AMUDARYo TELEVIDENIYeSI: tezkor xabarlar, qiziqarli koʻrsatuvlar

Jamiyatimizdagi bugungi mislsiz taraqqiyotni, hayotimizni ommaviy axborot vositalarisiz tasavvur eta olmaymiz. Hammamiz ham gazeta-jurnal oʻqiymiz, televizor qarshisida soatlab oʻtiramiz. Bular bizning axborotga boʻlgan ehtiyojimizni qondiradi, yangiliklardan boxabar etadi, shuurimiz oydinlashadi. Va shu barobarida ertangi kunimizni, kelajagimizni toʻgʻri tasavvur eta olishga, toʻgʻri rejalashtira olishga muvaffaq boʻlamiz.

Bugungi tezkor zamonamizda ommaviy axborot vositalarining oʻrni va ahamiyati yanada ulkan. Toʻgʻri, mamlakatimizda bugungi kunda faoliyat yuritayotgan gazeta-jurnallar, telekanallar yurtdoshlarimizga saviyasi yuksak, mazmunli va qiziqarlilarini tanlab oʻqish, tomosha qilish imkonini berayapti.

Qoraqalpogʻiston Respublikasining eng kenja ommaviy axborot vositalaridan biri boʻlgan Amudaryo televideniyesi ilk koʻrsatuvlarini efirga uzata boshlaganiga istiqlol bayrami arafasida uch yil toʻladi. Uch yil mobaynida tumanimiz hududini qamrab olgan va tumanimiz hayotiga oid eng soʻnggi yangiliklar, turli sohalarda amalga oshirilayotgan ishlar, yanada rivojlanishga toʻsqinlik qilayotgan muammolar xususida tayyorlanayotgan xabarlar, tumanimiz xalqining oʻziga xos hayoti, turmush tarzi, erishayotgan yutuqlari va bularning asosi – istiqlolimiz bergan imkoniyatlar haqida hikoya qiluvchi, bolajonlarimizning orzu-intilishlarini ifoda etuvchi koʻrsatuvlar muxlislar qalbidan joy olib ulgurdi. Haftaning 6 kunida efirga uzatiladigan Amudaryo televedeniyesi koʻrsatuvlarini endilikda tumanimiz xalqi mushtoqlik bilan kutadigan boʻlishdi.

Telekanal ishga tushganidan beri oʻtgan uch yilga yaqin vaqt ichida 440 dan ortiq efirda 1400 soatdan ziyod koʻrsatuvlar namoyish qilindi. Shu jumladan 146 ta "Zamin” informatsion dasturida tumanimizning ijtimoiy-iqtisodiy, maʼnaviy-maʼrifiy sohalaridan 600 ga yaqin xabar-lavhalar berildi. Telekanal faoliyati davomida 300 gayaqin turli mavzularda kunning dolzarb mavzulariga oid maxsus koʻrsatuvlar tayyorlandi.

Shuningdek tumanimizning taniqli sanʼatkorlari, sanʼat olamiga endi kirib kelayotgan iqtidorli yoshlarning qoʻshiqlari tomoshabinlarga havola etilmoqda. Bu yurtdoshlarimizga juda maʼqul boʻlayotgani quvonch bilan eʼtirof etishga arziydi.

Shuni alohida taʼkidlash joizki, Qoraqalpogʻiston Respublikasida birinchi internet shaklidagi ommaviy axborot vositasi       www.amunews.uz  veb-saytining muassisi - "Taraqqiyot koʻzgusi” gazetasi tahririyati "Amudaryo televideniyesi” bilan mustahkam ijodiy hamkorlik oʻrnatgan boʻlib, tahririyat xodimlari koʻrsatuvlar tayyorlash jarayonida yelkama-yelka turib mehnat qilmoqdalar. Televideniye – tuman jurnalistlari uchun oʻz qobiliyatlarini namoyish etishga bir minbar boʻldi, desak, adashmagan boʻlamiz.

Televideniyeda yoʻlga qoʻyilgan eng soʻnggi koʻrsatuvlardan biri - "Bugunning nafasi” dasturining 15 dan ortiq sonida 30 tadan ziyod tezkor xabarlar efirga berildi. «Taraqqiyot koʻzgusi» gazetasining internetdagi veb-sayti - www.amunews.uz  bilan hamkorlikda tayyorlanayotgan mazkur koʻrsatuvda veb-saytning 150 dan ortiq xabarlari efirga uzatildi.

Tumanimiz xalqining istiqlol yillarida amalga oshirgan, oshirayotgan keng koʻlamli bunyodkorliklari, erkin fuqarolik jamiyati barpo etish, yurtimizni gullab-yashnagan obod maskanga aylantirish yoʻlidagi izchil odimlarini baholi qudrat yoritib, ularni yanada ezgu ishlarga daʼvat etishda televideniye xodimlari zahmatli jarayonlarni amalga oshirishadi. Ularning mehnatlari mahsuli - rang-barang mavzulardagi koʻrsatuvlar muxlislar qalbidan teran joy olmoqda.

Ayni paytda koʻrsatuvlar faqat tuman hududiga uzatilayotgan boʻlsa, kelgusida kuchli quvvatli teleuzatkichlar oʻrnatish orqali teledasturlarni butun respublikamizga uzatish moʻljallanayapti va davriyligi hozirda haftaning olti kunida kunlik 3 soatdan 18 soatni tashkil qilayotgan boʻlsa, kelgusida efir vaqtini har kuni 6 soatga yetkazish rejalashtirilayapti.

Mamlakatimiz, tumanimizda boʻlayotgan ijtimoiy siyosiy jarayonlarni tezkorlik bilan yoritib borish, yoshlar qalbiga milliy istiqlol gʻoyalarini singdirish, ularni ona yurtimizni eʼzozlashga oʻrgatish, erkin va ilgʻor fikrli barkamol yoshlarni voyaga yetkazishga hissa qoʻyish, aholining madaniy hordiq olishlarini taʼminlash maqsadida Amudaryo televideniyesi ijodiy xodimlari oʻz oldlariga ulkan rejalarni qoʻygan.

"Taraqqiyot koʻzgusi” gazetasi tahririyatining maslakdoshi, tumanimiz hayotini oʻzida baholi qudrat aks ettirayotgan Amudaryo televideniyesining fidoyi ijodiy va texnik xodimlarini 27-iyun – Matbuot va ommaviy axborot vositalari xodimlari kuni bilan samimiy qutlab, ularning faoliyatiga yangidan-yangi ijodiy yutuqlar tilab qolamiz.

Oygul RAJABOVA.

Suratda: Amudaryo televideniyesining operatori Saparboy Nurullayev va suxandon hamda montajchi Shoira Bozorboyeva ish ustida.

M.ShOMURODOV olgan surat.