Bitiruvchilar bandligi taʼminlanadi

Mamlakatimizda kadrlar tayyorlashning muhim boʻgʻini — oʻrta maxsus, kasb-hunar taʼlimi tizimi salohiyatli kadrlar tayyorlash va yangi ish oʻrinlari yaratish borasida oʻzining noyob va samaradorligi bilan muhim oʻrin tutadi. Voyaga yetayotgan har bir yigit-qiz muayyan kasb-hunarga ega boʻlishiga erishish, mehnat bozori talabi asosida eng munosib mutaxassislar tayyorlash — ushbu tizimning asosiy vazifalaridan.

Joriy yilning 13-14-avgust kunlari Amudaryotumanidagi 7 ta kasb-hunar kollejlarida bitiruvchilarning oʻz bizneslarini boshlashlari va tadbirkorlik faoliyatlari bilan shugʻullanishlariga amaliy yordam koʻrsatish maqsadida "Bir darcha” sayyor nuqtasi” loyihasi doirasida tadbirlar boʻlib oʻtdi.

– Mustaqillikning dastlabki yillaridan boshlab yurtimizda aholi, xususan, yoshlarni ish bilan taʼminlash masalasi eng muhim vazifalardan biri sifatida kun tartibiga qoʻyildi. Avvalo, yigit-qizlarning doimiy mehnat bilan band boʻlishini kafolatlashning huquqiy asoslari yaratildi, – deydi Mangʻit iqtisodiyot kasb-hunar kolleji direktori Zafar Otamurodov. – Istiqlol yillarida qabul qilingan Mehnat kodeksi, «Aholini ish bilan taʼminlash toʻgʻrisida»gi va «Oʻzbekiston Respublikasida yoshlarga oid davlat siyosatining asoslari toʻgʻrisida»gi qonunlar va boshqa meʼyoriy hujjatlar yoshlarning, ayniqsa, kasb-hunar kollejlari bitiruvchilarining ishli boʻlishiga mustahkam zamin hozirladi. Bitiruvchilarni ishga joylashtirish chora-tadbirlari esa ular oʻqishni tugatishidan ancha avval koʻrilayotgani muhim ahamiyat kasb etmoqda. Bu borada soʻz ketganda turli tarmoqlardagi korxona va tashkilotlarning kollejlarga biriktirib qoʻyilgani — «kollej — korxona» hamkorligini izchil amalga oshirish, boʻsh ish oʻrinlari yarmarkalarini tizimli oʻtkazish, ish beruvchi uchun imtiyozlar joriy etish, yoshlarning oʻz ishini tashkil etishiga koʻmaklashish va mikrokreditlar ajratish kabi tadbirlar ijobiy samara berayotganini alohida taʼkidlash joiz. Xususan, bugungi oʻtkazilayotgan tadbir – "Bir darcha” sayyor nuqtasi” taqdimoti bu borada ancha samarali ekani oʻzi isbotini topdi. Tadbirda oʻquvchilar va ularning ota-onalari faol ishtirok etib, yangi ish oʻrinlari haqida xabar olish, bankdan kredit olish, garov taʼminoti, tadbirkorlik obʼekti uchun yer olish, qurilishga ruxsat olish, mulkni baholash va sugʻurtalash kabi oʻnlab xizmatlardan "bir darcha” orqali foydalanish imkoniyatiga ega boʻlishdi.

Joriy oʻquv yilida Amudaryo tumanidagi oʻrta maxsus kasb-hunar kollejlari va akademik litseylarni 2600 ziyod oʻgʻil-qiz tamomladi. Ularning 509 nafari xususiy tadbirkorlik bilan shugʻullanish istagini bildirgan. Mazkur loyihaning taqdimoti boʻlgʻusi yosh tadbirkorlarga katta imkoniyatlar eshigini ochib berdi. Loyiha doirasidagi tadbirlarda 138 nafar kollej bitiruvchilariga tijorat banklaridan imtiyozli kredit olish uchun sertifikatlar berildi.

Gʻ.YeShNIYoZOV