BAHOR SALOMI

 Bu olamda inson zoti bor ekan, nimanidir kutib, unga intilib yashaydi. Ertagi kunimizdan benihoya umidlar qilamiz. Xuddiki, erta bugungi kunimizdan ham yorugʻroq kelar, degan niyatda. Umrning past-u baland soʻqmoqlarida mana shu baxt ulashuvchi kun uchungina sabr-bardoshli boʻlib, dadil qadam tashlaymiz. Bir kam dunyoning tashvishlari boshimizni gangitib qoʻygan paytlarda ham mana shu kutayotgan lahzalarimizni oʻylasak, bu dunyoning oʻtkinchiligini unutganday boʻlamiz. Xoʻsh, ushbu tariflashga til ojiz boʻlgan kunning sehrli onlarining qanday qudrati borki, inson oʻsha kezlarni oʻylasa, xuddi yangidan tugʻilgan chaqaloqdek his qiladi oʻzini.

 Va qiziqarlisi shuki, bu qaysi kun?! Bir fikrlab koʻraylik-a!!? Bu - BAHOR. Yosh-u qarining orziqib kutgani - BAHOR. Yasharish fasli kirib kelishi bilan daraxtlar xuddi goʻdak onasiga talpingandek, BAHORning quchogʻiga oʻzini uradi. Koʻklam ham ona farzandiga mehr koʻrsatgani kabi mayin koʻllari ila daraxtlarning boshini silab rostmana uygʻotadi. Iliq tafti ila uning koʻzlarini ochib, goʻzal hayotga kulib boqishga undaydi. Butun borliqqa baxmal gilam yoyadi. Qushlar oʻzlarining sogʻinchli qoʻshiqlarini joʻr boʻlib kuylab, kishini maftun qiladi. Butun olam betakror chiroy ochadi, inson qalbini xayajonga soluvchi ifor taratib turadi. Naqadar maftunkorsan BAHOR!

Shu sababdan boʻlsa kerak, BAHOR faslida bayramlar koʻp va xoʻp. Olamni munavvar qilguvchi, taʼrifiga til ojiz boʻlgan munis ayollar bayrami, qadim zamondan milliy urf-odat va anʼanalarimizni oʻzida mujassam etgan NAVROʻZI OLAMning, ayniqsa, oʻrni boʻlak. Doshqozonlarda biqirlab qaynayotgan sumalak elimiz tinchligidan, oilamiz birdamligidan, dasturxonimiz toʻkin, turmushimiz farovonligidan darak beradi.

BAHORning xushboʻy iforidan toʻyib-toʻyib nafas olgan kishining hayotga boʻlgan ishonchi, umidi yanada ortib boradi. Begʻubor bolalikning shoʻx-quvnoqligini, begʻuborligini osmon uzra parvoz qilayotgan varraklar timsolida koʻramiz.

Ey, Ona zamin, ey mustaqil diyorim, mehnatkash xalqim! Ushbu yangilanish, yasharish fasli boʻlmish BAHOR sizga muborak boʻlsin! Qalbimizni shukronalik, bir-birimizga boʻlgan BAHORning taftidek iliq mehr-oqibat hech qachon tark etmasin.

Salomat KARIMOVA,

NDPI talabasi.