YoShLARIMIZGA IShONAMIZ

Tumanimizdagi umumtaʼlim maktablarida bolalar sportini rivojlantirish va sport bazasini mustahkamlashga alohida eʼtibor qaratilmoqda. Bolalar va oʻquvchi-yoshlar oʻrtasida sogʻlomlashtirish va sport tadbirlari muntazam ravishda oʻtkazilmoqda.  Umumtaʼlim maktablarida jami 31466 nafar oʻquvchi-yoshlar taʼlim oladi, shundan 15431 nafarini qiz bolalar tashkil qiladi. "Umid nihollari” sport musobaqalarining hududiy va tuman bosqichida sportning 15 turi boʻyicha jami 12269 nafar oʻquvchilar ishtirok etgan boʻlsa, ularning

3991 nafari qiz bolalardir.

Bu yilgi "Umid nihollari – 2017” sport musobaqalari qizgʻin va doʻstona kurashlar ostida oʻtdi. Musobaqalarning Qoraqalpogʻiston Respublikasi hududiy va final bosqichida tumanimizdan jami 150 nafar oʻgʻil bolalar, 50 nafar qiz bolalar ishtirok etdilar.

Musobaqalarda oʻquvchi-yoshlarimiz sportning shaxmat turi boʻyicha faxrli birinchi, oʻzbek jang sanʼati, dzyu-do, kurash, stol tennisi boʻyicha ikkinchi va uchinchi, boks sporti, ogʻir atletika, yengil atletika, belbogʻli kurash, futbol va voleybol turlari boʻyicha toʻrtinchi oʻrinlarni egalladilar.

Bolalar qalbida sportga muhabbat hissini uygʻotish, oʻsib kelayotgan yosh avlod ongida sport bilan shugʻullanib, sogʻlom yashash koʻnikmasini qaror toptirish, jismoniy va maʼnaviy komillikka intilish tuygʻusini shakllantirish, ularni salbiy taʼsirlardan himoya qilish va zararli odatlardan xalos etishga doir chora-tadbirlar har bir taʼlim muassasasida amalga oshirilmoqda.

Taʼlim muassasalarida jismoniy tarbiya, sogʻlomlashtirish va sport inshootlaridan maqsadli foydalanish boʻyicha qatʼiy nazorat oʻrnatilgan. Oʻquvchi-yoshlarning sport toʻgaraklariga tizimli ravishda qatnashishini taʼminlash masalasi  doimiy eʼtiborda.

Olimpiada oʻyinlari dasturiga kiritilgan sport turlari boʻyicha shugʻullanuvchi bolalar va oʻsmirlar soni yildan-yilga oshib bormoqda. Bugungi kunda maktablardagi jismoniy sogʻlomlashtirish guruhlarida sport bilan shugʻullanuvchilarning 80,67 foizini olimpiya oʻyinlari sport turi bilan shugʻullanuvchi bolalar tashkil qiladi. Sport toʻgaraklari faoliyati  esa toʻliq yoʻlga qoʻyilgan. 275 nafar jismoniy tarbiya fani oʻqituvchilari darsdan tashqari vaqtda sportning 11 ta turi boʻyicha 742 ta guruhda oʻquvchilarga sport toʻgaraklari mashgʻulotlarini olib borishmoqda.

Xulosa qilib aytganda, tumanimiz umumtaʼlim maktablari oʻquvchi-yoshlari orasida tumanimiz va mamlakatimiz sharafini munosib himoya qilishga qodir sportchi-yoshlar yetishib chiqadi, deya faxrlanishga toʻla haqlimiz. Chunki, oʻquvchi-yoshlarimiz tuman, Qoraqalpogʻiston Respublikasi va mamlakatimiz miqyosidagi nufuzli bellashuvlarda sovrindorlar safidan joy olmoqdalar. Ular kamolot pillapoyalaridan yuksalib, albatta, jahonning eng nomdor sportchilari bilan bellashishga qodir jismonan yetuk va maʼnaviyatli yoshlar sifatida kamol topadilar.

Gʻulomjon Qurbonboyev, tuman XTMFMTTE boʻlimi uslubchisi.