BUGʻDOYGA OʻROQ TUShDI

Ziroatchilik – xalqimizning tirikchilik manbalaridan biri, ota meros kasbidir, asosiy boyligi, rizq-nasibasi, koʻnglini nurafshon qiladigan faxridir. Shu boisdan-da dehqonchilikdagi har bir yutuq – shijoat-fidokorlikning shirin mevasi doim ham hammamizni birday quvonchga belaydi.

Ayni kunlarda bugʻdoy dalalarida dasturxonimiz koʻrki, bebaho neʼmat - nonimizning moʻl boʻlishidan darak berib, oltinday tovlanib turgan boʻliq bugʻdoy boshoqlari qalblarimizga faxr bagʻishlaydi.

Tumanimizda oʻtgan yilning kuzida 2800 gektarmaydonga  bugʻdoy ekilgan edi. Mazkur maydonlardan toʻliq nihol undirib olish uchun amalga oshirilgan chora-tadbirlar oʻz natijasini berdi. Unib chiqqan bugʻdoy nihollari oʻz vaqtida oziqlantirilib sugʻorilib borilganligi tufayli moʻl hosil yetishtirishga erishildi.

Qutlugʻ ishlar boshida kengashib, maslahatlashib olish xalqimizning azaliy udumlaridandir. Otameros anʼanalarga sodiq  dehqonlarning bugʻdoy oʻrimiga bagʻishlangan respublika koʻrgazmali  seminar kengashi shu yilning 10-iyunida tumanimizdagi "Beshboyev Qurbongʻali” fermer xoʻjaligida boʻlib oʻtdi.

Koʻrgazmali seminar kengashga Qoraqalpogʻiston Respublikasi Joʻqorgʻi Kengashi raisi M.Yerniyozov, Oʻzbekiston Respublikasi Vazirlar Mahkamasidan Respublikaga biriktirilgan vakil Sh.Teshayev, Qoraqalpogʻiston Respublikasi Qishloq va suv xoʻjaligi Vaziri S.Xoʻjametov, tuman hokimi R.Yoʻldoshev, qishloq xoʻjaligiga xizmat koʻrsatuvchi korxonalar, tashkilotlar rahbarlari, fermerlar ishtirok etdilar.

Tadbirda joriy yilda halol va fidoyi mehnatlar evaziga yetishtirilgan bugʻdoy hosilini nes-nobut qilmay oʻrib-yigʻib davlat xirmoniga topshirish, shu maqsadda mavjud oʻrim kombaynlaridan unumli foydalanish, bugʻdoy hosilining isrof boʻlishiga yoʻl qoʻymaslik kabi masalalar muhokama etildi.

Boshoqlari hosil salmogʻidan egilib turgan dala boshida yilning bugʻdoy xirmoniga oq fotiha berildi. Ezgu niyatlarning ijobat boʻlishidan yaratilajak  6555 tonnalik yuksak bugʻdoy xirmonidan darak berayotganday oʻrim kombaynlari shiddat bilan ishga kirishib ketdi.

Oygul RAJABOVA.