NAVROʻZ

Ilk xabaring yetkazdi tongdagi sabo, Navroʻz!

Shundan beri qalblarda oʻzgacha safo, Navroʻz!

Bu yil erta kelgan bahor jonlantirib borliqni,

Hattoki yosh maysalar ham yangratar navo, Navroʻz!

Alvon rangda koʻz quvnatar bogʻ-u bogʻchalar yana,

Koʻk somsa-yu sumalaging ming dardga davo, Navroʻz!

"Dehqon bobo, tur” degandek samodan ovoz kelar,

Turnalarning saslari bu koʻkdagi sado, Navroʻz!

Oq libosin bermadi-ku bu yil tabiat deya,

Zamin kiyibdi butkul yashildan qabo, Navroʻz!

Oʻtgan qishdan oʻpka yoʻgʻ-u, lek baribir boshqacha,

Hut kirib kelgandan beri atrof bahavo, Navroʻz!

Toʻrt faslning tarovati shukuhli, ammo Ahmad

Bahor vasfin kuylamoqdek dardga mubtalo, Navroʻz!

Ahmad NAFASOV.