SPORT – TURMUSh TARZIMIZGA SINGIB BORMOQDA

Yosh avlodni sogʻlom va barkamol qilib voyaga yetkazishda jismoniy tarbiya va sportning ahamiyati katta. Shu boisdan-da keyingi yillarda oʻsmir-yoshlarni jismonan chiniqtirish, sogʻlom boʻlib ulgʻayishlariga erishish maqsadida mazkur sohaga eʼtibor kun sayin kuchaytirilmoqda. Ayniqsa maktab oʻquvchilari uchun uch bosqichda "Umid nihollari”, oʻrta maxsus, kasb-hunar taʼlimi va akademik litsey oʻquvchilari uchun "Barkamol avlod”, oliy taʼlim muassasalari talabalari uchun "Universiada” musobaqalarining oʻtkazilayotganligi sportning ommalashishiga va oʻsmir-yoshlar, talabalar orasidan iqtidorli  sportchilarning yetishib chiqishiga asos boʻlmoqda.

Hozirgi kunda tumanimizning qaysi bir taʼlim muassasasiga bormang, zamonaviy uslubda qurilib, jihozlangan qishki va yozgi sport zallarini, maydonchalarini koʻrasiz. Va  ular bolalarning haqiqiy  sport mahoratini oshirishiga va chiniqishiga  xizmat qilayotganiga guvoh boʻlasiz.

Keyingi yillarda tumanimizda 6 ta mini futbol maydonchasi qurilib, foydalanishga topshirilgani sportning shu turiga qiziquvchilar uchun ayni muddao boʻldi va mini futbol rivojlanishiga asos boʻlayotir.

Bulardan tashqari oʻtkazilayotgan mahallalararo musobaqalar, turli sanalarga bagʻishlab oʻtkazilayotgan musobaqalar ham sportning ommalashuviga hissa qoʻshayotir.

Ayniqsa, "Otam, onam va men sportchi oilamiz”, "Mahallamiz pahlavonlari”, "Quvnoq startlar” kabi musobaqalarning doimiy oʻtkazib kelinayotganligi sport ishqibozlarini tobora koʻproq jalb qilmoqda.

Qisqa qilib aytganda, bugungi kunda sport – xalqimizning turmush tarziga tobora singib bormoqda va bu salomatlikni saqlashga xizmat qilayotganligi bilan juda ahamiyatlidir.

Men bundan sport faxriysi sifatida juda quvonaman va yoshlarimiz yaratilgan imkoniyatlardan foydalanib, ulkan yutuqlarni qoʻlga kiritaverishlarini tilab qolaman. Bizga mana shunday imkoniyatlarni bergan mustaqilligimizning 25-yilligi barcha yurtdoshlarimizga qutlugʻ boʻlsin!