Xalq deputatlari Amudaryo tuman Kengashi QARORI

Oʻzbekiston Respublikasi Oliy Majlisi Qonunchilik palatasi deputatlari tomonidan Qoraqalpogʻiston Respublikasi Amudaryo tumanida hududni rivojlantirishning eng muhim vazifalarini hal etish, fuqarolarning huquqlari, erkinliklari va qonuniy manfaatlarini taʼminlash yuzasidan oʻtkazilgan oʻrganish natijalari toʻgʻrisida

Oʻzbekiston Respublikasi Oliy Majlisi Qonunchilik palatasi deputatlarining Qoraqalpogʻiston Respublikasi Amudaryo tumanida hududni rivojlantirishning eng muhim vazifalarini hal etish hamda fuqarolarning huquqlari, erkinliklari va qonuniy manfaatlarini taʼminlash yuzasidan oʻrganish natijalarini atroflicha muhokama qilib, xalq deputatlari Amudaryo tuman Kengashi taʼkidlaydiki, tumanda oxirgi yillarda ijtimoiy-iqtisodiy rivojlantirish, aholining turmush darajasini yanada oshirish, ularning huquq va manfaatlarini himoya qilish borasida qator ijobiy ishlar amalga oshirilgan.

Oʻzbekiston Respublikasi Prezidentining 2016-yil 5-oktyabrdagi "Tadbirkorlik faoliyatining jadal rivojlanishini taʼminlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qoʻshimcha chora-tadbirlar toʻgʻrisida”gi Farmoni bilan tasdiqlangan Kompleks chora-tadbirlar dasturining mazmun-mohiyatini keng aholi qatlamlariga yetkazish ishlariga jiddiy eʼtibor qaratilmoqda.

Tumanda 2016-yilda sanoat mahsulotlarini ishlab chiqarish hajmi 179,5 mlrd. soʻmni tashkil qilib, 2015-yilga nisbatan 116,5 foizga, xalq isteʼmol tovarlari ishlab chiqarish hajmi 83,3 mlrd. soʻmni tashkil qilib, 107,0 foizga oshgan.

Hududdagi korxonalar tomonidan 8 mln. 174 ming AQSh dollari miqdorida meva-sabzavot mahsulotlari eksport qilingan.

Tumanda 2016-yilda tijorat banklari tomonidan kichik biznes va xususiy tadbirkorlikni rivojlantirish maqsadida 46 mlrd. 85 mln. soʻm miqdorida kredit mablagʻlari ajratilgan.

Shu bilan birga, oʻrganish natijalari tumanda hali oʻz yechimini kutayotgan bir qator masalalar mavjudligini koʻrsatmoqda.

Xususan, aholi bandligini taʼminlash borasida tuman mutasaddi idoralarining faoliyati samaradorligini yanada oshirish maqsadga muvofiq. Ayniqsa, ular tomonidan kasb-hunar kollejlari bitiruvchilarini ish bilan taʼminlashda masʼuliyatsizlikka yoʻl qoʻyilmoqda. Kasb-hunar kollejlari bitiruvchilarining 99,8 foizi ishga joylashtirilganligi haqidagi hisobotning haqqoniyligi tanlov asosida oʻrganilganda, 2 nafar bitiruvchining koʻrsatilgan korxona va tashkilotlarda ishlamayotganligi aniqlandi.

Tumanda maktabgacha yoshdagi bolalar soni 18155 nafarni tashkil etib, shundan 3389 nafari (18,7 foizi) maktabgacha taʼlim muassasalari tomonidan qamrab olingan. Bundan tashqari, ayrim maktabgacha taʼlim muassasalari taʼmirga muhtoj hamda ularning moddiy-texnika bazasi talab darajasida emas.

Aholiga tibbiy xizmat koʻrsatish sifatini oshirish maqsadida mavjud qishloq vrachlik punktlari moddiy-texnika bazasini mustahkamlash kerak. Xususan, tumandagi "Xalimbeg” qishloq vrachlik punkti taʼmirtalab ahvolda. Bu esa, oʻz navbatida, aholiga tibbiy xizmat koʻrsatish sifatiga salbiy taʼsir koʻrsatmoqda. Shuningdek, QVPlarni malakali tibbiyot xodimlari hamda zarur dori-darmonlar bilan taʼminlashga ehtiyoj mavjud.

Tuman aholisini toza ichimlik suvi bilan taʼminlashda jiddiy kamchiliklar mavjud. Jumladan, hududdagi 117,1 ming aholini toza ichimlik suvi bilan taʼminlashga ehtiyoj boʻlib, biroq bugungi kunda bu koʻrsatkich 38 foizni tashkil etmoqda.

