“SPORT – SALOMATLIK GAROVI”

8-mart – Xalqaro xotin-qizlar kuni munosabati bilan tumandagi korxona, tashkilotlar, taʼlim muassasalarida faoliyat yuritayotgan ayol-qizlar oʻrtasida sportning voleybol, shaxmat, shashka, stol tennisi, yugurish turlari boʻyicha musobaqalar oʻtkazildi.

Tuman xotin-qizlar qoʻmitasi, "Mahalla” xayriya jamoat fondi tuman boʻlinmasi, XTMFMTTEB, TTB, tuman kasaba uyushmasi kengashi hamkorligida tashkil etilgan musobaqalar juda qizgʻin va taassurotlarga boy boʻldi. Yugurish boʻyicha 11-maktabdan Salomat Toʻrayeva, shaxmat boʻyicha Nilufar Yoʻldosheva, shashka boʻyicha Sveta Aytboyevalar gʻoliblikni qoʻlga qiritishgan boʻlsa, stol tennisi boʻyicha 36-maktab vakili Eʼtibor Bobojonova barcha raqiblaridan mahoratli ekanligini namoyish etdi va birinchi oʻrinni egalladi. Voleybol boʻyicha oldingi oʻrinni 28-maktabvoleybolchilar jamoasi yengib oldi.

Yaratganning nozik xilqati boʻlmish ayol-qizlar bu musobaqalar davomida nafaqat ishchi, xizmatchi yo muallima, maʼnaviy yetuk insongina emas, jismonan ham kuchli ekanligini yana bir bor isbotladilar. Turli jabhalarda mehnat qilayotgan ayol-qizlar sport – salomatlik garovi ekanligini chuqur anglab, muntazam chiniqish mashqlarini bajarib, "sogʻ tanda – sogʻlom aql” shioriga amal qilayotganliklarini namoyish etishdi.

Xolbika DURDIYeVA,

38-maktab oʻqituvchisi.