Tadbirkorlar diqqatiga: ulgurji savdo faoliyatini litsenziyalash shartlari yengillashtirilishi mumkin

Oʻzbekiston Pespublikasi Vazirlar Mahkamasining “Ulgurji savdo faoliyatini litsenziyalash toʻgʻrisidagi nizomga oʻzgartirish va qoʻshimchalar kiritish haqida”gi qarori loyihasi loyihasi normativ huquqiy hujjatlarning muhokamasi portaliga joylashtirildi.

Loyihaga koʻra, ulgurji savdo faoliyatini amalga oshirish uchun litsenziya talablaridan biri – amaldagi eng kam oylik ish haqining kamida 3500 baravari (hozirgi kunda 602 million 840 ming soʻm) miqdorida, ulardan eng kam oylik ish haqining kamida 1200 baravari (206 million 688 ming soʻm) miqdorida pul mablagʻlari bilan shakllantirilgan ustav fondining mavjud boʻlishi sharti tadbirkorlar foydasiga yengillashtirilmoqda.

Agar mazkur hujjat maʼqullanib, kuchga kirsa, ushbu shartni bajarish uchun eng kam oylik ish haqining kamida 1000 baravari (172 million 240 ming soʻm) miqdorida, ulardan eng kam oylik ish haqining kamida 100 baravari (17 million 224 ming soʻm) miqdorida pul mablagʻlari bilan shakllantirilgan ustav fondining mavjud boʻlishi kifoya qiladi.

Qaror loyihasidagi yana bir oʻzgarish – yuqorida koʻrsatilgan miqdorda shakllantirilgan ustav fondining mavjud boʻlishi hamda majburiy tartibda sertifikatlanishi kerak boʻlgan tovarlar sotilgan taqdirda muvofiqlik sertifikatlari yoki mahsulot ishlab chiqaruvchi korxonalarda sertifikatlanganligi toʻgʻrisidagi maʼlumotlar yoxud ularning nusxalari mavjud boʻlishi haqidagi talab qishloq xoʻjaligi mahsulotlarini eksport qiluvchi korxonalarga nisbatan tatbiq qilinmaydi.

Shuningdek, litsenziya olishda yuridik shaxs davlat roʻyxatidan oʻtganligi haqidagi guvohnomani taqdim etish toʻgʻrisidagi talab ham bekor qilinadi.
Loyiha oʻzgartirilishi, toʻldirilishi yoki rad etilishi mumkin.

Ayni paytda ushbu hujjatning muhokamasi yakunlangan.

Gʻ.Yeshniyozov tayyorladi