutuqlari faqat sabzavotchilik bilan cheklanib qolmaydi. “Rajab Japoq” xoʻjaligi koʻp tarmoqli faoliyat yuritishi bilan ham ajralib turadi. Bu yerda paxtachilik, gʻallachilik, chorvachilik va bogʻdorchilik sohalari bir-birini toʻldirgan holda faol rivojlantirilmoqda. Oʻtgan yilgi mavsumda paxta yetishtirishda yuqori natija qayd etilib, har gektar maydondan oʻrtacha 40 tsentnerdan hosil olingan boʻlsa, joriy yilda bu koʻrsatkichni yanada oshirish, hosildorlikni yangi bosqichga olib chiqish maqsad qilingan. Bu esa fermerning oʻz kasbiga boʻlgan sadoqati va yerga boʻlgan mehridan dalolat beradi. Koʻp tarmoqli xoʻjalik sifatida chorvachilikni rivojlantirish orqali aholiga goʻsht va sut mahsulotlari yetkazib berilsa, bogʻdorchilik orqali sarxil mevalar yetishtirilmoqda. Bunday tizimli ish tashkil etilishi nafaqat iqtisodiy foyda keltiradi, balki yangi ish oʻrinlari yaratilishiga ham xizmat qiladi.

Yer bilan tillasha olgan, undan baraka topayotgan dehqon va fermerlarimiz bugungi kunning haqiqiy qahramonlaridir. Ularning saʼy-harakatlari tufayli dasturxonlarimiz toʻkin, bozorlarimiz fayzli boʻlmoqda. Tizimli tashkil etilgan ish jarayoni, yerga ilmiy va innovatsion yondashuv hamda koʻp tarmoqli xoʻjaliklarning koʻpayishi kelgusida tuman iqtisodiyotini yanada yuksaltirishga xizmat qiladi. Mamlakatimizda amalga oshirilayotgan islohotlar, dehqonlarga yaratib berilayotgan sharoitlar va yer egalarining fidokorona mehnati bir nuqtada birlashib, yurtimizning oziq-ovqat mustaqilligini mustahkamlashga zamin yaratmoqda.