SOGʻLOM BOLA – OILASIGA HAM, ELIGA HAM ShARAF KELTIRADI

Mamlakatimizda bolalarning sogʻlom boʻlib, asoratlarsiz tugʻilishi uchun ayol homilador boʻlishidan oldin harakat boshlanadi.

Tugʻruq yoshidagi ayollar homilador boʻlishidan oldin chuqur tekshiruvdan oʻtib, zarur hollarda davolanganidan keyingina homilador boʻlish tavsiya qilinadi. Shuningdek, ular homiladorlik davrida ham muntazam ravishda “Ayollar maslahatxonasi”- ga kelib , oʻz hududi akusher-ginekologi koʻrigidan oʻtib turadi.

Bu koʻriklar ayollarda maʼlum bir kasalliklar paydo boʻlsa, barvaqt aniqlash va emlash chorasini koʻrishga, sogʻligini nazorat qilib borishga xizmat qiladi, nogiron bolalar tugʻilishining oldi olinadi, ayollarga homiladorlik davrida oʻzini qanday tutishi lozimligi oʻrgatiladi.

Oilada sogʻlom turmush tarzining barqaror boʻlishi, oiladagi maʼnaviy muhit, ota-ona ibrati va masʼuliyati farzandning sogʻlom fikrli boʻlib ulgʻayishini taʼminlaydi.

Farzandi ham jisman, ham ruhan sogʻlom boʻlishini istagan ota-ona bola tugʻilganidan boshlab shu maqsad yoʻlida intilmogʻi lozim.

Birinchi Prezidentimiz I.Karimov “Har qaysi millatning oʻziga xos maʼnaviyatini shakllantirish va yuksaltirishda, hech shubhasiz, oilaning oʻrni va taʼsiri beqiyosdir. Chunki insonning eng sof va pokiza tuygʻulari, ilk hayotiy tushuncha-tasavvurlari birinchi galda oila bagʻrida shakllanadi”, deya yozgan edilar “Yuksak maʼnaviyat – yengilmas kuch” asarida.

Ha, darhaqiqat, oilaning, ota-onaning burchi farzand dunyoga keltirishgina emas, ularni yuksak odob-axloqli, barkamol qilib voyaga yetkazish, jamiyatda oʻz oʻrinlarini topishlariga erishishdir.

Yurtdoshlarimiz bilan har gal koʻrishganimizda salom-alikdan soʻng, “bolalar omonmi, uy-ichingiz tinchmi?” – deya soʻrashamiz. Ota-bobolarimizdan meros boʻlib kelayotgan bu odatimizda ham suhbatdoshimizning oilasi, farzandlari sogʻ-omonligini soʻrash barobarida bir-birimizga bu boradagi maʼsuliyatimizni ham eslatib qoʻyamiz, nazarimda.

Farzand tarbiyasida muhim saboq boʻlib xizmat qilgulik shunday urf-odat, anʼana va qadriyatlarimiz borki, bularga amal qilish, gʻoyalarini yosh avlod qalbiga singdirish ularning yetuk insonlar boʻlib kamolga yetishiga xizmat qiladi.

Oila – oʻzida hayot abadiyligini mujassam etgan, muqaddas urf-odatlarimizni saqlab, shu asosda kelgusi avlodlarning komil inson boʻlib voyaga yetishishini taʼminlaydigan tarbiya maskani, muqaddas goʻshadir.

Oila boshchilari oʻzining masʼuliyatini, vazifasini ado eta olgan oilada voyaga yetgan farzandlar ota-onasiga, eliga quvonch keltirib, halol xizmat qilib yashaydi.

Oygul RAJABOVA.