Xalq deputatlari Amudaryo tuman Kengashining boʻshab qolgan oʻrinlarga 2017-yil 17-dekabrda boʻlib oʻtgan saylov natijalari toʻgʻrisida AXBOPOT

Xalq deputatlari tuman Kengashiga saylov boʻyicha tuman saylov komissiyasi tomonidan 2017-yil 16-noyabr kuni “Xalq deputatlari Amudaryo tuman Kengashida boʻshab qolgan oʻrinlarga deputatlar saylovini oʻtkazish kunini belgilash toʻgʻrisida” qaror qabul qilinib, qarorga muvofiq 2017-yil  17-dekabr kuni 1-Navoiy, 10-Toshyop saylov okruglarida deputatlar saylovi boʻlib oʻtdi.

Tuman saylov komissiyasining qaroriga muvofiq saylovga tayyorgarlik koʻrish va uni oʻtkazish boʻyicha chora-tadbirlar rejasi ishlab chiqildi va tasdiqlandi.

Xalq deputatlari Amudaryo tuman Kengashiga saylov oʻtkazuvchi 2 ta  okrug saylov komissiyasi va 2 ta uchastka saylov komissiyalari tarkibi tasdiqlandi.

Uchastka saylov komissiyalari joylashgan xonalar “Oʻzbekiston Pespublikasi Oliy Majlisi Qonunchilik palatasiga, xalq deputatlari viloyat, tuman va shahar Kengashlariga saylov oʻtkazuvchi uchastka saylov komissiyalari ishini tashkil qilishga oid Oʻzbekiston Pespublikasi Markaziy saylov komissiyasining eslatmasi”ga asosan toʻliq jihozlandi.

Saylovga tayyorgarlik koʻrish va uni oʻtkazish okrug va uchastka saylov komissiyalari tomonidan ochiq va oshkora amalga oshirildi. Saylovlar umumiy, teng va toʻgʻridan-toʻgʻri, yashirin ovoz berish yoʻli bilan oʻtkazildi.

Xalq deputatlari tuman Kengashi deputatligiga siyosiy partiyalar tomonidan jami 4 nafar, jumladan, Tadbirkorlar va ishbilarmonlar harakati – Oʻzbekiston Liberal demokratik partiyasidan 1 nafar, “Adolat” sotsial demokratik partiyasidan 1 nafar, “Milliy tiklanish” demokratik partiyasidan 1 nafar, Oʻzbekiston Xalq demokratik partiyasidan 1 nafar nomzod koʻrsatildi. Koʻrsatilgan nomzodlarning barchasi tuman saylov komissiyasi tomonidan roʻyxatga olindi.

Saylovga doir barcha materiallar “Taraqqiyot koʻzgusi” gazetasida eʼlon qilindi. Saylovga tayyorgarlik jarayoni Amudaryo televideniyesi, “Taraqqiyot koʻzgusi” va “Mening oilam” gazetalari hamda amunews.uz veb-saytida, shuningdek, tuman hokimligi va xalq deputatlari tuman Kengashining rasmiy saytlarida yoritib borildi.

Oʻrni boʻshab qolgan saylov okruglari boʻyicha 4554 nafar fuqaro saylovchilar roʻyxatiga kiritilib,  2017-yil 17-dekabr kungi saylovda ularning 3870 nafari, yaʼni 84,9 foizi ishtirok etdilar.

Okrug saylov komissiyalarining xalq deputatlari tuman Kengashiga saylovlar boʻyicha saylov natijalari haqida taqdim qilgan yigʻilish bayonlarini tekshirib chiqib, tuman saylov komissiyasi barcha saylov okruglarida saylovlar Oʻzbekiston Pespublikasining “Xalq deputatlari viloyat, tuman va shahar Kengashlariga saylovlar toʻgʻrisida”gi Qonuniga muvofiq ravishda oʻtkazilganligini qayd qiladi.

Saylov natijalariga koʻra, xalq deputatlari tuman Kengashiga saylangan quyidagi deputatlar tuman saylov komissiyasi tomonidan roʻyxatga olindi:

1. Kushayev Ashirbay Baltabayevich, 1961-yilda tugʻilgan, partiyasiz, fuqarolarning oʻzini oʻzi boshqarish organlari faoliyatini muvofiqlashtirish boʻyicha Amudaryo tuman Kengashi raisining birinchi oʻrinbosari, “Mahalla” xayriya jamoat fondining tuman boʻlinmasi raisi. Amudaryo tumani Navbahor koʻchasi, 12 uyda yashaydi, 1-Navoiy saylov okrugi;

2. Beknazarova Muqaddas Norim qizi, 1978-yilda tugʻilgan, OʻzLiDeP aʼzosi, fuqarolarning oʻzini oʻzi boshqarish organlari faoliyatini muvofiqlashtirish boʻyicha Amudaryo tuman Kengashi raisining diniy-maʼrifiy masalalar boʻyicha oʻrinbosari. Amudaryo tumani Kimyogarlar koʻchasi, 26-uyda yashaydi, 10-Toshyop saylov okrugi.

Yuqoridagilarga asosan, tuman saylov komissiyasi 2017-yil 17-dekabrda saylangan ikki nafar deputatning vakolatlarini qonuniy deb eʼtirof qiladi.

Oʻzbekiston Pespublikasining “Xalq deputatlari viloyat, tuman va shahar Kengashlariga saylovlar toʻgʻrisida”gi Qonuniga muvofiq 2017-yil 29-dekabr kuni boʻlib oʻtgan xalq deputatlari tuman Kengashining 40-sessiyasi qarori bilan yangi saylangan deputatlarning deputatlik vakolatlari eʼtirof etildi.

Anvar KAMOLOV, xalq deputatlari Amudaryo tuman Kengashiga saylov boʻyicha tuman saylov komissiyasi raisi.