TUBANLIKKA INTILGANLAR
Sharq xalqlari azal-azaldan ayolni aʼzozlab kelgan. Jamiyatimizda hozirgi kunda ham ayollarning roli beqiyos. Turli jabhalarda amalga oshirilayotgan islohotlar-u bunyodkorliklarda hissasi katta ularning.
Afsus nadomatlar boʻlsinki, ayol nomiga, oʻzi tengi pok qalbli, ezgu orzu-umidli ayollar nomiga dogʻ tushiradigan, hayotda oʻz oldiga maqsad qoʻyib maqsadlari sari intilib yashash oʻrniga tubanlikka intiluvchi ayollar ham bor.
"Qangli” ovulida istiqomat qiluvchi Gulzoda Hayitboyeva (ism familiyalar oʻzgartirib berilmoqda) ham shu yoʻlni tanladi. U halol mehnat qilib oʻz tugʻilgan elida hurmatli, obroʻli boʻlib yashash, oilasida farzandlarini barkamol insonlar qilib voyaga yetkazib, tinch-xotirjam umrguzaronlik qilishdan koʻra, egri yoʻlni tanladi. Egrilikning umri qisqa ekanligini oʻylamadi...
Gulzoda 2011-yilning sentyabr oyida tergov davrida shaxsini aniqlash imkoni boʻlmagan kimsadan 1 paketda sof vazni 5 gramm boʻlgan geroin giyohvandlik moddasini olib, oldindan tanish boʻlgan Taxiatosh shahri "Xorazm” koʻchasi 18 uyda yashovchi Bobur Soliyevga 600 ming soʻmga sotgan.
U turmush oʻrtogʻi Obotov Olloyor bilan jinoiy til biriktirib, 2011-yil 2-oktyabr kuni yana shu miqdordagi "ogʻu”ni Bobur Soliyevga sotgan. 28-oktyabr kuni shu faoliyat bilan qoʻlga tushgan Bobur oʻzini taʼminlab turgan ayol ismini, manzilini militsiya xodimlariga aytishidan qoʻrqib, goʻyo "izsiz yoʻqolishdi”. Yoʻq, narkobiznes er-xotin xato oʻylashgan ekan. Huquq tartibot xodimlari Gulzodani Rossiya davlatining Moskva shahrida qoʻlga olishdi.
Gulzoda Hayitboyeva qonunga xilof ravishda sotish, tashish, saqlash va isteʼmol qilish man etilgan giyohvand moddalar savdosi bilan shugʻullanganligi uchun qilmishiga yarasha jazo oldi, olti yil muddatga ozodlikdan mahrum qilish, jazosi tayinlandi. Jazo muddatining oʻtalmagan qismi Oʻzbekiston Respublikasi Oliy Majlisi Senatining 2012-yil 5-dekabrdagi "Oʻzbekiston Respublikasi Konstitutsiyasi qabul qilinganligining 20-yilligi munosabati bilan amnistiya toʻgʻrisida”gi Qarorining 7 bandi "a” kichik bandiga asosan uchdan bir qismi qisqartirildi. 9 mln. 900 ming soʻmlik "Tiko” rusumli shaxsiy avtomashinasi esa jinoyat quroli sifatida davlat foydasiga musodara qilindi.
Ezgu, toʻgʻri yoʻl qolib tubanlikka intilgan Gulzoda bu odil hukmdan tegishli xulosa chiqarib olsa, qaniydi?!
"Xolimbeg” ovulida yashovchi Baxtiyor Murodov ham Gulzoda kabi tayyorlash, olish, sotish, tashish taʼqiqlangan giyohvandlik moddalar savdosi bilan shugʻullanib, baxtli va farovon yashashni orzu qilganlarning biri. U Xozarasp tumanida yashovchi tanishi Ilhom Toʻrayev bilan jinoiy til biriktirib, 85,33 gramm triyak (opiy) koʻp miqdordagi giyohvandlik moddasini 450 ming soʻmga sotib olib, oʻzining yashash uyida saqlab qoʻygan.
U 2011-yilning 4-fevralida "Doʻrman” ovulining Xorazm viloyati bilan chegaradosh hududida Gurlan tumani "Birlashgan” qishloq fuqarolar yigʻinida yashovchi Ozodbek Xudoyberganovga 20 gramm triyak (opiy) giyohvandlik moddasini sotdi. Bu bilan ham cheklanmay, 9-fevral kuni 61,08 gramm koʻp miqdordagi "ogʻu”ni Ozodbek Xudoyberganov va uning tugʻishgan akasi Botirlarga bir million ellik ming soʻmga sotayotgan vaqtida huquq-tartibot idoralari xodimlari tomonidan qoʻlga olindi.
Baxtiyor Murodovning uyi tintuv qilinganida, uning yotoqxonasida turgan sariq dublyonkasining ichki zamokli choʻntagidan qogʻoz boʻlakchasi ichida sariq rangli tsellofan paketga oʻralgan toʻrtburchak shaklda 4,25 gramm triyak (opiy) moddasi topildi.
Bu qilmishlari uchun unga jinoyat ishlari boʻyicha tuman sudi 10-yil muddatga ozodlikdan mahrum qilish jazosini tayinladi.
Ha, nopok yoʻl hech qimni yaxshi manzilga yetkazmaganidek, 1976-yilda tugʻilgan, uch nafar farzandning otasi Baxtiyorni ham 10-yil muddatga temir panjara ichida yashashga mahkum etdi.
Ayni umrining eng joʻshqin davrida, oilasidan ayro 10-yil qamoq jazosini oʻtaydigan Baxtiyorning taqdiri, qaniydi, ushbu "zahri qotil” toʻriga ilinganlarga, savdosi bilan shugʻullanib boy boʻlishini orzu qilayotganlarga saboq boʻlsa? Qaniydi...
P.DOShMURATOV,
jinoyat ishlari boʻyicha tuman sudi raisi.
(Foto - http://kun.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
