Tanlovlar iqtidorlilarni aniqladi

Mustaqillik sharofati bilan oʻz erki, dini, tili va ajdodlari yaratgan boy maʼnaviy merosga qayta ega boʻlgan xalqimiz oʻtgan 25-yil mobaynida yosh avlod taʼlim-tarbiyasiga ulkan eʼtibor qaratdi. Kadrlar tayyorlash va maktab taʼlimini rivojlantirish umummilliy dasturlarining qabul qilinib, taʼlim-tarbiya sohasida eski, qotib qolgan uslublardan xoli boʻlgan yangi tizimning hayotga tatbiq etilganligi bugun yangicha fikrlaydigan, Vatanimizning kelajagini oʻz qoʻllariga olishga qodir boʻlgan yigit-qizlar kamolga yetishishiga asos boʻldi.

Atrofidagi voqea-hodisalarga aniq, xolis munosabatda boʻlaoladigan, Vatan taqdiriga daxldorlik hissi bilan yashaydigan, siyosiy  faol va mustahkam fuqarolik pozitsiyasiga ega boʻlgan yoshlarning erishayotgan yutuqlari, intilishlari bu ulkan  maqsad yoʻlida amalga  oshirilgan ishlar nechogʻlik samarali boʻlganligini koʻrsatib turibdi.

Mamlakatimizda amalga oshirilayotgan ana shunday ulugʻvor ishlarga hissa qoʻshish maqsadida "Jayxun ilhomlari” nodavlat notijorat tashkiloti Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan grant tanlovida "Yuksak maʼnaviyatli avlod – yurt kelajagi” nomli loyihasi bilan qatnashib, gʻolib boʻlgan edi. Loyihaning maqsadi yurtimiz yoshlarini har tomonlama barkamol, maʼnaviy jihatdan yetuk insonlar qilib tarbiyalashga hissa qoʻshishdan iborat. Oʻtgan oʻn oy davomida NNT aʼzolari loyiha rejasida koʻzda tutilgan tadbirlarni oʻz muddatlarida amalga oshirib, hamkor tashkilotlar bilan birgalikda maktablarda, oʻrta maxsus, kasb-hunar taʼlimi muassasalarida uchrashuvlar, davra suhbatlari, badiiy kechalar, kontsert  dasturlari, koʻrgazmalar tashkil qilib, kitob sayllari uyushtirishdi, yoshlar uchun koʻchma kutubxona tashkil qilishdi va loyiha doirasidagi tadbirlarda faol ishtirok etgan yoshlarni ragʻbatlantirib, ularning ijod namunalarini matbuotda yoritib borishdi hamda toʻplam koʻrinishida nashr qilishga hozirlik koʻrilmoqda.

Oʻtgan 10 oy mobaynida tumanimiz maktablari va oʻrta maxsus, kasb-hunar taʼlimi muassasalarida yoshlar oʻrtasida milliy istiqlol gʻoyasi va maʼnaviyat targʻibotiga bagʻishlangan "Maʼnaviyat kunlari”da 35 ta uchrashuvlar, ovul va mahalla yoshlari  uchun "Koʻchma kutubxona” xizmatini yoʻlga qoʻyish maqsadida  30 ta "Koʻchma kutubxona – yoshlar uchun” uchrashuvlari, yoshlarni kitobxonlikka qiziqtirish, NNT qoshida tashkil qilingan kutubxona kitoblarini taʼlim muassasalari yoshlari orasida targʻib qilish maqsadida "Kitobxonlik – maʼnaviyat kaliti” deb nomlangan 30 ta uchrashuvlar oʻtkazildi. Milliy istiqlol gʻoyasi targʻiboti va globallashuv davrida yoshlar maʼnaviyatini yuksaltirish, yoshlarni "ommaviy madaniyat”ning zararli taʼsiridan himoya qilish maqsadida tumanimizda yashab, ijod qilayotgan yozuvchi va shoirlar, ijodkorlar va NNT aʼzolarining aholi, xususan yoshlar, olis qishloqlar aholisi bilan 5 ta davra suhbatlari tashkil qilindi.