Hududda aholini elektr energiyasi bilan taʼminlashda qator muammolar mavjud. Jumladan, elektr energiyasini uzatish liniyalari taʼmirtalab holatda hamda mavjud transformatorlarning aksariyati ortiqcha yuklama bilan ishlamoqda.

Tumandagi mahalliy ahamiyatga molik umumiy foydalanishdagi 269 km. avtomobil yoʻllarining 46,3 km. taʼmirga muhtoj.

Xalq deputatlari Amudaryo tuman Kengashi faoliyatini takomillashtirish, deputatlarning saylovchilar bilan ishlash hamda ular oldidagi masʼuliyatini oshirish, Kengashdagi partiya guruhlari va doimiy komissiyalarning tashabbuskorligini kuchaytirish lozim. Tumandagi ijtimoiy-iqtisodiy sohalardagi mavjud muammolarni bartaraf etish maqsadida partiya guruhlari, doimiy komissiyalar yigʻilishlarida hamda sessiyada tizimli ravishda muhokama qilib borish, shuningdek, deputatlik nazoratini kuchaytirish zarur.

Har bir sohada qonuniylikni taʼminlash, huquqbuzarlikning oldini olish, inson huquqlari va manfaatlarini himoya qilish yuzasidan prokuratura va ichki ishlar organlari rahbarlarining aholi oldida hisobot berish tizimini joriy etishni hayotning oʻzi taqozo qilmoqda.

Qoraqalpogʻiston Respublikasi Amudaryo tumanida hududni rivojlantirishning eng muhim vazifalarini hal etishga, fuqarolarning huquqlari, erkinliklari hamda qonuniy manfaatlarini taʼminlashga doir oʻtkazilgan oʻrganish natijalari toʻgʻrisidagi maʼlumotni atroflicha muhokama qilib, "Mahalliy davlat hokimiyati toʻgʻrisida”gi Oʻzbekiston Respublikasi Qonunining 24-moddasiga muvofiq, Qoraqalpogʻiston Respublikasi xalq deputatlari Amudaryo tuman Kengashi QAROR QILADI:

1. Oʻzbekiston Respublikasi Oliy Majlisi Qonunchilik palatasi deputatlari tomonidan Qoraqalpogʻiston Respublikasi Amudaryo tumanida hududni rivojlantirishning eng muhim vazifalarini hal etish, fuqarolarning huquqlari, erkinliklari va qonuniy manfaatlarini taʼminlash yuzasidan 2017-yil 1–6-mart kunlari oʻtkazgan oʻrganish natijalari maʼlumot uchun qabul qilinsin.

2. Amudaryo tumani hokimining (S.Yoʻldashev) tumanda Oʻzbekiston Respublikasi Oliy Majlisi Qonunchilik palatasi deputatlari tomonidan oʻtkazilgan oʻrganish natijalariga doir axboroti maʼlumot uchun qabul qilinsin.

3. Amudaryo tumani hokimligi (S.Yoʻldashev) oʻrganish davomida aniqlangan kamchiliklarni bartaraf etish yuzasidan aniq kompleks chora-tadbirlar dasturini 10 kun muddatda ishlab chiqib, uning oʻz vaqtida, sifatli va toʻliq bajarilishini taʼminlash, tegishliligi boʻyicha masʼul ijrochilarning shaxsiy javobgarligini oshirish hamda amalga oshirilgan ishlar yuzasidan dasturda belgilangan muddatlarda xalq deputatlari Amudaryo tuman Kengashiga axborot taqdim etilishini taʼminlasin.

4. Amudaryo tumani prokurorining (F.Allaberganov) va tuman ichki ishlar boʻlimi boshligʻining (Q.Ismailov) qonuniylik va huquq-tartibot, fuqarolarning huquqlari, erkinliklari va qonuniy manfaatlari taʼminlanganligi holati toʻgʻrisidagi axboroti maʼlumot uchun qabul qilinsin. Ular mazkur masala yuzasidan, xususan, tumanda jinoyatchilikning oldini olish boʻyicha 10 kun muddat ichida tegishli chora-tadbirlar ishlab chiqsin va ularning ijrosini taʼminlash choralarini koʻrsin.

5. Amudaryo tumani hokimi (S.Yoʻldashev), tuman prokurori (F.Allaberganov) va tuman ichki ishlar boʻlimi boshligʻining (Q.Ismailov) 2017-yil 6 oylik yakunlari boʻyicha hisobotlari xalq deputatlari Amudaryo tuman Kengashida muhokama etilsin.

