Bolalar bogʻchada ingliz tilini oʻrganishga kirishadi

Prezidentimizning 2012-yil 10-dekabrdagi "Chet tillarni oʻrganish tizimini yanada takomillashtirish chora-tadbirlari toʻgʻrisida”gi qaroriga muvofiq joriy oʻquv yilidan boshlab umumtaʼlim maktablarining birinchi sinfidan boshlab oʻquvchilarga chet tili oʻrgatiladi.

Tajribalar bolalarni maktabga tayyorlash jarayonida ham chet tilini oʻrganishga koʻnikma hosil qilish va qiziqishini oshirish muhim ahamiyatga ega ekanligini koʻrsatmoqda.

Shu munosabat bilan maktabgacha taʼlim muassasalarida ham chet tili, xususan, ingliz tili toʻgaraklarini tashkil etish maqsadga muvofiq koʻrildi.

Bizning Mangʻit shahrida joylashgan 43-maktabgacha tarbiya muassasamizda ham oktyabr oyidan boshlab ingliz tili toʻgaragi 2 guruh bolalar bilan ish boshlaydi. Buning uchun muassasamizga 2 nafar ingliz tili oʻqituvchisini jalb qildik va toʻgarak mashgʻulotlarini olib borish dasturini tasdiqladik. Mazkur toʻgarakda bolalar ingliz tilini oʻrganish boʻyichadastlabki koʻnikmaga ega boʻladi. Oʻylaymizki bu bosqichdan oʻtgan bolalar umumtaʼlim muassasalarining 1-sinfiga qabul qilinganida ingliz tilini boshqa tengdoshlariga qaraganda oson va tez oʻzlashtiradilar. Bolaga chet tili qanchalik erta oʻrgatilsa, uning eslab qolish qobiliyati va ogʻzaki nutqi shunchalik yaxshi rivojlanar ekan.

Muassasamizda ingliz tili toʻgaragi mashgʻulotlari samarali boʻlishiga erishish uchun oʻquv dasturi ishlab chiqdik.

Mashgʻulotlar 3-4 va 5-6 yoshli bolalarning zehni, tafakkuri va dunyoqarashi hisobga olingan holda interfaol usullarda olib boriladi. Har bir mavzuni oʻzlashtirishda bolalarning qiziqishiga qarab turli oʻyinlar, qoʻl mehnati, rasm chizish, sheʼr yodlash va ashula aytish kabi usullardan foydalanamiz. Bu bolalarning mashgʻulotlarni yaxshi oʻzlashtirishlariga yordam beradi, deb oʻylayman.

Ayni kunda maktabgacha taʼlim muassasamizda tarbiyalanayotgan 3-4 yoshli va 5-6 yoshli 2 guruh bolalarning ilk toʻgarak mashgʻulotlarini boshlashga tayyorgarlik koʻrayapmiz. Va buni ota-onalar ham qoʻllab-quvvatlashmoqda. Chunki bolalarning chet tilini oʻrganish borasida olgan ilk bilimlari ularga kelgusida juda asqotadi.

Hozir bogʻchamizda 95 nafar kichkintoylar tarbiyalanmoqda. Ularga 14 nafar malakali tarbiyachilar jalb qilingan. 5 ta guruh bolalaridan saylangan iqtidorli 2 guruh bolalar chet tilini oʻrganishga shay.

Manzura JUMANIYoZOVA,

43-sonli maktabgacha taʼlim muassasasi mudiri.