BUYuKLIKNING TIMSOLI – AYoL
Rivoyatlarda aytilishicha, bir hukmdor mulozimlari bilan olis safarga chiqibdi. Uch-toʻrt kunlik yoʻlni bosib oʻtganlarida orqasidan chopar yetib kelib, kenja farzandi vafot etganini bildiribdi. Hukmdor dardini ichiga yutibdi. Ogʻir xoʻrsinib, yoʻlida davom etaveribdi.
Oradan bir oycha vaqt oʻtib, orqasidan yana chopar kelib, ayoli vafot etganini maʼlum qilibdi. Hukmdor bu safar ham dardini ichiga yutib, yoʻlida davom etaveribdi.
Oradan kunlar oʻtib, orqalaridan uchinchi bora chopar yetib kelib, hukmdorga keksa onasi olamdan oʻtganini maʼlum qilibdi.
Shunda kutilmagan holat sodir boʻlibdi: hukmdor otdan tushib, uvvos solib, oʻkirib-oʻkirib yigʻlabdi. Volidasi haqiga uzundan-uzoq duo qilibdi, gʻoyibona rizolik tilabdi. Shohning avvalgi qazolarga sabri-yu, onasining oʻlimiga chiday olmay, uvvos solib yigʻlayotganidan ajablangan mulozimlar undan buning sababini soʻrashibdi. Shunda hukmdor:
– Oʻgʻlim va ayolimning ayriligʻi ham jon-jonimdan oʻtdi, biroq chidadim. Ammobolam oʻlsa, vaqt kelib yana farzand koʻrishim mumkin, ayolim oʻldi, yana uylanishim mumkin. Lekin meni toʻqqiz oy rahmida koʻtarib, dunyoga keltirgan, yer-u koʻkka ishonmay, eʼzozlab voyaga yetkazgan onamni endi qaydan topaman, – deb yana xunibiyron boʻlib yigʻlayvergan ekan.
Ha, onalar dunyodagi eng moʻʼtabar insonlardir. Sharq xalqlari oilasida ayollarga shu boisdan ham ulkan hurmat-ehtirom bilan qaraladi, ulugʻlanadi. Boisi, oilaning tinch-totuvligini taʼminlashda, bir-birovga mehr-oqibat va oʻzaro hurmat-eʼtibor qaror topishida ayol hal qiluvchi oʻrin egallaydi. Sharq xalqlari oilasida boshqa aʼzolarning oʻrnini kamsitmagan holda aytish mumkinki, farzand tarbiyasi bilan eng koʻp mashgʻul boʻladigan kishi bu – ona.
Bugunning ayoli jamiyatning faol aʼzosi hamdir. Shu boisdan ham mamlakatimizda ayollarni qoʻllab-quvvatlash, qobiliyat-iqtidorini namoyon etishlari uchun sharoit yaratish, faolligini oshirishga eʼtibor tobora kuchaytirilmoqda.
Ayniqsa, Prezidentimizning joriy yil 2-fevraldagi “Xotin-qizlarni qoʻllab-quvvatlash va oila institutini mustahkamlash sohasidagi faoliyatini tubdan takomillashtirish chora-tadbirlari toʻgʻrisida”gi Farmoni jamiyatimizda ayolning nufuzini yanada oshirib, uning farzand tarbiyasi, oila mustahkamligini taʼminlash, jamiyatni yanada rivojlantirishdagi ishtiroki samarasini oshirishga zamin yaratadi.
Ahmad NAFASOV,
“Jayxun ilhomlari” NNT raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