Shuningdek "Jayxun ilhomlari” NNTning turli loyihalari va tanlovlari ishtirokchilarining ijodiy salohiyatini roʻyobga chiqarish, yanada samarali ijod qilishlariga sharoit yaratish, ularni katta sahnalarga olib chiqish maqsadida ikki marta kontsert dasturi, ikki marta badiiy kecha va bir koʻrgazma tashkil etildi. Maktablar, akademik litsey va kasb-hunar kollejlarining bilimdon oʻquvchilaridan iborat "Yosh maʼnaviyat targʻibotchilari” guruhi tuzilib, ushbu guruh aʼzolari ishtirokida 3 ta davra suhbatlari oʻtkazildi. Yurtimizning boy madaniy merosi, shonli oʻtmishini yoshlarga tushuntirish, ularda tariximizga hurmat, kelajakka ishonch tuygʻularini mustahkamlash maqsadida NNT loyihalarida faol ishtirok etgan yoshlarning Xiva shahriga, "Chilpiq” va "Gaur qalʼa” tarixiy yodgorliklariga sayohatlari uyushtirildi. Yoshlar, ayniqsa chekka qishloqlar yoshlarining madaniy hordiq chiqarishiga koʻmaklashish, maqsadida 21-sonli Bolalar musiqa va sanʼat maktabida, "Barkamol avlod” bolalar markazida ijodkor-yoshlarning kontsertlari tashkil qilindi. Oʻtkazilgan tadbirlarning koʻpchiligi, kontsert dasturlari toʻlaligicha "Amudaryo televideniyesi”da  namoyish etildi.

Bulardan tashqari, "Yuksak maʼnaviyatli avlod – yurt kelajagi” loyihasi doirasida iqtidorli yoshlarni tarbiyalash, ragʻbatlantirish va ularning ijodiy salohiyatini roʻyobga chiqarish maqsadida badiiy sanʼat yoʻnalishida "Ranglarda Vatan manzaralari”, adabiy ijod yoʻnalishida "Biz – barkamol avlod, porloq kelajak bunyodkorlarimiz”,  musiqa yoʻnalishida "Qoʻshigʻimda Vatan madhi” nomli tanlovlar eʼlon qilingan edi. Ularga tumanimizdagi umumtaʼlim maktablari, oʻrta maxsus, kasb-hunar taʼlimi muassasalarining oʻquvchi-yoshlari oʻz ijod namunalari bilan qatnashdilar va eng sara namunalar "Amudaryo televideniyesi” va "Taraqqiyot koʻzgusi”, "Mening oilam” gazetalarida, amunews.uz veb-saytida yoritib borildi.

Hakamlar hayʼati mazkur tanlovlarga kelgan materiallarni koʻrib chiqib, gʻoliblarni aniqladi.

Shunday qilib, badiiy sanʼat yoʻnalishida:

1-oʻrin – Shamsiddin Bekishboyevga,

2-oʻrin – Sardor Xudoyberganovga,

3-oʻrin – Diyorbek Adilboyevga,

adabiy ijod yoʻnalishida:

1-oʻrin – Sveta Shomurodovaga,

2-oʻrin – Ozoda Toʻliboyevaga,

3-oʻrin – Sevara Sidabullayevalarga,

musiqa yoʻnalishida:

1-oʻrin – 21-sonli Bolalar musiqa va sanʼat maktabi tarbiyalanuvchisi Temur Kamolov va "Barkamol avlod”  bolalar markazining "Shoʻx bolalar” jamoasiga,

2-oʻrin – 21-sonli Bolalar musiqa va sanʼat maktabi tarbiyalanuvchisi Doston Tilovmurodov va "Barkamol avlod”  bolalar markazining "Yosh doirachilar” guruhiga,

3-oʻrin – 21-sonli Bolalar musiqa va sanʼat maktabi tarbiyalanuvchisi Maʼruf Jumaniyozov hamda "Barkamol avlod” bolalar markazining "Yosh jurnalist va notiq” toʻgaragi aʼzosi Umida Yerdoshevalarga nasib etdi.

Gʻoliblar moddiy-maʼnaviy ragʻbatlantirildi.

"Jayxun ilhomlari” nodavlat notijorat tashkiloti yuksak maʼnaviyatli avlodni kamol toptirishdek ulugʻ ishga kelgusida ham oʻz hissasini qoʻshaveradi.

Oygul RAJABOVA,

"Jayxun ilhomlari”

NNT aʼzosi.