“Ommaviy kitobxonlik oyligi” eʼlon qilindi

“Taraqqiyot koʻzgusi” gazetasi tahririyati va “Jayxun ilhomlari” nodavlat notijorat tashkiloti hamkorligida shu yil 20-apreldan 20-maygacha “Ommaviy kitobxonlik oyligi” eʼlon qilindi.

Oylik 20-aprel kuni Doʻrman ovulidagi 20-sonli maktabda oʻtkazilgan tadbir bilan boshlandi.

Aytish kerakki, oylik doirasidagi tadbirlarning dastlabkisi – kutubxona kitoblaridan iborat “Sayyor kitob karvoni” loyihasidir. Bunda maktab oʻquvchilari, boshqa ishtirokchilar oʻzlarini qiziqtirgan mavzudagi kitoblar bilan tanishadilar hamda kutubxonaga aʼzo boʻlib, uning xizmatidan foydalanishlari mumkin.

Shuningdek, loyiha doirasida tumandagi kitob doʻkonlari bilan hamkorlikda “Koʻchma kitob doʻkoni” tashkil qilinib, “Eng yaxshi sovgʻa – kitob” aktsiyasi oʻtkaziladi. Aktsiya doirasida tumandagi kitob savdosi bilan shugʻullanuvchi tadbirkorlar taʼlim muassasalariga borib, mahsulotlarini oʻquvchilar va ularning ota-onalari eʼtiboriga havola qiladilar.

Oylik doirasida “Kutubxonaga kitob sovgʻa qilaman” xayriya aktsiyasini oʻtkazish ham belgilangan. Bunda tumanimizning har bir fuqarosi kutubxona kitob fondini boyitishdek savobli ishga hissa qoʻshib, shaxsiy kutubxonasidan kitoblar sovgʻa qilishi mumkin. Oʻz navbatida bu kitoblarni kutubxona aʼzolari boʻlmish yuzlab kitobxonlar oʻqishlari mumkin boʻladi. Eng muhimi, kutubxonaga 10 ta va undan ortiq kitob sovgʻa qilgan muruvvatli kishilar “Taraqqiyot koʻzgusi” va “Mening oilam” gazetalariga 2019-yil uchun bepul obuna qilinadi, ularning nomi gazetada va Amudaryo televideniyesida eʼlon qilinadi.

Oylik doirasida yoshlarning dunyoqarashini, ularning kitobxonlikka boʻlgan munosabatini oʻrganish maqsadida taʼlim muassasalarida ijtimoiy soʻrovnomalar ham oʻtkazilishi rejalashtirilgan.

Oylik yakunida esa 9-sonli Bolalar musiqa va sanʼat maktabida katta tadbir oʻtkazilib, unda Qoraqalpogʻiston Pespublikasi va Xorazm viloyatlarida yashab ijod qilayotgan taniqli yozuvchi va shoirlarning yoshlar bilan uchrashuv tashkil qilinadi.

Kitob mutolaasiga qiziqqan, farzandlarini komil insonlar boʻlib yetishishini istagan barcha yurtdoshlarimizni tadbirlarda faol ishtirok etishga taklif qilamiz. Zero, kitob – eng yaxshi doʻst, eng yaxshi suhbatdosh, hayot darsini oʻrgatuvchi ustozdir. Umid qilamizki, “Ommaviy kitobxonlik” oyligi kitob oʻqishga keng aholini, ayniqsa, yoshlarni yanada koʻproq jalb qilishda, ularning maʼnaviyatini yanada yuksaltirishda muhim qadam boʻladi.