Mahallada namuna va ibratli

Donishmandlar inson umrini yilning 4 fasliga qiyoslaydilar. Bahor butun borliqqa jon ato etuvchi uygʻonish, yasharish fasli boʻlsa, yoz hosil yigʻuvchi moʻl-koʻlchilik fasli, kuz esa sarhisob, qish fasli koʻngillarga orom beruvchi, kelgusi rejalarga tayyorlanish demakdir. Maqola qahramoni Bahodir Ibragimovning hayotini moʻl-koʻl hosil undirish ishtiyoqi joʻsh urayotgan faslga oʻxshatgim keladi.

Bahodir Ibragimov 1966-yil Mangʻit shahrining "Chordara” mahallasidagi Beshgujum mavzesida oddiy xizmatchi oilasida tugʻilgan.

Bolaligidanoq uyi paxta tozalash zavodi yaqinida joylashgani uchun uning kalbi zavodda ishlash ishtiyoqida yonardi.

1983-yili oʻrta maktabni tamomlagan Bahodir aka Nukus politexnikumida tahsil oldi. Ilk faoliyatini dastlab Mangʻit paxta tozalash zavodida chilangar boʻlib ishlashdan boshladi.Ish jarayonida u oʻqimishli boʻlsa korxonaga koʻproq foydasi tegishini his qila boshladi. Shu niyatda oʻqishni davom ettirish uchun 1987-yil Toshkent Toʻqimachilik va yengil sanoat institutiga oʻqishga kirdi. Oliy maʼlumotga ega boʻlgan Bahodir faoliyatini yana jonajon zavodida davom ettirdi. Endi chigitni urugʻga ajratish va saqlash boʻlimi boshligʻi boʻlib sidqidildan mehnat qildi.

Bahodir Ibragimovning qalbi uni bunyodkorlik ishlariga unday boshladi. Mahalladoshlarining yaxshikunlarida ularga hamnafas boʻlish uchun korxona ixtiyoridagi istirohat bogʻining koʻrimsiz boʻlib turgan joyida ulkan qurilish boshladi. Bu "Temurbek” toʻyxonasi edi.Toʻyxona yonida oziq-ovqat doʻkoni va sartaroshxona qurdirdi. Endi toʻy egalari toʻy xarajati uchun ovora boʻlib yurmasdan, shu yerning oʻzida kerakli xaridlarini amalga oshiradilar. Sartaroshxona ham tevarak atrofdagilar uchun qulaylik boʻldi.

Bu ishlarni amalga oshirishda oila aʼzolari unga qoʻl-qanot, madadkor boʻldi. Oila - barcha ezgu niyatlar-orzularga doya, intilishlarga madadberguvchidir. Uning baxti - maqsadlariga xayrixoh, tashvishlariga yelkadosh boʻla oladigan ayol bilan umrini bogʻlaganida edi. Shu tufayli xonadonida tinchlik-osoyishtalik, oʻzaro mehr-oqibat mujassam boʻldi. Ulardan andoza olib ulgʻaygan farzandlar ham mehnatkash, intiluvchan boʻlib voyaga yetdilar, hayotda oʻz mehnatlari bilan oʻzlarining oʻrnini topishga erishmoqdalar.

Bahodir aka turmush oʻrtogʻi Zumrad Vafoyeva bilan birgalikda 5 nafar farzandni voyaga yetkazishdi. Kelin tushirib, nevara suyish baxtiga ham erishdilar.

Katta farzandi Ulugʻbek "Yulduz” hissadorlik jamiyatida iqtisodchi boʻlib ishlaydi. U ham otasi taʼlim olgan Toshkent Toʻqimachilik va yengil sanoat institutini tamomlagan. Turmush oʻrtogʻi Nilufar Xoʻjayeva 3-sonli Amudaryo akademik litseyida biologiya fani oʻqituvchisi. Ikkinchi farzand Otabek ham akasi va otasi izidan borib, Toshkent Toʻqimachilik va yengil sanoat institutini tamomlagan, oliy maʼlumotli, OʻzLiDeP tuman Kengashida ishlaydi. Farhod esa tibbiyot xodimi. Bobur Mangʻit iqtisodiyot va kasb-hunar kolleji talabasi. Temur 36-sonli oʻrta maktabning 6-sinf oʻquvchisi.

- Hozir toʻyxonada 15 nafar yigit-qizlarni ish bilan taʼminlaganmiz. Toʻyxona atrofi koʻkalamzorlashtirilgan, daraxtlar salqinlik keltirib turadi. Lekin toʻyxona issiq kunlarda odamlarga birmuncha noqulaylik keltiradi. Bunga barham berish maqsadida yozning issiq kunlariga moslashtirib yozgi bino qurilishini boshlamoqchiman. Toʻyxonaning navbatdagi qismi ishga tushsa, yana xizmatchilar sonini koʻpaytiramiz, – deydi tadbirkor Bahodir Ibragimov.

Toʻyxonaga nazar tashladim. Daraxt va gullar ekilgan salqin, soʻlim maskan kishi dilini yayratadi.

Mahalladoshlarining yaxshi kunlarida ularga madad boʻlayotgan, oʻzi yashayotgan maskanni obod qilayotgan, qalbi bunyodkorlik rejalari bilan joʻsh urayotgan, mana shunday ishning koʻzini biladigan yurtdoshlarimiz omon boʻlsin, deb niyat qildim.

Hovlisiga ekilgan goʻzal gullar kabi oʻlkamizni goʻzal qilishga harakat qilayotgan, yurtdoshlari quvonchiga sherik boʻlayotgan, ularning ogʻirini yengil qilishga oʻzining munosib hissasini qoʻshayotgan saxovatpesha, ishbilarmon bu oilaning boshlayotgan savobli ishlarida omad yor boʻlsin, deb qolaman.

Feruza Razzoqova,

NDPI talabasi.