“YOSHLAR – KELAJAGIMIZ” DAVLAT DASTURI INTILUVChAN, IZLANUVChAN YoShLARGA ISTIQBOL EShIKLARINI OChADI

Ayni kunda yurtimizda yoshlarning intellektual va ijodiy salohiyatini namoyon qilishi, ularning amalga oshirilayotgan ulkan bunyodkorlik ishlarga daxldorligini oshirish, yurt ravnaqida masʼuliyatini kuchaytirish maqsadida ulkan ishlar amalga oshirilmoqda.

Bunda yoshlar tadbirkorligini kompleks rivojlantirish, ularning ilgʻor loyihalariga keng yoʻl ochish muhim oʻrin tutadi.

Oʻzbekiston Respublikasi Prezidentining 2018-yil 27-iyun kungi “Yoshlar – kelajagimiz” Davlat dasturi toʻgʻrisida”gi Farmoni ham yoshlarning biznes tashabbuslari, startaplari, gʻoyalari va loyihalarini roʻyobga chiqarishga koʻmaklashish va qoʻllab-quvvatlash, band boʻlmagan yoshlarni mehnat bozorida talab yuqori boʻlgan mutaxassisliklar va biznes yuritish koʻnikmalariga oʻqitish, ijtimoiy-iqtisodiy faolligini oshirish orqali ularning bandligini taʼminlashga qaratilgan.

Dastur doirasida Oʻzbekiston yoshlar ittifoqi huzurida “Yoshlar – kelajagimiz” jamgʻarmasi, uning tuman, shahar, filiallari tashkil etiladi.

Jamgʻarma mablagʻlaridan Davlat dasturidagi tadbirlarni moliyalashtirish, jumladan:

– yoshlarning biznes tashabbuslari, startaplari, gʻoyalari va loyihalarini amalga oshirish uchun tijorat banklari orqali yillik 7 foiz stavka bilan imtiyozli kredit va mol-mulkni lizingga berish;

– Davlat dasturi doirasida olinadigan kreditlar boʻyicha kredit hajmining 50 foizidan koʻp boʻlmagan miqdorda kafilliklar berish;

– tegishli koʻnikmalarga ega boʻlmagan yoshlar yashaydigan uy xoʻjaliklari uchun 20 tagacha parranda va quyon bolasi, 5 ta mayda va 2 yirik qoramol sotib olish, ularning qiymatini kelishilgan muddatlarda qaytargan holda ularni boqish va keyinchalik realizatsiya qilishda koʻmaklashish;

– yoshlarning kasbga qayta tayyorlanishi va malaka oshirishini tashkil etish, mehnat bozorida talab yuqori boʻlgan kasblarga oʻqitish, shuningdek, ularga biznes yuritish koʻnikmalarini singdirish;

– yosh tadbirkorlarga davlat-xususiy sheriklik shartlarida imtiyozli binolar, ofis texnikasi va sarflash materiallarini ijaraga berish, ularni internet bilan taʼminlash, yoshlarning biznes tashabbuslari, startaplari, gʻoyalari va loyihalarini amalga oshirishlari uchun biznes rejalar ishlab chiqishda koʻmaklashish.

Yangi jamgʻarma maslahat, yuridik, buxgalteriya va boshqa xizmat turlarini koʻrsatadi, forumlar, master-klasslar tashkil etish uchun “Yosh tadbirkorlar” kovorking-markazlari tashkil etadi, savdo-maishiy va kichik ishlab chiqarish maydonlarini tashkil etish uchun mehnat kuchi haddan ziyod boʻlgan tumanlarda “Yoshlar mehnat guzari” komplekslarini quradi.

Dasturga muvofiq, Yoshlar tadbirkorligini rivojlantirish boʻyicha respublika komissiyasi va tumanlar, shaharlarda hokimlarning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosarlari boshchiligida hamda ichki ishlar boʻlimlari boshliqlarining yoshlar masalalari boʻyicha oʻrinbosarlari, Yoshlar ittifoqining tumanlar va shaharlar Kengashlari raislari, tadbirkorlikka koʻmaklashish markazi boʻlimlari rahbarlaridan iborat yoshlar tadbirkorligini rivojlantirish komissiyalari tuziladi.

KOMISSIYaNING VAZIFALARI NIMALARDAN IBORAT? degan savol koʻpchilikni qiziqtirishi tabiiy, albatta.

Komissiya aʼzolari investitsiyaviy va ijtimoiy komplekslar hududiy organlarining, shuningdek, moliyalashtiruvchi tijorat banklarining biriktirilgan xodimlari, fuqarolarning oʻzini oʻzi boshqarish organlari xodimlari bilan birgalikda tadbirkorlik faoliyati bilan shugʻullanishni xohlaydigan band boʻlmagan aholini aniqlaydi, uyma-uy yurib, aholi bilan uchrashadi, yoshlarning biznes tashabbuslari, startaplari, gʻoyalari va loyihalarini ishlab chiqishda, zarur hujjatlar va materiallarni tayyorlash hamda rasmiylashtirishga koʻmaklashadi.

Shuningdek, yoshlarning biznes tashabbuslari, gʻoyalari va loyihalarini realizatsiya qilish uchun imtiyozli kreditlar va mol-mulkni birlamchi koʻrib-chiqish va tanlab olish ham mazkur komissiya zimmasidadir.

Komissiya aʼzolari har bir xonadonni uyma-uy yurish, mavjud infratuzilmani inventarizatsiya qilish, yoshlar shugʻullanish istagini bildirgan mehnat faoliyati turini tahlil qilish, shuningdek, imtiyozli kreditlar va mol-mulkni lizingga berish talabnomlarini tanlab olish natijalari boʻyicha tasdiqlangan parametrlar doirasida tegishli tumanlar va shaharlarda namunaviy biznes rejalar asosida realizatsiya qilinadigan yoshlarning biznes tashabbuslari, startaplari, gʻoyalari va loyihalarining manzilli roʻyxatini shakllantirib, yoshlar tadbirkorligini rivojlantirish boʻyicha respublika komissiyasiga taqdim etadi.

Respublika komissiyasi bu roʻyxatni imtiyozli kreditlar, mol-mulkni lizingga berishni moliyalashtirish uchun tijorat banklariga hamda jamgʻarmaga taqdim etadi.

Moliyalashtiruvchi tijorat banklari taqdim etilgan manzilli roʻyxat asosida imtiyozli kreditlar va mol-mulkni lizingga berish haqida oʻrnatilgan tartibda qaror qabul qiladi. Bu 3 ish kunidan oshmagan muddatda amalga oshiriladi.

“Yoshlar – kelajagimiz” Davlat dasturi toʻgʻrisida”gi Prezident Farmoni yoshlar tadbirkorligini kompleks rivojlantirish va yoshlarni tadbirkorlik faoliyati bilan shugʻullanishga faol jalb qilishda muhim qadam boʻldi.

Ayni kunlarda tumanimizda ham Farmon ijrosini taʼminlash uchun saʼy-harakatlar boshlanib ketdi.

Oygul RAJABOVA,

gazetaning maxsus muxbiri.