Amudaryo tumanida 2017-yil ish oʻrinlarini yaratish va aholi bandligini taʼminlash dasturining ijrosi toʻgʻrisida

Xalq deputatlari Amudaryo tuman Kengashi QARORI

Amudaryo tumanida 2017-yil ish oʻrinlarini yaratish va aholi bandligini taʼminlash dasturining ijrosi toʻgʻrisida

Amudaryo tumanida 2017-yil 6 oyida ish oʻrinlarini yaratish va aholi bandligini taʼminlash dasturining ijrosi toʻgʻrisidagi masala yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyevning axborotini tinglab va muhokama qilib, "Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-, 24-moddalariga asosan xalq deputatlari tuman Kengashi QAROR QILADI:

1. Amudaryo tumanida 2017-yil 6 oyida ish oʻrinlarini yaratish va aholi bandligini taʼminlash dasturining ijrosi toʻgʻrisidagi masala yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari M.Temirboyevning axboroti maʼlumot uchun qabul qilinsin.

2. Amudaryo tumanida 2017-yil ish oʻrinlarini yaratish va aholi bandligini taʼminlash dasturining 6 oyidagi ijrosi qoniqarli deb topilsin.

3. 2017-yilda yangi ish oʻrinlarini tashkil etish va aholi bandligini taʼminlash Dasturi boʻyicha 3030 ta yangi ish oʻrinlari yaratish rejalashtirilgan boʻlib, joriy yilning 6 oyi davomida amalda 1186 ta yangi ish oʻrinlari yaratilib, reja 101,7 foizga bajarilganligi qayd etib oʻtilsin.

4. Tuman hokimining iqtisodiyot va ijtimoiy rivojlantirish masalalari boʻyicha birinchi oʻrinbosari M.Temirboyevga dasturga muvofiq joriy yilning ikkinchi yarim yilligida tijorat banklari tomonidan kredit mablagʻlari oʻz vaqtida ajratilmasa 1814 ta yangi ish oʻrinlari yaratilishi xavf ostida qolishi ehtimoli mavjudligi koʻrsatib oʻtilsin hamda ushbu kamchiliklarni bartaraf qilish, shuningdek, kollej bitiruvchilarining toʻliq bandligini taʼminlash yuzasidan tegishli choralarni koʻrish topshirilsin.

5. Tuman hokimligi (M.Temirboyev), tuman iqtisodiyot va hududni kompleks rivojlantirish boʻlimi (R.Salayev):

- tumanning ijtimoiy-iqtisodiy rivojlanishini taʼminlash, islohotlarni yanada chuqurlashtirish, bandlik koʻrsatkichlari oʻsishining muhim manbalari hisoblangan kichik korxonalar va mikrofirmalarni tashkil etish, shuningdek, ishlab chiqarishni modernizatsiyalash va texnologik jihatdan yangilash boʻyicha aniq ilojlarni belgilasin;

- dasturda belgilangan koʻrsatkichlarning oʻz vaqtida va toʻliq bajarilishini, jumladan yangidan ishlab chiqarish obʼektlarini ishga tushirish va uy mehnatining barcha turlarini rivojlantirish orqali yangi ish oʻrinlarini tashkil etishni amalga oshirsin;

- dasturda belgilangan prognoz parametrlarining bajarilishida amalga oshirilayotgan ilojlarni yanada jadallashtirish, shuningdek tegishli miqdorda imtiyozli kreditlar ajratish, fermer va dehqon xoʻjaliklarini rivojlantirish hisobidan ish oʻrinlari sonini koʻpaytirishga alohida eʼtibor qaratsin;

- prognoz parametrlarining chuqur tahlil qilib, bandlik koʻrsatkichlarini koʻtarish ilojlarini belgilasin va natijalarini 2016-yilning toʻqqiz oyi yakuni bilan koʻrib chiqsinlar.

6. Tuman bandlikka koʻmaklashish markazi (A.Xujamuratov)ga :

- mehnat bozoridagi holatni tahlil qilib borish hamda ish izlovchilarni tegishli axborot bilan taʼminlash ishlarini yanada yaxshilash;

- boʻsh ish joylarini (vakant lavozimlarni) va ishga joylashtirish masalasida murojaat qilgan fuqarolarning hisobini yuritishda aniqlik va tezkorlik asosida ish olib borish;

- ish soʻrab murojaat qilgan fuqarolarga va ish beruvchilarga ish topish hamda ishchi kuchi bilan taʼminlash imkoniyatlari toʻgʻrisida, kasblarga va xodimlarga nisbatan qoʻyilayotgan talablar hamda ish bilan taʼminlashga doir boshqa masalalar toʻgʻrisida maslahatlar berish tizimini yaxshilash;

- ishsiz fuqarolarni kasbga oʻrgatish, qayta oʻqitish va malakasini oshirishni tashkil etish toʻgʻrisida oʻquv yurtlari, muassasalar, tashkilotlar va korxonalar bilan shartnomalar tuzish topshirilsin.

7. Fuqarolarning oʻzini oʻzi boshqarish organlari raislari:

- tegishli hududlarda yangi ish oʻrinlarini yaratish, shu jumladan tadbirkorlikni rivojlantirish maqsadida "Maslahat markazlari” faoliyatini yanada jonlantirish choralarini koʻrsinlar;

- yaratilgan yangi ish oʻrinlarining saqlanib qolinishi hamda bandlik dasturining hududlar kesimida amalga oshirilishi ustidan jamoatchilik nazoratini oʻrnatsinlar.

8. Xalq deputatlari tuman Kengashi deputatlariga oʻz saylov okruglarida tadbirkorlik va kichik biznes subʼektlari tashkil qilishda faol ish olib borish hamda oilaviy tadbirkorlikni keng targʻib qilish orqali yangi ish oʻrinlarini  yaratish, shu orqali bandlik dasturining hududlar kesimida toʻliq ijro qilinishini taʼminlashga oʻz hissalarini qoʻshish topshirilsin.

9. Ushbu qaror "Taraqqiyot koʻzgusi” gazetasida, xalq deputatlari tuman Kengashi va tuman hokimligining rasmiy veb-saytlarida eʼlon qilinsin.

10. Ushbu qarorning ijrosini nazorat qilish xalq deputatlari tuman Kengashining mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari doimiy komissiyasi raisi M.Kazakov zimmasiga yuklatilsin.

11. Ushbu qaror qabul qilingan kundan eʼtiboran kuchga kiradi.

Xalq deputatlari Amudaryo tuman

Kengashi raisi:                                                 S.Yoʻldashev

2017-yil 29-iyul,

№ 129/35-05