Saylovga tayyorgarlik yuzasidan seminar oʻtkazildi

Xalqimiz hayotida muhim ahamiyaga ega siyosiy jarayon –Oʻzbekiston Respublikasi Prezidenti saylovi kuniga juda qisqa vaqt qoldi. Joylarda saylov kampaniyasini jipslik bilan, yuksak saviyada, adolat tamoyillari, Markaziy saylov komissiyasi qarorlari, Oʻzbekiston Respublikasi Konsititutsiyasi hamda saylov toʻgʻrisidagi qonuniy meʼyorlar asosida oʻtkazish maqsadida tayyorgarlik ishlari avj pallaga kirdi. Tumanimizda ham bu muhim siyosiy jarayonni uyushqoqlik bilan oʻtkazish, barcha saylov uchastkalari ishini namunali tashkil etishga alohida ahamiyat berilmoqda.

Shu maqsadda 2016 yil 19-oktyabr kuni tumanimizdagi Amudaryo agrobiznes  kasb-hunar kolleji binosida saylovga tayyorgarlik koʻrish va koʻtarinki ruhda oʻtkazish, saylovoldi targʻibot va tashviqot ishlariga bagʻishlangan koʻrgazmali seminar boʻlib oʻtdi. Koʻrgazmali  seminar ishida tuman hokimining oʻrinbosarlari, sohalar boʻyicha yetakchi mutaxassislar, uchastka saylov komissiyalari raislari va kotiblari, idora va tashkilotlarning rahbarlari, akademik litsey, kasb-hunar kollejlari, umumtaʼlim maktablari direktorlari, tumanimiz hududida tashkil etilgan Oʻzbekiston Respublikasi Prezidentiga saylov oʻtkazuvchi uchastka saylov komissiyalarining raislari hamda OAV vakillari ishtirok etdilar.

Koʻrgazmali seminar ishtirokchilari dastlab Amudaryo agrobiznes kasb-hunar kolleji binosida joylashgan 130-saylov uchastkasi faoliyati bilan yaqindan tanishdilar. Xususan, mazkur saylov uchastkasining bezatilishi, zarur jihozlar bilan taʼminlanganlik darajasi, saylovga tayyorgarlik  koʻrish va uni oʻtkazish bilan bogʻliq ishlar, belgilangan chora-tadbirlar boʻyicha maxsus tayyorlangan jadvallar, devoriy gazetalar, davlatimiz ramzlarining joylashtirilishi, saylov kunining yaqinlashayotganini aniq koʻrsatib turuvchi taqvim,  saylov uchastkasi hududidagi jami saylovchilar va birinchi marta saylovda ishtirok etayotgan yoshlar haqidagi maʼlumotlar bilan yaqindan tanishdilar.

 Tuman hokimligining tashkiliy-nazorat gruhi rahbari Bahodir Boltaboyev koʻrgazmali seminar kengash ishtirokchilariga har bir saylov uchastkasida saylovchilarning emin-erkin oʻz fuqarolik burchlarini ado etishlarini taʼminlash maqsadida uchastka saylov komissiyalarining masʼullari zimmasidagi vazifalar yuzasidan zarur tushunchalar berdi.

Shundan soʻng koʻrgazmali seminar ishtirokchilari 130-saylov uchastkasida saylovchilar uchun yaratilgan shart-sharoitlar bilan tanishdilar. Namunali jihozlangan onalar va bolalar xonasi, barcha qulayliklarga ega tibbiyot xonasi, maʼnaviyat va maʼrifat xonalarini borib koʻrdilar. Ayniqsa, maʼnaviyat va maʼrifat xonasidan zamonaviy axborot texnologiyalari, rasmiy hujjatlar, adabiyotlar hamda mamlakatimizda va tumanimizda chop etiladigan ijtimoiy-siyosiy nashrlar joy olganligiga alohida ahamiyat berdilar.

Ishtirokchilar mazkur saylov uchastkasi faoliyati bilan yaqindan tanishganlaridan soʻng  Agrobiznes kasb-hunar kollejining majlislar xonasida tumanda Oʻzbekiston Respublikasi Prezidenti saylovi kuniga tayyorgarlik koʻrish va bu muhim siyosiy jarayonni muvaffaqiyatli oʻtkazishga bagʻishlangan koʻrgazsali seminar kengashi oʻz ishini davom ettirdi.

Seminarda saylov uchastkalarini huquqiy va moddiy-texnik darajada tayyor holga keltirish, ushbu muhim siyosiy jarayonni milliy saylov qonunchiligimizda mustahkamlab qoʻyilgan tenglik, oshkoralik va adolat tamoyillari asosida yuqori saviyada oʻtkazishni taʼminlash yuzasidan fikr almashildi.

Koʻrgazmali seminar kengashda tuman hokimi Sultonboy Yoʻldoshev ishtirok etdi va nutq soʻzladi.

Tuman hokimligining axborot xizmati.