YoShLARGA OID DAVLAT SIYoSATI – TARAQQIYoTIMIZ KAFOLATI

Mana, yigirma olti yildirki, mustaqil yurtimizda Mustaqillik kunini eng ulugʻ bayram sifatida katta quvonch va tantana bilan kutib olish ezgu qadriyatga aylangan. Bunda davlatimiz rahbarining sana munosabati bilan qabul qilgan qarorlari muhim dasturilamaldir. Bu yil ham Prezidentimizning "Oʻzbekiston Respublikasi Davlat mustaqilligining yigirma olti yillik bayramiga tayyorgarlik koʻrish va uni oʻtkazish toʻgʻrisida”gi qarori matbuotda eʼlon qilindi. Undagi "Fidoying boʻlgaymiz seni, Oʻzbekiston!” degan ezgu gʻoya muqaddas bayramimizning bu yilgi bosh shioriga, aylandi.

Mustaqillikka erishish ostonasida Birinchi Prezidentimiz yangi davlat va jamiyatni barpo etish bilan bogʻliq kun tartibidagi eng muhim masalalardan biri sifatida yoshlarga oid davlat siyosati hamda uni amalga oshirish mexanizmini ishlab chiqish vazifasini qoʻygani bejiz emas.

Bugungi kunda ham yoshlarimizni ijtimoiy-siyosiy xavf-xatarlardan, mafkuraviy xurujlar majmuasi boʻlmish maʼnaviy tahdidlardan himoya qilish kun tartibidagi eng dolzarb muammolardan boʻlib qolmoqda.

Yangi tahrirdagi "Yoshlarga oid davlat siyosati toʻgʻrisida”gi Qonunning hayotga tatbiq qilinishi ertamiz egalarining huquq hamda qonuniy manfaatlarini mustahkamlash, yoshlarga oid davlat siyosatini amalga oshirishda davlat organlari va boshqa tashkilotlarning masʼuliyatini kuchaytirish, sohada koʻrilayotgan chora-tadbirlar samaradorligini yuksaltirish imkonini beradi. Unda yoshlar boʻyicha davlat siyosatining maqsad va tamoyillarigina emas, balki bugungi kun nuqtai nazaridan ular bilan bogʻliq oʻta printsipial masalalar oʻz aksini topgan. Iqtidorli oʻgʻil-qizlarni ragʻbatlantirish, yoshlar tadbirkorligini qoʻllab-quvvatlash, ular uchun zarur ijtimoiy xizmatlar tizimini yaratish, yosh oilalarga ijtimoiy yordam koʻrsatish, voyaga yetmaganlar, shuningdek, yoshlar qatlamining ayrim toifalarini ijtimoiy muhofaza qilish ana shular jumlasidandir.

Qonunning eng muhim jihatlaridan biri – bu yoshlarga oid davlat siyosatini amalga oshirishda mahallalar, nodavlat notijorat tashkilotlari, ommaviy axborot vositalarining oʻrni aniq belgilab qoʻyilganidadir. Ayniqsa, mazkur tuzilmalar huquqlarida yoshlarga oid davlat siyosati sohasidagi qonun hujjatlarining ijro etilishi, davlat dasturlarining va hududiy dasturlarning roʻyobga chiqarilishi ustidan jamoatchilik nazoratini amalga oshirish belgilangani mamlakatimizda «Kuchli davlatdan – kuchli fuqarolik jamiyati sari» kontseptsiyasini amalga oshirishda, demokratik islohotlarni yanada chuqurlashtirishda muhim ahamiyatga egadir.

Umuman olganda, Qonun yoshlarning huquqlari va qonuniy manfaatlarini mustahkamlashga, yoshlarga oid davlat siyosatini roʻyobga chiqarishda davlat organlari hamda boshqa tashkilotlar masʼuliyatini kuchaytirishga xizmat qiladi.

Muqaddas BEKNAZAROVA,

40-son umumiy oʻrta taʼlim maktabi direktorining maʼnaviy-maʼrifiy ishlar boʻyicha oʻrinbosari.