Oltin kuz saxovati

Bugungi kunda tumanimizning 16050 gektarlik bepoyon  paxtazorlari katta yaratuvchilik maydoniga aylangan. Bu mehnat maydonlarida 27 ming nafardan ortiq terimchilar ertalabdan kechgacha ter toʻkib mehnat qilmoqdalar. Ularning unumli mehnat qilishlari uchun dala boshida qulay shart-sharoitlar yaratilgan. Tushlikda  issiq choy, issiq ovqat muhayyo. Tosh-tarozilar betoʻxtov ishlab turibdi. Terilgan paxtalarni oʻlchovchi yigitlarning qoʻli-qoʻliga tegmaydi. Paxta hosiliga toʻldirilgan tirkama-aravalarni traktorlar qabul punktiga peshma-pesh tashib, yetkazib bermoqda.

Tumanimizda faoliyat koʻrsatayotgan 261 ta fermer xoʻjaliklarining har birida tashkil etilgan yigʻim-terim otryadlari rahbarlari doimo dala boshida boʻlib, terim surʼatining oshishiga, terimchilar uchun qulay sharoitlar yaratilishiga, mehnat haqlarining oʻz vaqtida toʻlab borilishiga, paxta hosilining oʻz vaqtida betoʻxtov qabul punktiga tashilishiga, xullas, yigʻim-terim otryadining bekam-u koʻst ishlab turishiga masʼuldirlar. Ular oʻz zimmalaridagi bu muhim vazifani ado etishning uddasidan chiqmoqdalar.

Yigʻim-terim ishlarini yaxshi tashkil etib, terim surʼatlarini oshirayotgan "doʻrman”lik, "xolimbeg”lik, "qilichboy”lik, "qipchoq”lik, "choykoʻl”lik, "oʻrta qalʼa”lik paxtakorlar kun sayin marra sari yaqinlashmoqdalar. Peshqadam fermer xoʻjaliklaridan esa ketma-ket xush-xabarlar kelib turibdi. Mana shunday xushxabar birinchi boʻlib "Oʻrta qalʼa” ovulidan olindi. Nurulla Yaxshimurodov boshqargan "Yusufxoʻja” fermer xoʻjaligi paxtakorlari tumanimizda birinchi boʻlib paxta tayyorlash boʻyicha yillik shartnomaviy rejasini ortigʻi bilan bajarib, marradan oshdilar. 115 gektar paxta maydonidan 250 tonnadan ortiq aʼlo navli paxta hosili topshirildi.

- Paxtazorlarimizda ikki yuz nafarga yaqin terimchilar mehnat qilishmoqda. Ularning unumli mehnat qilishlari uchun dala boshida barcha qulay shart-sharoitlarni yaratib berganmiz. Shu bois Dilbar Davlatboyeva, Oyimjon Nurimbetova, Norgul Yusupova va Muqaddas Polvonova kabi terimchilarimiz mavsum boshidan buyon har biri 5,5-6 tonnadan "oq oltin” durdonalarini terib topshirdilar. Biz bu singari ilgʻor terimchilarimizni oʻz vaqtida moddiy va maʼnaviy ragʻbatlantirib bormoqdamiz.

Koʻrib turganingizdek, hali paxtazorlarimizda hosil moʻl, yana rejaga qoʻshimcha 210 tonna paxta hosili topshirib, yalpi xirmonimizni 460 tonnadan oshiramiz, - deydi ilgʻor fermer Nurulla Yaxshimurodov.

Yana soʻzi bilan ishi bir ilgʻor fermerlardan Qilichboy qishlogʻining "Hizr eli” mahallasidagi Omonboy Rajabov rahbarligidagi oʻz ismi-sharifi bilan ataluvchi fermer xoʻjaligidir. Bu fermer xoʻjaligi-yam birinchilardan boʻlib yillik shartnomaviy rejasini sharaf bilan bajarib, marradan oshdi. 90 gektarpaxta maydonidan 210 tonnadan ortiq "oq oltin” durdonalarini yigʻishtirib olib, davlat xazinasiga topshirishdi.

- Paxtazorlarimizda har kuni erta tongdan mehnat qaynaydi. Ayni kunda toʻrt yuz nafarga yaqin terimchilar ter toʻkib, mehnat qilishmoqda. Hatto terimchilarni sanashga ham ulgurolmay qolaman. Eng ilgʻor terimchilarimizdan Gulzoda Yoʻldosheva, Bozorgul Bobojonova, Raʼno Aminova va Sharifa Xoliyozovalarning har biri kuniga 180-200 kilgrammdan paxta terib, xirmonimizga baraka kiritmoqdalar. Majburiyatimiz - 40 tsentnerlik yuksak marrani egallab, ona – Vatanimizga jami 360 tonna yuqori navli paxta hosilini topshirishdir. Soʻz berdikmi, buning uddasidan albatta chiqamiz, - deydi yetakchi fermer Omonboy Rajabov.

Ha, elimizda mana shunday mard yigitlar hamisha bor boʻlishsin. Xalqimizda: "nor yigitlari bor elning yuki yerda qolmaydi” degan naql bejizga aytilmagan-ku, axir.

Qobul ShOMURODOV.