AMUDARYo TUMANI: INTERNET JURNALISTIKA RIVOJI

Bugun davr bilan hamnafas boʻlishni istagan kishi albatta, atrofimizda sodir boʻlayotgan voqea-hodisalar, yangiliklardan xabardor boʻlib boradi. Axborotni yetkazish haqida gap ketganda aytish kerakki, yaqin-yaqinlargacha ommaviy axborot vositalari asosan matbuot, radio va televideniye koʻrinishlarida tasavvur etilar edi. Biroq, endilikda butun dunyoda Internet-jurnalistikasi ham alohida, kelajak ommaviy axborot vositasi sifatida eʼtirof etilmoqda.

Internet orqali axborot olishning muhim jihatlari shundan iboratki, masalan, agar gazeta har oyda ikki marta chop etilsa, yoki tele - va radiokanallar kuniga maʼlum soat efirga uzatilsa, internet-nashr u yoki bu voqea toʻgʻrisidagi axborotni yangilash borasida cheklanmagan imkoniyatlarga, matn uchun keng maydonga ega. Ikkinchidan, Internetda "ikki tomonlama aloqa” — "feed-back” imkoniyati bor. Har bir foydalanuvchi Internetda chop etilgan materialga oʻzining munosabatini bildirishi, fikrini qoldirishi, qoʻshimcha qilishi yoki axborotni tahrir qilishi mumkin. Shuningdek, saytdagi maqolaga qoʻshimcha elektron manbalarni ilova qilish, ovozli va videomateriallarni joylashtirish mumkin.

Shu jihatlari bilan ommaviy axborot vositasi sifatidagi Internet saytlari bugun millionlab oʻquvchilar auditoriyasiga ega boʻlmoqda. Yurtimizda ham bu kabi informatsion portallar soni va ularning oʻquvchilari kun sayin ortmoqda. Quvonarlisi, 2012-yildan boshlab tumanimizda ham davr talabi asosida ana shunday xayrli ishga qoʻl urildi. Dastlab «Taraqqiyot koʻzgusi» gazetasining Internetdagi rasmiy sahifasi sifatida ish boshlagan www.amunews.uz veb-saytining oʻtgan yil oxirlariga kelib mustaqil OAV sifatida roʻyxatdan oʻtgani nafaqat saytdagi maʼlumotlar hajmining, balki saytga tashrif buyuruvchilar sonining ham sezilarli darajada oshishiga zamin yaratdi. Hozirgi kunda Oʻzbekiston Respublikasida 14 mingdan ziyod internet saytlari roʻyxatdan oʻtgan boʻlsa, www.amunews.uz sayti www.uz portalining top reytingi boʻyicha birinchi mingtalik ichida oʻz oʻrnini topgan. Biz yurtimizdan yiroq boʻlsak ham oʻz tumanimiz hayoti, unda sodir boʻlayotgan ijtimoiy-iqtisodiy voqealardan dunyoning istalgan nuqtasida turib xabardor boʻlish imkoniyatiga ega boʻldik. Bundan tashqari, mazkur sayt keng qamrovliligi bilan ham alohida ajralib turadi. Saytda faqat yangiliklar bilan cheklanib qolmasdan, foto sharhlar, dunyo manzaralari, mashhur shaxslar va sanalar haqida maʼlumotlar, turli xil ijtimoiy soʻrovnomalar joy olgan.

Inson umri davomida axborot oqimida yashaydi, shuningdek kun davomida ham axborot olami bilan yonma-yon hayot kechiradi. Ertalabki nonushta paytida televizor koʻramiz yoki radio tinglaymiz, dam olish vaqtida gazeta yoki jurnal oʻqiymiz. Xizmat xonamizdagi kompyuterni yoqishimiz bilan uni Internetga ulaymiz va yangiliklar oqimiga shungʻiymiz. Endilikda dunyo va mamlakatimizdagi yetakchi axborot agentliklarining veb-sahifalari, mashhur gazetalarning internet talqini bilan tanishishdan tashqari albatta, tumanimiz hayotining Internetdagi koʻzgusi – www.amunews.uz veb-saytiga ham tashrif buyurib, tumanimiz yangiliklari bilan tezkor va qulay tarzda tanishamiz. Darvoqe, saytning mobil versiyasi ham sayt bilan hamroh boʻlishda bizga katta yordam beradi.

Fursatdan foydalanib, ushbu veb-sayt tahririyati xodimlarini 27-iyun – Matbuot va ommaviy axborot vositalari xodimlari kuni bilan chin yurakdan tabriklayman, ishlariga omad tilayman.

Rahmatulla Matqurbonov,

tuman Xalq taʼlimi muassasalari faoliyatini metodik taʼminlash va tashkil etish boʻlimining "Oʻquvchilarni kasb-hunarga yoʻnaltirish va psixologik pedagogik diagnostikasini metodik taʼminlash kichik guruhi” rahbari.