EZGU IShLARGA QODIR YoShLARMIZ
Men ziyoli oilada tugʻilganman. Esimni taniganimdan beri badiiy adabiyotga oshnoman. Aziz onajonim, 3-sonli Amudaryo akademik litseyi ingliz tili fani oʻqituvchisi Orzigul Ibragimova mening hayotdagi eng yaqin doʻstim, maslahatgoʻyim, aziz ustozim, desam mubolagʻa qilmagan boʻlaman. Sababi, aziz onajonim men hali oʻqish-yozishni bilmasimdan avval adabiyotning sirli olamiga olib kirdilar. U kishining aytgan ertaklari dunyosida ulgʻaydim. Qoʻlimdan ish keladigan boʻlganida qiz bola uchun eng muhim boʻlgan hunar – pazandalikni oʻrgatdilar.
Tumanimizdagi mashhur "Tamara-Feruza” xususiy korxonasi rahbari, tikuvchi-modeler Tamara opa Yunusovaga shogirdlikka berganlarida hali kichkina qizaloq edim. "Oʻrganganing oʻzingniki, tajribang oshsa - elniki”, - deydilar onajonim.
Baʼzan bitta chokning ustida soatlab ishlagan, ustozimdan dakki eshitgan paytlarimda, garchi oʻzim qiziqsam-da chevarlikni tashlab ketgim kelardi. "Sabr qil, qizim, sabr-qanoat ezgu ishlarga qanot beradi”, - deya yana menga kuch bagʻishlardi onam.
Haqiqatan ham onajonimning, ustozlarimning taʼlim va tarbiyasi bois, dilimda qatʼiyat uygʻondi, ezgulik tomon shaylandim goʻyo. 3-sonli akademik litseyning 2-bosqichini tamomlab, taʼtilga chiqqanimda Toshkent shahridagi "Mashhura” firmasida dizayn yoʻnalishi boʻyicha oʻqib, tajriba orttirdim. Bularning barchasi meni muvaffaqiyatlar sari yetakladi. 2009-yil noyabr va 2010-yil may oylarida Toshkent shahrida oʻtkazilgan "Qoʻli guldir oʻzbek ayolin” koʻrgazma-yarmarkasida oʻzim tikkan liboslar dizaynlari bilan ishtirok etib, sovrinli oʻrinni egalladim. Shu yili "Doʻppi tikdim, ipaklari tillodan” koʻrik-tanlovining avval tuman, soʻngra Qoraqalpogʻiston Respublikasi bosqichida faxrli 1-oʻrin sohibi boʻldim.
Oʻz ustimda ishlash, yangilik yaratishga intilish tuygʻusi men uchun yangi muvaffaqiyatlar sari yoʻl ochdi. Oʻzbekiston madaniyati va sanʼati forumi jamgʻarmasi, "Kamolot” YoIH markaziy Kengashi, oliy va oʻrta maxsus taʼlim Vazirliklari hamkorlikda oʻtkazgan "Kelajak ovozi - 2010” koʻrik-tanlovida "Liboslar dizayni” yoʻnalishi boʻyicha 1-oʻrinni egalladim hamda ushbu yoʻnalish boʻyicha xalqaro miqyosda, Moskva shahrida boʻlib oʻtadigan koʻrik-tanlovga yoʻllanma oldim.
Men Moskva shahrida boʻlib oʻtgan bellashuvda "Mening dizaynim” yoʻnalishi boʻyicha faxrli 3-oʻrinni egalladim. Qoraqalpoq milliy kashtachiligi, tumanimiz xalqining milliy oʻziga xosligini aks ettiruvchi kashtalar bilan bezatilib tikilgan liboslarim dizayni tanlov tashkilotchilari tomonidan yuqori baholandi. Ushbu nufuzli xalqaro tanlovda Oʻzbekiston, Qoraqalpogʻiston va mening ona elim Amudaryo tumani, Mangʻit shahri, hatto qadrdon akademik litseyim nomlari bir necha tillarda qayta-qayta jaranglab, ismu sharifim eʼtibor bilan tilga olindi. Men olib borgan chevarlik namunalari sharqona dizayndagi liboslar jahon xalqlariga koʻz-koʻz qilindi.
Oʻsha lahzalarda men Oʻzbekiston farzandi ekanligimdan, shu qutlugʻ zaminga tomir otib, unib-oʻsayotganimdan faxrlandim. Va ana shu tuygʻu meni yanada yangi orzular yoʻliga yetakladi. 2012-yilda Nizomiy nomidagi Toshkent Davlat Pedagogika Universitetining boshlangʻich taʼlim metodikasi fakultetiga davlat granti asosida oʻqishga kirdim.
" – Istiqbolga dadil boqib, ezgu ishlarga shaylangan har bir oʻgʻil-qiz mening faxr-u iftixorim”, - degan edi Prezidentimiz I.A.Karimov. Biz yoshlarning istiqbolimiz, kela-jagimiz uchun mamlakatimizda buyuk imkon eshiklari hamisha ochiq ekan, har birimiz ezgu ishlar, ulugʻvor kashfiyotlar qilishga qodirmiz.
Zuhra YeRNAFASOVA,
Toshkent Davlat Pedagogika Universiteti
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
