NAVROʻZIM

Qizlar qilib sochiga, tol bargagin chambarak,

Bugun bayram-la qutlar, Yer-u osmonlar – falak

Qozonlarda biqirlab, qaynar tansiq sumalak,

Elning ardogʻidasan, oy, quyoshim, yulduzim –

Bizga asrlar osha yetib kelgan Navroʻzim!

Navroʻz – asli Yangi kun – yilning boshi, degani,

Keling somsa, sumalak, koʻk chuchvara yegani.

Tillar loldir shaʼningga, shirin bir soʻz degani,

“Ochil dasturxon”ingga, tushib ketsa gar koʻzim -

Koʻzni qamashtiradi, noz-neʼmating, Navroʻzim!

Tarqaladi qaygʻu-gʻam, tarqalar alam bugun,

Taʼrifingni yozishga, ojizdur qalam bugun.

Doʻstlar oʻynab-kulinglar, Navroʻzi olam bugun,

Mehmon kelsa kutgumdir, qoʻlimda non-u tuzim–

Umidim, nasibamsan ham rizqimsan, Navroʻzim!

Necha asrlarga teng, sening moʻʼtabar yoshing,

Bugun qayta osmonda, porlab turar quyoshing.

Elimizda tabarruk boʻlgan sumalak oshing,

Navbahor kelinchagi –Yangi kun – rizqu-roʻzim –

Mustaqillik davrida, qayta kelgan Navroʻzim!

Kishilar orasidan, mehr-oqibat ketdi,

Qatagʻon-u turgʻunlik yillar boshingga yetdi...

Nihoyat, erkin davron, ozodlik nasib etdi,

Asrlik pardangni och, och endi yuz-u koʻzing –

Munofiqlar kuysinlar, shaʼning koʻrib, Navroʻzim!

Mustaqillik davrida, tozalanib, poklanib,

Istagimiz, yurgaysan, tuhmatlardan saqlanib.

Oldda turar qanchalar, muammolar taxlanib,

Rejalarni yechishda, mayoq–yoʻlchi yulduzim –

Pahlavonim, botirim, zabardastim, Navroʻzim!

Kuy-qoʻshiqlar tinmasin, yurtimiz boʻlsin obod,

Jahon ahlin uygʻotsin, boʻlsin ellar ozod, shod.

Shaʼningga gʻazal bitdi, gʻazalxoning Shomurod,

Toki tanda jonim bor, kuylagayman chin soʻzim –

Xalqim ardogʻida boʻl, xalq bayrami – Navroʻzim!

Shomurod XOʻJANOV,

“Doʻrman” ovuli.