6. Amudaryo tumani prokuraturasi (F.Allaberganov)ga tumanda qonunlar va boshqa normativ-huquqiy hujjatlarning mazmun-mohiyatini fuqarolarga tushuntirish, ular ijrosini aniq va bir xilda bajarilishi yuzasidan nazorat samaradorligini oshirish topshirilsin.

7. Qoraqalpogʻiston Respublikasi Oʻrta maxsus, kasb-hunar taʼlimi boshqarmasidan (A.Ayapov) Amudaryo qishloq xoʻjalik kasb-hunar kolleji direktorining (M.Yuldashev) ish faoliyatida yoʻl qoʻygan xato-kamchiliklari uchun uni egallab turgan lavozimiga loyiqligi masalasini koʻrib chiqish soʻralsin.

8. "Amudaryotumangaz” filiali (Sh.Tajibayev)ga aholini tabiiy gaz bilan taʼminlash hamda ularga suyultirilgan gaz ballonlarini oʻz vaqtida yetkazib berilishini doimiy nazoratga olish va mavjud qarzdorlikni bartaraf etish choralarini koʻrish topshirilsin.

9. Tuman obodonlashtirish boshqarmasi (Sh.Turayev) tuman hududidagi maishiy chiqindilarni oʻz vaqtida olib chiqish choralarini koʻrishdagi xato-kamchiliklari uchun ogohlantirilsin.

10. "Tuyamoʻyin-Nukus” suv-quvurlaridan foydalanish boshqarmasi "Amudaryo tuman suv tarmoqlari” filiali (A.Rajapov)ga aholini toza ichimlik suvi bilan taʼminlash, suv quvurlarini qurish va mavjudlarini taʼmirlash borasida yoʻl qoʻyilgan kamchiliklarni bartaraf etish choralarini koʻrish hamda uch oy muddatda amalga oshirilgan ishlar yuzasidan xalq deputatlari Amudaryo tuman Kengashiga axborot taqdim etish topshirilsin.

11. Tuman tibbiyot birlashmasi (O.Xalimov) aholiga birlamchi tibbiy-sanitariya yordami koʻrsatilishi darajasi va sifatini, qishloq vrachlik punktlari (QVP) faoliyati samaradorligini oshirish, shoshilinch tibbiy yordam koʻrsatilishini yanada yaxshilash, tibbiyot muassasalarini malakali kadrlar bilan taʼminlashga jiddiy eʼtibor qaratish topshirilsin hamda 2017-yil 6 oylik yakunlari boʻyicha amalga oshirilgan ishlar toʻgʻrisidagi hisoboti xalq deputatlari Amudaryo tuman Kengashi sessiyasi majlisida koʻrib chiqilsin.

12. Tuman bandlikka koʻmaklashish markazi (A.Xujamuratov)ga tumanda 2017-yilga aholi bandligi Dasturi parametrlarining oʻz vaqtida, sifatli va toʻliq bajarilishini monitoring qilib borish va aniqlangan kamchiliklarni bartaraf etish choralarini koʻrish topshirilsin.

2017 yil 6 oylik yakunlari boʻyicha amalga oshirilgan ishlar toʻgʻrisida Xalq deputatlari Amudaryo tuman Kengashi sessiyasida hisobotini eshitish belgilab qoʻyilsin.

13. Xalq deputatlari Amudaryo tuman Kengashi, uning doimiy komissiyalari raislari va partiya guruhlari aʼzolari oʻz vakolatlari doirasida Kengash va uning doimiy komissiyalari faoliyatini yanada takomillashtirsin, qonunda belgilangan vakolatlaridan samarali foydalanishini doimiy tahlil va muhokama qilib borsin.

14. Tuman hokimi, prokurori va ichki ishlar boʻlimi boshligʻi hamda boshqa masʼul tashkilotlar, muassasalar rahbarlari xalq deputatlari Amudaryo tuman Kengashining mazkur Qarori ijro etilishi yuzasidan joriy yilning 1-iyul va 1-dekabr holatiga koʻra axborot bersin.

15. Ushbu qaror "Taraqqiyot koʻzgusi” gazetasida va tuman hokimligining rasmiy veb-saytida eʼlon qilinsin.

16. Mazkur qarorning ijrosini nazorat qilish xalq deputatlari Amudaryo tuman Kengashining doimiy komissiyalari zimmasiga yuklatilsin.

17. Ushbu qaror qabul qilingan kundan eʼtiboran kuchga kiradi.

Sessiya raisi: 24-sonli "Oq oltin” saylov okrugidan deputat R.Urazbayev.

Sessiya kotibi: 17-sonli "Boʻzyop” saylov okrugidan deputat G.Matyakubova.

2017-yil 6-mart. 111/30-05-son.