Xalq deputatlari Amudaryo tuman Kengashining 35-sessiyasi toʻgʻrisida AXBOROT

2017-yil 29-iyul kuni xalq deputatlari tuman Kengashining oʻttiz beshinchi sessiyasi boʻlib oʻtdi. Sessiyada tuman Kengashi deputatlari, tuman hokimi oʻrinbosarlari, hokimlik masʼul xodimlari, huquqni muhofaza qilish organlari, hokimlik boʻlimlari, tijorat banklari, kasb-hunar kollejlari, jamoat tashkilotlari rahbarlari hamda ommaviy axborot vositalari vakillari ishtirok etdi. 

Sessiyani tuman Kengashi raisi, tuman hokimi S.Yoʻldashev ochdi va olib bordi. Sessiya kotibligiga 21-Oʻzbekiston saylov okrugidan deputat R.Yerlapasov saylandi.

Sessiya kun tartibiga "Xalq bilan muloqot va inson manfaatlari yili” tuman hududiy dasturining 2017-yil birinchi yarim yilligidagi ijrosi toʻgʻrisida”gi, "Amudaryo tumanida 2017-yil ish oʻrinlarini yaratish va aholi bandligini taʼminlash dasturining ijrosi toʻgʻrisida”gi, "Tumandagi tijorat banklari tomonidan tadbirkorlikni rivojlantirish va ish oʻrinlarini tashkil qilish maqsadida kredit mablagʻlarining ajratilishi toʻgʻrisida tuman hokimi birinchi oʻrinbosarining hisoboti toʻgʻrisida”gi, "Amudaryo tumani mahalliy byudjetining 2017-yil birinchi yarim yilligidagi ijrosi toʻgʻrisida”gi hamda "Xalq deputatlari tuman Kengashining Sanoat, transport, qurilish, kommunal xoʻjaligi masalalari va aholiga xizmat koʻrsatish boʻyicha doimiy komissiyasi faoliyati yuzasidan komissiya raisining hisoboti toʻgʻrisida”gi va boshqa masalalar havola qilindi.

Kun tartibidagi birinchi masala yuzasidan tuman hokimi oʻrinbosari, Xotin-qizlar qoʻmitasi raisi M.Ahmedova axborot berdi. Axborotda2017 — 2021-yillardaOʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini "Xalq bilan muloqot va inson manfaatlari yili”da amalga oshirishga oid tuman dasturi doirasida amalga oshirilayotgan ishlar xususida soʻz yuritildi.

Jumladan, birgina hududlarni kompleks rivojlantirish dasturlari va Aholi bandligini taʼminlash dasturi doirasida sanoat sohasida 39 ta loyiha amalga oshirilib, 526 ta ish oʻrni yaratilishi, qishloq xoʻjaligi sohasida 105 ta loyiha amalga oshirilib, 291 ta ish oʻrni yaratilishi, xizmat koʻrsatish sohasida esa 107 ta loyiha amalga oshirilib, 268 ta ish oʻrni yaratilishi rejalashtirilgan va bu boʻyicha amaliy ishlar olib borilmoqda.

Kun tartibidagi ikkinchi va uchinchi masalalar yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyev soʻzga chiqib, tumanida 2017-yil ish oʻrinlarini yaratish va aholi bandligini taʼminlash dasturining ijrosi hamda tijorat banklari tomonidan tadbirkorlikni rivojlantirish va ish oʻrinlarini tashkil qilish maqsadida kredit mablagʻlarining ajratilishi toʻgʻrisida axborot berdi.

Axborotda qayd qilinganidek, 2017-yilda yangi ish oʻrinlarini tashkil etish va aholi bandligini taʼminlash Dasturi boʻyicha 3030 ta yangi ish oʻrinlari yaratish rejalashtirilgan boʻlib, joriy yilning 6 oyi davomida amalda 1186 ta yangi ish oʻrinlari yaratilib, yarim yillik rejasi 101,7 foizga bajarilgan. Hisobot davrida tadbirkorlik subʼektlariga tijorat banklari tomonidan umumiy qiymati 44 mlrd. 404,4 mln. soʻm miqdorida kredit mablagʻlari ajratilgan.

Kun tartibidagi toʻrtinchi masala boʻyicha tuman moliya boʻlimi mudiri vazifasini vaqtincha bajaruvchi B.Kamolov axborot berdi. Axborotda 2017-yilning birinchi yarmi uchun tuman mahalliy byudjetining daromadlar qismi rejasi 16 mlrd 997 mln 548 ming soʻmga belgilangan boʻlib, haqiqatda 18 mlrd 491 mln 904 ming soʻmga, yaʼni 108,8 foizga bajarilgani, xarajatlar qismi rejasi esa 52 mlrd 652 mln 441 ming soʻmga belgilangan boʻlib, ushbu mablagʻlar asosan ijtimoiy-madaniy va aholini qoʻllab-quvvatlash xarajatlariga, iqtisodiyot sohasida olib borilayotgan islohotlar talablarini amalga oshirish tadbirlariga sarflangani qayd etildi.

Kun tartibidagi beshinchi masala boʻyicha Kengashning Sanoat, transport, qurilish, kommunal xoʻjaligi masalalari va aholiga xizmat koʻrsatish boʻyicha doimiy komissiyasi raisi M.Sadullayev soʻzga chiqib, doimiy komissiya faoliyati yuzasidan hisobot berdi. Hisobotda doimiy komissiya majlislari, doimiy komissiya aʼzolari tomonidan saylovchilar bilan oʻtkazilgan uchrashuvlar, deputatlar tomonidan tashkil qilingan fuqarolar qabuli, tashkilotlar va muassasalarning rahbarlariga, mansabdor shaxslarga yuborilgan deputat soʻrovlari boʻyicha batafsil maʼlumotlar berildi.

Sessiyada Amudaryo akademik litseyi direktori lavozimida ishlab kelayotgan Yoʻldoshov Otabek Yoʻldosh oʻgʻli tuman xalq taʼlimi muassasalari faoliyatini metodik taʼminlash va tashkil etish boʻlimi mudiri lavozimiga tayinlangani munosabati bilan "Mahalliy davlat hokimiyati toʻgʻrisida”gi Qonunga muvofiq O.Yoʻldoshovni ushbu lavozimga tasdiqlash masalasi muhokama qilinib, bu masala boʻyicha qaror loyihasi deputatlar tomonidan bir ovozdan tasdiqlandi.

Shuningdek, sessiyada tuman Kengashi vakolatiga kiruvchi boshqa masalalar ham muhokama qilindi. Kun tartibidagi barcha masalalar boʻyicha tegishli qarorlar qabul qilindi va shuning bilan sessiya oʻz ishini yakunladi.