Xalq deputatlari Amudaryo tuman Kengashining oʻn uchinchi sessiyasi toʻgʻrisida AXBOROT

2016 18-yanvar kuni xalq deputatlari tuman Kengashining oʻn uchinchi sessiyasi boʻlib oʻtdi. Sessiyaga tuman Kengashi Reglamentining 16-moddasiga muvofiq tuman hokimi topshirigʻiga binoan deputat R.Oʻrozboyev raislik qildi.

Sessiyaga tuman Kengashi deputatlari, hokim oʻrinbosarlari, hokimlik masʼul xodimlari, huquqtartibot organlari va boʻlimlar rahbarlari, fuqarolarning oʻzini-oʻzi boshqarish organlari raislari, akademik litsey va kasb-hunar kollejlari direktorlari, jamoat tashkilotlari hamda ommaviy axborot vositalari vakillari taklif qilindi.

Sessiya kotibligiga 5-Beruniy saylov okrugidan deputat S.Xoʻjamurotova saylandi.

Sessiya kun tartibiga quyidagi masalalar havola qilindi:

1. Xalq deputatlari Amudaryo tuman Kengashi va Kengash doimiy komissiyalarining 2016-yilga moʻljallangan ish rejalarini tasdiqlash toʻgʻrisida.

2. Xalq deputatlari tuman Kengashi, Kengash doimiy komissiyalari va Kengash deputatlarining 2015-yildagi faoliyati natijalari toʻgʻrisida.

3. Amudaryo tumani mahalliy byudjetining 2015-yilgi ijrosi toʻgʻrisida.

4. 2015-yil 12 oyi davomida jinoyatchilik va qonuniylikning ahvoli hamda bu borada tuman prokuraturasi tomonidan amalga oshirilgan ishlar yuzasidan tuman prokurorining axboroti haqida.

Deputatlar dastlab tuman Kengashi va Kengash doimiy komissiyalarining 2016-yilga moʻljallangan ish rejalari loyihasini koʻrib chiqdilar va muhokama qilib, tasdiqladilar.

Kun tartibidagi ikkinchi masala yuzasidan tuman Kengashining Reglament va deputatlik odobi masalalari boʻyicha doimiy komissiyasi raisi R.Roʻzmetov axborot berdi.

Axborotda taʼkidlanganidek, xalq deputatlari tuman Kengashi, tuman Kengashi doimiy komissiyalari va deputatlari oʻtgan yil mobaynida "Mahalliy davlat hokimiyati toʻgʻrisida”gi, "Xalq deputatlari viloyat, tuman va shahar Kengashi deputatining maqomi toʻgʻrisida”gi Oʻzbekiston Respublikasi Qonunlariga hamda "Xalq deputatlari Amudaryo tuman Kengashining Reglamenti”ga, "Xalq deputatlari Amudaryo tuman Kengashining doimiy komissiyalari toʻgʻrisidagi Nizom”ga muvofiq keng turda faoliyat olib bordilar. Axborotda  xalq deputatlari tuman Kengashi, Kengash doimiy komissiyalari va Kengash deputatlarining 2015-yildagi faoliyati boʻyicha batafsil maʼlumot berildi.

Kun tartibidagi uchinchi masala – Amudaryo tumani mahalliy byudjetining 2015-yilgi ijrosi yuzasidan tuman moliya boʻlimi mudiri A.Abdijaliyev hisobot berdi.

Hisobotda taʼkidlanganidek, 2015-yil davomida tuman mahalliy byudjetining daromadlar qismi rejasi 27 mlrd. 891 mln. 663 ming soʻmga belgilangan boʻlib, haqiqatda 27 mlrd. 991 mln 663 ming soʻmga, yaʼni 100,4 foizga bajarildi.

Mahalliy byudjetning xarajatlar qismi rejasi esa 100 mlrd. 851 mln. 388 ming soʻmga belgilangan boʻlib, haqiqatda 100 mlrd. 846 mln. 915 ming soʻm sarf qilindi. Bu xarajatlar asosan ijtimoiy-madaniy va aholini qoʻllab-quvvatlash xarajatlariga, iqtisodiyot sohasida olib borilayotgan islohotlar talablarini amalga oshirish tadbirlariga qaratildi. Hisobotda tuman mahalliy byudjetining 2015-yildagi ijrosi toʻgʻrisida batafsil maʼlumot berildi.

Kun tartibidagi soʻnggi masala boʻyicha tuman prokurori F.Allambergenovning 2015-yil davomida tuman hududida qonuniylikning hamda jinoyatchilikka qarshi kurashning holati toʻgʻrisidagi axboroti muhokama qilindi.

Kun tartibidagi masalalar boʻyicha muzokaralarda deputatlar, muassasa, korxona va tashkilotlar rahbarlari ishtirok qilib, muhokama qilinayotgan masalalarga oʻz munosabatlarini bildirdilar.

Sessiyada kun tartibidagi masalalar boʻyicha tegishli qarorlar qabul qilindi va shuning bilan sessiya oʻz ishini yakunladi.

Tuman hokimligining axborot xizmati.